തൗഹീദും ശിർക്കും - ഭാഗം - 7

അസ്സലാമുഅലൈക്കും വ റഹ്മതുല്ലാഹി

പ്രിയ സഹോദരങ്ങളെ 

തൗഹീദിന്റെ അടിസ്ഥാനം എന്നാൽ അത് ആദിയിലും അവസാനത്തിലും പരിപൂർണ്ണമായ അല്ലാഹുവിന്റെ ഉന്നതങ്ങളായ നാമ-വിശേഷണങ്ങളും, അവന്റെ പ്രവർത്തനങ്ങളും മാത്രമാണ് എന്നാണ് പരിശുദ്ധ ഖുർആൻ വചനങ്ങളുടെ അടിസ്ഥാനത്തിലും അതിനെ പണ്ഡിതന്മാർ വിശദീകരിച്ചതിന്റെ അടിസ്ഥാനത്തിലും കഴിഞ്ഞ ഭാഗത്ത് പറഞ്ഞത്.

അല്ലാഹുവുമായി ബന്ധപെട്ട ഏതൊരു കാര്യത്തിന്റെയും പ്രഥമമായ അടിസ്ഥാനം എന്നാൽ അവന്റെ നാമ-വിശേഷണങ്ങൾ ആണ് എന്ന് നമുക്ക് കാണാവുന്നതാണ്. മനുഷ്യകുലത്തിന്റെ ആരഭത്തിന്റെ അത്രത്തോളം തന്നെ  പഴക്കമുള്ള ഒരു ചോദ്യമാണ് 'സൃഷ്ടാവ് ഉണ്ടോ?' എന്ന ചോദ്യം. ഈ ഒരു ചോദ്യത്തിന്റെ ഉത്തരവും ബന്ധപ്പെട്ടു കിടക്കുന്നത് അല്ലാഹുവിന്റെ ഒരു നാമത്തിൽ ആകുന്നു.

"ഉസ്താത് ഇബ്നു ഫൂറക്കും മറ്റും പറഞ്ഞു: തീർച്ചയായും പരിശുദ്ധനായവന്റെ (അല്ലാഹുവിന്റെ) ആദ്യ വിശേഷണങ്ങളിൽ പെട്ടതാണ്  "ശൈഉൻ" എന്ന് നീ അറിയണം.  സ്ഥിരപ്പെട്ടു വന്നിട്ടുള്ള ആദ്യ വിശേഷണങ്ങളിൽ ആദ്യപടിയിൽ നിൽകുന്ന ഒന്നാണത്.  അതിന്റെ അർഥം: 'തീർച്ചയായും അവൻ സന്നിഹിതനാകുന്നു'.  നമ്മുടെ അടുത്തു സത്യസന്ധമായി വന്ന ഒരു കാര്യമാണത്." - ഇമാം ഖുർത്വുബി, الْأَسْنَى فِي شَرْحِ أَسْمَاءِ اللَّهِ الْحُسْنَى, പേജ് 91.

അല്ലാഹുവിന്റെ നാമ-വിശേഷണങ്ങൾ മാത്രം ചർച്ചചെയ്യുന്ന ഇമാം ഖുർത്വുബി(റഹി)യുടെ "അൽ അസ്നാ ഫീ ശർഹി അസ്മാഹില്ലാഹിൽ ഹുസ്നാ" എന്ന ഗ്രന്ഥത്തിൽ അദ്ദേഹം ഏറ്റവും  ആദ്യത്തെ നാമമായി പരിചയപ്പെടുത്തുന്ന അല്ലാഹുവിന്റെ ഒരു നാമമാണ് شيء "ശൈഉൻ" അഥവാ വസ്തു എന്ന് അർത്ഥമുള്ള നാമം.

പരിശുദ്ധ ഖുർആൻ വചനം 6:19ൽ ആണ് "ശൈഉൻ" എന്ന നാമം ഉള്ളത്. യഥാർഥത്തിൽ ഈ നാമം വിരൽചൂണ്ടുന്നത് അല്ലാഹുവിന്റെ സാനിദ്ധ്യമാണ് അഥവാ അല്ലാഹു സന്നിഹിതനായിരിക്കുന്നു എന്നാണ് ഈ നാമം അറിയിക്കുന്നത്.

"തീർച്ചയായും ഗ്രന്ഥത്തിൽ (ഖുർആനിൽ) 'ശൈഉൻ' എന്ന ഈ നാമം, അവന്റെ വചനത്തിൽ വന്നിട്ടുണ്ട്. 'പറയുക: സാക്ഷ്യത്തിൽ വെച്ച് ഏറ്റവും വലിയത് ഏതു വസ്തുവാണ്? പറയുക: എന്റെയും നിങ്ങളുടെയും ഇടയിൽ അല്ലാഹു സാക്ഷിയാകുന്നു' ഖുർആൻ 6:19'" - ഇമാം ഖുർത്വുബി, الْأَسْنَى فِي شَرْحِ أَسْمَاءِ اللَّهِ الْحُسْنَى, പേജ് 91.

എങ്ങിനയാണ് "ശൈഉൻ" അഥവാ 'വസ്തു' എന്ന നാമം "സൃഷ്ടാവ് ഉണ്ടോ" എന്ന ചോദ്യത്തിനുള്ള മറുപടി ആകുക എന്ന് ചോദിച്ചാൽ, ഗ്രാമീണനായ ഒരു അറബിയോട് 'എന്താണ് രക്ഷിതാവ് ഉണ്ട് എന്നതിനുള്ള തെളിവ്?" എന്ന് ചോദിച്ചപ്പോൾ അദ്ദേഹം നൽകിയ മറുപടിയാണ്. അദ്ദേഹം പറഞ്ഞു -

"യാ സുബ്ഹാനല്ലാഹ്, ചാണകം ഒട്ടകത്തെ അറിയിക്കുന്നു. കാലടയാളം നടന്നു പോയവനെ അറിയിക്കുന്നു. അപ്പോൾ രാശി മണ്ഡലങ്ങൾ ഉള്ള ആകാശം, വിശാലമായ നടമാർഗങ്ങൾ ഉള്ള ഭൂമി, തിരമാലകൾ ഉള്ള സമുദ്രം - ഇതൊന്നും സൂക്ഷഞാനിയായ ഒരുവനെ അറിയിക്കുന്നില്ലേ?" -ഇമാം ഇബ്നു കസീർ (റഹി), ഖുർആൻ 2:22.

അപ്പോൾ ഗ്രാമീണനായ ഈ അറബി പറഞ്ഞ കാര്യങ്ങൾ എല്ലാം തന്നെ ഏതൊരു ശക്തി-വിശേഷത്തിന്റെ സാന്നിധ്യം അറിയിക്കുന്നുവോ, ആ സാനിദ്ധ്യത്തെയാണ് പരിശുദ്ധ ഖുർആൻ വചനത്തിൽ വന്ന "ശൈഉൻ" എന്ന നാമം പ്രധിനിധാനം ചെയ്യുന്നത്.

പറഞ്ഞു വരുന്നത് എന്തെന്നാൽ, അല്ലാഹുവിന്റെ അസ്തിത്വവുമായി ബന്ധപെട്ട ഏതൊരു കാര്യവും ബന്ധപ്പെട്ടു കിടക്കുന്നത് അവന്റെ നാമ-വിശേഷണങ്ങളിൽ ആകുന്നു.

ഇനിയാണ് തൗഹീദിന്റെ നിർവചനം എന്താണ് എന്ന് മനസ്സിലാക്കേണ്ടത്. അഞ്ചും ആറും ഭാഗങ്ങളിൽ, തൗഹീദുമായി അഥവാ അല്ലാഹുവിന്റെ എകത്വവുമായി ബന്ധപെട്ട ഇതുവരെ പറഞ്ഞ കാര്യങ്ങൾ ആണ് താഴെ കൊടുത്തിട്ടുള്ളത്.

A. ഏകാനാക്കേണ്ടത് ആരെ?
B. ഏകാനാക്കേണ്ടത്  ഏതൊരു കാര്യത്തിൽ ?
C. തൗഹീദിന്റെ അടിസ്ഥാനം അല്ലാഹുവിന്റെ നാമ-വിശേഷണങ്ങൾ 
D. തൗഹീദിന്റെ അടിസ്ഥാനം അല്ലാഹുവിന്റെ പ്രവർത്തനങ്ങൾ

തൗഹീദിന്റെ ഒന്നാമത്തെ അടിസ്ഥാനം ആയ അല്ലാഹുവിന്റെ ഉന്നതങ്ങൾ ആയ നാമ-വിശേഷണങ്ങൾ വെച്ചുകൊണ്ടാണ്‌ തന്നെയാണ് പണ്ഡിതന്മാർ തൗഹീദിനെ നിർവചിച്ചത്.

E. തൗഹീദിന്റെ നിർവചനം

തൗഹീദ് അഥവാ അല്ലാഹുവിനെ ഏകാനാക്കുക എന്നതിനെ പണ്ഡിതന്മാർ പ്രധാനമായും വിഭചിച്ചത്  താഴെ കൊടുത്ത മൂന്ന് വിഭാഗങ്ങൾ ആയിക്കൊണ്ടാണ്.

1. രക്ഷാ കർതൃത്വത്തിൽ ഉള്ള ഏകത്വം (തൗഹീദ് റുബൂബിയ്യ)

2. ആരാധ്യതയിൽ ഉള്ള ഏകത്വം (തൗഹീദ് ഉലൂഹിയ്യ)
3. നാമവിശേഷണങ്ങളിൽ ഉള്ള  ഏകത്വം (തൗഹീദ് അസ്മാഇ വ സ്വിഫാത്തി )

الأول: توحيد الربوبية: وهو- إفراد الله - سبحانه وتعالى - بالخلق، والملك، والتدبير

النوع الثاني: توحيد الألوهية وهو - إفراد الله - سبحانه وتعالى - بالعبادة 

النوع الثالث: توحيد الأسماء والصفات وهو - إفراد الله - سبحانه وتعالى - بما سمى الله به نفسه، ووصف به نفسه في كتابه أو على لسان رسوله، صَلَّى اللَّهُ عَلَيْهِ وَسَلَّمَ، وذلك بإثبات ما أثبته من غير تحريف، ولاتعطيل، ومن غير تكييف، ولا تمثيل

"ഒന്നാമത്തേത് : തൗഹീദ് റുബൂബിയ്യ: അതായത് പരിശുദ്ധനും ഉന്നതനും ആയ അല്ലാഹുവിനെ സൃഷ്ടിപ്പിലും, രാജാധികാരത്തിലും, സർവ്വ നിയന്ത്രണത്തിലും പ്രത്യേകം ആക്കുക. 

രണ്ടാമത്തെ വിഭാഗം: തൗഹീദ് ഉലൂഹിയ്യ: അതായത് പരിശുദ്ധനും ഉന്നതനും ആയ അല്ലാഹുവിനെ ആരാധനയിൽ പ്രത്യേകം ആക്കുക.

മൂന്നാമത്തെ വിഭാഗം: തൗഹീദ് അസ്മാഇ വ സ്വിഫാത്തി. അതായത് പരിശുദ്ധനും ഉന്നതനും ആയ അല്ലാഹുവിനെ, അവൻ അവനെ യാതൊന്ന് വിളിച്ചുവോ, അവന്റെ ഗ്രന്ഥത്തിലും (ഖുർആനിലും) അവന്റെ ദൂതന്റെ നാവുകൊണ്ടും അവനെ യാതൊന്ന് വിശേഷിപ്പിച്ചുവോ അതിൽ അവനെ പ്രത്യകം ആക്കുക. അപ്പ്രകാരം (സ്വന്തം വക) 'വിശദീകരണം' പറയാതെ, 'നിഷേധം' പറയാതെ, 'എങ്ങിനെ' എന്ന് പറയാതെ, 'ഉപമകൾ' പറയാതെ അവൻ (അല്ലാഹു) സ്ഥിരപ്പെടുത്തിയതിനെ സ്ഥിരപ്പെടുത്തൽ ആകുന്നു." - മജ്മൂഉ ഫതാവ,  ഇബ്നു ഉസൈമീൻ(റഹി).

മുകളിൽ പറഞ്ഞ മൂന്ന് വിഭാഗങ്ങളിൽ ഏതൊന്ന് എടുത്താലും അതിൽ എല്ലാം തന്നെ അല്ലാഹുവിന്റെ വിശിഷ്ടങ്ങളായ നാമവിശേഷണങ്ങളുടെ സാന്നിധ്യം നമുക്ക് കാണാം, അല്ലാഹുവിന്റെ നാമവിശേഷണങ്ങളുടെ സാന്നിധ്യം മാത്രമേ നമുക്ക് കാണുവാൻ സാധിക്കൂ.

തൗഹീദ് റുബൂബിയ്യയിൽ നമുക്ക് കാണുവാൻ സാധിക്കുന്നത് അല്ലാഹു മാത്രമാണ് സൃഷ്ടാവും, സംരക്ഷകനും, രാജാധികാരത്തിന്റെ ഉടയവനും, സംഹരിക്കുന്നവനും, സർവ്വനിയന്താവും എന്നത്പോലുള്ള, സർവ്വത്തിന്റെയും മേലുള്ള അല്ലാഹുവിന്റെ പരമാധികാരത്തെ കുറിക്കുന്ന നാമ-വിശേഷണങ്ങൾ ആകുന്നു.

ആരാധ്യതയിൽ ഉള്ള ഏകത്വത്തിൽ 'അൽ ഇലാഹ്' എന്ന അല്ലാഹുവിന്റെ നാമമാണ് പ്രധാനമായും കടന്നു വരുന്നത്. അല്ലാഹുവിൽ വിശ്വസിക്കുന്ന ആളുകളിൽ തന്നെ അധികപേരും പിഴച്ചുപോയി എന്ന് അല്ലാഹു തന്നെ (ഖുർആൻ 12:106) പറഞ്ഞ ഒരു സംഗതിയാണ് അല്ലാഹുവിന്റെ ആരാധ്യതയിൽ ഉള്ള ഏകത്വം എന്നത്. 

അല്ലാഹുവിന്നു മാത്രം അവകാശപെട്ട, പരിശുദ്ധ ഖുർആനും, തിരുസുന്നത്തും ആരാധ്യതയുടെ ഭാഗമായി എന്തെല്ലാം പഠിപ്പിച്ചുവോ അത് അല്ലാഹുവിന്നു മാത്രം വകവെച്ചു കൊടുക്കുമ്പോൾ മാത്രമാണ് 'അൽ ഇലാഹ്' എന്ന നാമ-വിശേഷണം അല്ലാഹുവിന്ന് മാത്രം വകവെച്ചുകൊടുക്കുന്നവനായി ഒരു വിശ്വാസി ആകുക.

അപ്പോൾ തൗഹീദ് അഥവാ അല്ലാഹുവിനെ ഏകാനാക്കൽ സംഭവിക്കുന്നത്‌ ഏതെല്ലാം കാര്യങ്ങളിൽ അല്ലാഹു പ്രത്യേകം ആയോ, അത് മുഴുവനും അല്ലാഹുവിന്ന് മാത്രം വകവെച്ചുകൊടുക്കുമ്പോൾ ആകുന്നു. 

മനുഷ്യന്റെയോ, മലക്കിന്റെയോ, ജിന്നിന്റെയോ, ഏതെങ്കിലും ഒരു സ്രിഷ്ടിയുടെയോ കഴിവിലോ / പ്രവർത്തനത്തിലോ അല്ല അല്ലാഹു പ്രത്യേകം ആയത്. അല്ലാഹുവിന്റെ ഏതെങ്കിലും കഴിവുകൾക്കോ ഏതെങ്കിലും പ്രവർത്തനങ്ങൾക്കോ അവന്റെ സൃഷ്ടികളുമായി യാതൊരു സാമ്യതയോ, തുല്യതയോ, ഉപമയോ ഇല്ല,  لَيْسَ كَمِثْلِهِ شَيْءٌ അഥവാ അവനെ പോലെ ഒന്നും ഇല്ല.

ശിർക്ക് 

തൗഹീദ് എന്താണെന്നു ഒരാൾ കൃത്ത്യമായി മനസ്സിലാക്കിയാൽ, ശിർക്ക് എന്താണെന്നു വളരെ എളുപ്പത്തിൽ മനസ്സിലാക്കാവുന്നതാണ്. തൗഹീദിന്റെ നേരെ വിപരീധമാണ് ശിർക്ക്.

'ശരിക്ക' എന്ന അറബി പദത്തിൽനിന്നുമാണ് 'ശിർക്ക്' എന്ന പദം വന്നത്. 'ശരിക്ക' എന്നാൽ പങ്കുചേർത്തു എന്നാണു അർത്ഥം. വിഷയവുമായി ബന്ധപെട്ടു പറയുമ്പോൾ 'ശിർക്ക്' എന്നാൽ അല്ലാഹുവിന്റെ എകത്വത്തിൽ പങ്കുചേർക്കൽ എന്നാകുന്നു.

ഈമാനിന്റെ വിപരീധം കുഫ്ർ എന്ന പോലെ, ഹലാലിന്റെ വിപരീധം ഹറാം എന്ന പോലെ, സുന്നത്തിന്റെ വിപരീധം ബിദ്അത്ത് എന്ന പോലെ തൗഹീദിന്റെ വിപരീധം ആകുന്നു ശിർക്ക്.

 إن ضد هذا التوحيد هو الشرك بالله عز وجل، فإن كل شيء له ضد، والضد يبين بالضد 

فالشرك بالله عز وجل، هو ضد التوحيد الذي بعث الله به الرسل عليهم الصلاة والسلام

"തൗഹീദിന്റെ വിപരീധം എന്നാൽ അത് മഹത്വമുള്ളവനും, പ്രതാപവാനുമായ അല്ലാഹുവിൽ പങ്കുചേർക്കുക എന്നതാണ്. തീർച്ചയായും എല്ലാ കാര്യത്തിന്നും വിപരീധം ഉണ്ട്. വിപരീധം വിപരീധം കൊണ്ട് വ്യക്തമാകുന്നു...  

മഹത്വമുള്ളവനും, പ്രതാപവാനുമായ അല്ലാഹുവിൽ പങ്കുചേർക്കുക എന്നാൽ അത് ദൂദന്മാർ മുഖേന അല്ലാഹു അയച്ച തൗഹീദിന്റെ വിപരീധം ആകുന്നു." - മജ്മൂഉ ഫതാവ, ഇബ്നു ബാസ് (റഹി).

ആദിയിൽ ഏകനിൽ ഏകനായ, തന്റെ മുഴുവൻ നാമവിശേഷണങ്ങളിലും പരിപൂർണ്ണനായ, തന്റെ സർവാധികാരത്തിന്റെ ഒരംശം പോലും ആരുമായും പങ്കുവെക്കില്ല എന്ന് അല്ലാഹു തന്നെ പറഞ്ഞ, മുഇജിസത്തുകളിലൂടെയും പങ്കുവെക്കാത്ത, സൃഷ്ടികളുമായി യാതൊരു സാമ്യതയും ഇല്ലാത്ത അല്ലാഹുവിന്റെ ഏതെങ്കിലും കഴിവിലോ, പ്രവർത്തനത്തിലൊ ഉള്ള ഏതെങ്കിലും ഒന്നോ, ഒന്നിന്റെ അംശമോ അവന്റെ ഏതെങ്കിലും ഒരു സൃഷ്ടിയിൽ ഉണ്ട് എന്ന വിശ്വാസമോ പ്രവർത്തനമോ ആണ് ശിർക്ക് എന്ന് പറയുന്നത്.

ഈ വിഷയത്തിന്റെ ഒന്ന് മുതൽ നാല് വരെ ഉള്ള ഭാഗങ്ങളിൽ പരിശുദ്ധ ഖുർആനിന്റെയും, അതിനെ പണ്ഡിതന്മാർ വിശദീകരിച്ചതിന്റെ അടിസ്ഥാനത്തിലും പറഞ്ഞ തൗഹീദിന്റെ വിവിധ വശങ്ങളിൽ നിന്നും, അഞ്ചും ആറും ഭാഗങ്ങളിൽ പറഞ്ഞ തൗഹീദിന്റെ അടിസ്ഥാനങ്ങളിൽ നിന്നും ആണ് തൊട്ടു മുകളിൽ കൊടുത്ത ശിർക്കിന്റെ നിർവചനം വരുന്നത്.

അപ്പോൾ ശിർക്ക് എന്നുപറഞ്ഞാൽ അത് അല്ലാഹുവിന്റെ കഴിവും പ്രവർത്തനവുമായി ബന്ധപെട്ട  എന്നാൽ സൃഷ്ടിയുടെ കഴിവുമായോ പ്രവർത്തനവുമായോ ഒരു ബന്ധവും  ഇല്ലാത്ത ഒരു വിഷയം ആണ്. ഇത് വളരെ കൃത്ത്യമായി മനസ്സിലാക്കണം.

ഇനിയാണ് തൗഹീദും ശിർക്കുമായും ബന്ധപെട്ട സുപ്രധാനമായ വസ്തുതകൾ മനസ്സിലാക്കേണ്ടത്.

A. തൗഹീദിന്റെ നിർവചനം ആദിയിൽ പരിപൂർണ്ണം

ഒന്നാം ഭാഗത്ത് വളരെ കൃത്യമായി പറഞ്ഞ കാര്യമാണ്, സൃഷ്ടികൾ ഒന്നും തന്നെ ഇല്ലാത്ത അവസ്ഥയിൽ ആദിയിൽ ഉള്ളവനാണ് അല്ലാഹു എന്ന കാര്യം. രണ്ടാം ഭാഗത്ത് പറഞ്ഞ മറ്റൊരു കാര്യമാണ് ആദിയിൽ തന്നെ തന്റെ സർവ്വ നാമ-വിശേഷനങ്ങളിലും പ്രവർത്തനങ്ങളിലും അല്ലാഹു പരിപൂർണ്ണൻ ആയി എന്ന കാര്യം.

രണ്ടാം ഭാഗത്ത് വിശദീകരിച്ച, പരിശുദ്ധ ഖുർആൻ അദ്ധ്യായം 112ൽ വന്ന  'സ്വമദ്' എന്ന അല്ലാഹുവിന്റെ നാമ-വിശേഷണത്തെ വിശദീകരിച്ചുകൊണ്ട് മഹാനായ സ്വഹാബിവര്യൻ ഇബ്നു അബ്ബാസ്‌ (റ) പറഞ്ഞതിന്റെ പ്രസക്തമായ ഭാഗം ഇവിടെ ആവർത്തിക്കുന്നു -

 وَهُوَ الَّذِي قَدْ كَمُلَ فِي أَنْوَاعِ الشَّرَفِ وَالسُّؤْدُدِ، وَهُوَ اللَّهُ سُبْحَانَهُ، هَذِهِ صِفَتُهُ لَا تَنْبَغِي إِلَّا لَهُ، لَيْسَ لَهُ كُفْءٌ، وليس كمثله شيء، سبحان الله الواحد القهار

"വിവിധങ്ങളായ തന്റെ സർവാധികാരത്തിലും മന്യതയിലും എല്ലാം തന്നെ പരിപൂർണ്ണത ഉള്ളവൻ ആകുന്നു അവൻ. അവനാകുന്നു പരിശുദ്ധനായ അല്ലാഹു. ഈ പറഞ്ഞ വിശേഷണങ്ങൾ എല്ലാം തന്നെ അവൻ (അല്ലാഹു) അല്ലാത്ത യാതൊരാൾക്കും വകവെച്ച് കൊടുക്കുവാൻ പാടില്ല. അവന്നു തുല്യനായിട്ടു ഒരാളും തന്നെ ഇല്ല. അവനെ പോലെ എന്ന് പറയുവാൻ ഒരാളും തന്നെയില്ല. എല്ലാത്തിനേയും വെല്ലുന്ന, ഏകനായ അവൻ പരിശുദ്ധനാകുന്നു." - ഇബ്നു കസീർ(റഹി), ഖുർആൻ 112:1-2.

അതെ, ഉന്നതനും പ്രതാപവാനുമായ അല്ലാഹു, അവൻ അവന്നുണ്ട്‌ എന്ന് പറഞ്ഞ സകല കഴിവുകളിലും പ്രവർത്തനങ്ങളിലും, സകലമാന സർവാധികാരത്തിലും  ആദിയിൽ തന്നെ പരിപൂർണ്ണൻ ആയി.

ഇപ്പ്രകാരം അല്ലാഹു തന്റെ സകല കഴിവുകളിലും പ്രവർത്തനങ്ങളിലും പരിപൂർണ്ണൻ ആയിട്ടുണ്ടെങ്കിൽ, അല്ലാഹു തന്റെ ഏകത്വത്തിൽ ആദിയിൽ പരിപൂർണ്ണൻ ആയിട്ടുണ്ടെങ്കിൽ തൗഹീദിന്റെ നിർവചനവും ആദിയിൽ പരിപൂർണ്ണം ആയിട്ടുണ്ട്‌.

കാര്യം അങ്ങിനെയാണെങ്കിൽ -

• മനുഷ്യനെ സൃഷ്ടിച്ചപ്പോൾ, തൌഹീദിലേക്ക് പുതുതായി ഒന്നും വന്നിട്ടില്ല, തൗഹീദിന്റെ വിപരീധമായ ഷിർക്കിലേക്കും പുതുതായി ഒന്നും വന്നിട്ടില്ല.

• മലക്കിനെ സൃഷ്ടിച്ചപ്പോൾ, തൌഹീദിലേക്ക് പുതുതായി ഒന്നും വന്നിട്ടില്ല, തൗഹീദിന്റെ വിപരീധമായ ഷിർക്കിലേക്കും പുതുതായി ഒന്നും വന്നിട്ടില്ല.

• ജിന്നിനെ സൃഷ്ടിച്ചപ്പോൾ, തൌഹീദിലേക്ക് പുതുതായി ഒന്നും വന്നിട്ടില്ല, തൗഹീദിന്റെ വിപരീധമായ ഷിർക്കിലേക്കും പുതുതായി ഒന്നും വന്നിട്ടില്ല.

• ഏതെങ്കിലും ഒരു സൃഷ്ടിയെ സൃഷ്ടിച്ചപ്പോൾ, തൌഹീദിലേക്ക് പുതുതായി ഒന്നും വന്നിട്ടില്ല, തൗഹീദിന്റെ വിപരീധമായ ഷിർക്കിലേക്കും പുതുതായി ഒന്നും വന്നിട്ടില്ല.

അപ്പോൾ തൗഹീദിനെ കുറിച്ചും അതിന്റെ വിപരീധമായ ശിർക്കിനേയും കുറിച്ചും പഠിക്കുമ്പോൾ കടന്നുവരുന്നത്‌, അല്ല കടന്നുവരേണ്ടത് അല്ലാഹുവിന്റെ പരിശുദ്ധങ്ങളായ നാമവിശേഷണങ്ങളും അവന്റെ സാമ്യതയില്ലാത്ത പ്രവർത്തനങ്ങളും മാത്രം ആകുന്നു. സൃഷ്ടിക്കപ്പെടുകയും നശിപിക്കപ്പെടുകയും ചെയ്യുന്ന സൃഷ്ടികളുടെ കഴിവും  പ്രവർത്തനവും ഒന്നും തന്നെ തൗഹീദിന്റെയോ ശിർക്കിന്റെയോ ചർച്ചയിൽ ഒരു സ്ഥാനവും ഇല്ല. കാരണം സൃഷ്ടികൾ ഒന്നും തന്നെ ഇല്ലാത്ത ആദിയിൽ തൗഹീദ്  പരിപൂർണ്ണം ആയി.

ഇനി അതല്ല, മനുഷ്യനാകട്ടെ, മലക്കാകട്ടെ, ജിന്നാകട്ടെ, ഏതെങ്കിലും ഒരു സൃഷ്ടിയെ അല്ലാഹു സൃഷ്ടിച്ചപ്പോൾ പുതുതായി ഒരു കാര്യം തൗഹീദോ / ശിർക്കോ ആയി എന്ന് ഒരാൾ വാദിച്ചാൽ, തീർച്ചയായും ഒരു കേവല സൃഷ്ടിയുടെ കഴിവിന്നോ / പ്രവർത്തനത്തിന്നോ, അല്ലാഹുവിന്റെ കഴിവോ / പ്രവർത്തനമോ ആയി ഏതെങ്കിലും സാദ്രിശ്യം ഉണ്ട് എന്ന വളരെ അപകടംപിടിച്ച, പിഴച്ച വാദമാണ് ഉണ്ടാകുക. നാലാം ഭാഗത്ത് പറഞ്ഞ, ഇമാം ഇബ്നു കസീർ (റഹി) ഉദ്ധരിച്ച താക്കീത് ഒരിക്കൽക്കൂടി ഇവിടെ ഓർക്കേണ്ടതുണ്ട്.

بَلِ الْأَمْرُ كَمَا قَالَ الْأَئِمَّةُ -مِنْهُمْ نُعَيْم بْنُ حَمَّادٍ الْخُزَاعِيُّ شَيْخُ الْبُخَارِيِّ -: "مَنْ شَبَّهَ اللَّهَ بِخَلْقِهِ فَقَدْ كَفَرَ، وَمَنْ جَحَدَ مَا وَصَفَ اللَّهُ بِهِ نَفْسَهُ فَقَدْ كَفَرَ

"എന്നാൽ കാര്യം ഇമാം ബുഖാരിയുടെ ഉസ്താതായ നുഐമ്  ഇബ്നു ഹമ്മാദിനെ പോലുള്ള നേതാക്കൾ പറഞ്ഞത് പോലെയാണ്: - 'ആരെങ്കിലും അല്ലാഹുവിനെ, അവന്റെ സൃഷ്ടിയോട്‌ സാദ്രിശ്യപ്പെടുത്തിയാൽ അവൻ കാഫിറായി. ആരെങ്കിലും അല്ലാഹു അവനെ വിശേഷിപ്പിച്ചതിനെ നിഷേധിച്ചാൽ അവൻ കാഫിറായി.' അല്ലാഹുവും അവന്റെ ദൂദനും അവനെ (അല്ലാഹുവിനെ) വിശേഷിപ്പിച്ചതിൽ സദ്രിശ്യപ്പെടുത്തൽ ഇല്ല. "  ഇമാം ഇബ്നു കസീർ(റഹി), ഖുർആൻ 7:54.

അപ്പോൾ, ഒരു സൃഷ്ടിയെ അല്ലാഹു സൃഷ്ടിച്ചപ്പോൾ പുതുതായി ഒരു കാര്യം തൗഹീദോ / ശിർക്കോ ആയി എന്ന് വാദിക്കുന്ന ആൾ ആദ്യപടിയിൽ 'കാഫിർ' അഥവാ സത്യനിഷേധി ആയി. പിന്നീടു അയാൾ ചെന്നെത്തുന്നത് അല്ലാഹുവിന്ന് സമൻമാരെ സൃഷ്ടിക്കുന്ന, കാലാകാലം നരഗവാസം ഉറപ്പിക്കുന്ന കൊടിയ ശിർക്കിലെക്കാണ്, അല്ലാഹുവിൽ ശരണം, അല്ലാഹു അനുഗ്രഹിക്കുകയാണെങ്കിൽ അത് എങ്ങിനെ എന്ന് പറയാം.

اللهم إني أعوذ بك أن أشرك بك وأنا أعلم، وأستغفرك لما لا أعلم

"അല്ലാഹുവേ, അറിഞ്ഞു കൊണ്ട് നിന്നിൽ പങ്കുവെക്കുന്നതിൽ നിന്നും ഞാൻ നിന്നോട് രക്ഷ തേടുന്നു. എനിക്ക് അറിയാത്തതിനെ തൊട്ട് ഞാൻ നിന്നോട് പാപമോചനവും തേടുന്നു"

തുടരും, ഇന്ഷാ അല്ലാാഹു.

سُبْحَانَ رَبِّكَ رَبِّ الْعِزَّةِ عَمَّا يَصِفُونَ وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ 

പ്രതാപത്തിന്‍റെ നാഥനായ നിന്‍റെ രക്ഷിതാവ്‌ അവര്‍ ചമച്ചു പറയുന്നതില്‍ നിന്നെല്ലാം എത്ര പരിശുദ്ധന്‍! ദൂതന്‍മാര്‍ക്കു സമാധാനം! ലോകരക്ഷിതാവായ അല്ലാഹുവിന്‌ സ്തുതി!

അബൂ അബ്ദുൽ മന്നാൻ.
 ابو عبد المنان محمد نزامدين  ابن عبداللطيف

തൗഹീദും ശിർക്കും - ഭാഗം - 6

അസ്സലാമുഅലൈക്കും വ റഹ്മതുല്ലാഹി

പ്രിയ സഹോദരങ്ങളെ

ഏതൊരു കാര്യത്തിലാണ് ഉന്നതനും പ്രതാപവാനുമായ അല്ലാഹുവിനെ ഏകൻ ആക്കേണ്ടത് എന്നാണ് കഴിഞ്ഞ ഭാഗത്ത് പറഞ്ഞത്‌.

തീർച്ചയായും, ഏതൊരു വിശേഷണങ്ങളിൽ അവൻ സർവ്വഗുണ-സംബൂർണ്ണൻ ആയോ, ഏതൊരു പ്രവർത്തനങ്ങളിൽ  അവൻ സംബൂർണ്ണൻ ആയോ അതിൽ ആകുന്നു അല്ലാഹുവിനെ ഏകൻ ആക്കേണ്ടത്.

ആദിയിലോ, അവസാനത്തിലോ ഒരിക്കലും തന്നെ ഇല്ലാത്ത, സൃഷ്ടിക്കപ്പെടുകയും, നശിപ്പിക്കപ്പെടുകയും, തങ്ങളുടെ കഴിവുകളിൽ പരിധിയും, പരിമിധിയും ഒക്കെയുള്ള, മനുഷ്യന്റെയോ, മലക്കിന്റെയോ, ജിന്നിന്റെയോ, ഏതെങ്കിലും ഒരു സ്രിഷ്ടിയുടെയോ കഴിവുകളിലോ, പ്രവർത്തനങ്ങളിലോ അല്ല അല്ലാഹുവിനെ ഏകൻ ആക്കേണ്ടത് എന്നാണ് കഴിഞ്ഞ ഭാഗത്ത് സൂചിപിച്ചത്.

أنواع التوحيد بالنسبة لله عز وجل تدخل كلها في تعريف عام وهو إفراد الله سبحانه وتعالى بما يختص به 

"ഉന്നതനും പ്രതാപവാനുമായ അല്ലാഹുവുമായി ബന്ധപെട്ട തൗഹീദിന്റെ എല്ലാ നിർവചനങ്ങളും പൊതുവായ ഒരു നിർവചനത്തിൽ ഉൾകൊള്ളുന്നതാണ്. അതായത് അല്ലാഹുവിന്ന് പ്രത്യേകമായ കാര്യങ്ങളിൽ അവനെ മാത്രം തനിച്ചാക്കുക എന്നതാണ് ". - ഫതാവ ഇബ്നു ഉസൈമീൻ(റഹി).

അപ്പോൾ തൗഹീദിന്റെ എല്ലാ വശങ്ങളും കടന്നു വരുന്നത്, ഏതെല്ലാം കാര്യങ്ങളിൽ അല്ലാഹു തന്റെ സൃഷ്ടികളിൽ നിന്നും പ്രത്യേകം ആയോ, അതിൽ ആകുന്നു.

അതുകൊണ്ട് തന്നെ തൗഹീദ് അഥവാ അല്ലാഹുവിനെ ഏകാനാക്കൽ സംഭവിക്കുന്നത്‌, ഏതെല്ലാം കാര്യങ്ങളിൽ അല്ലാഹു തന്റെ സൃഷ്ടികളിൽ നിന്നും പ്രത്യേകം ആയോ അതിൽ അവനെ മാത്രം പ്രത്യേകം ആക്കുമ്പോൾ  ആകുന്നു.

ഏതൊക്കെയാണ് അല്ലാഹുവിന്ന് പ്രത്യേകം ആയ കാര്യങ്ങൾ?

അല്ലാഹുവിന്ന് പ്രത്യേകം ആയ കാര്യങ്ങൾ എന്നാൽ അത്  വളരെ വിശാലമായ രണ്ടു കാര്യങ്ങൾ ആകുന്നു.

ഒരിക്കൽ കൂടി ആവർത്തിച്ചു പറഞ്ഞാൽ,  ആ വിശാലമായ രണ്ടു കാര്യങ്ങളെ കുറിച്ചാണ് 'തൗഹീദ്' എന്ന് മറ്റൊരു പേരുള്ള, പരിശുദ്ധ ഖുർആൻ അദ്ധ്യായം 112ലെ ഒന്നാമത്തെ വചനത്തിൽ വന്ന അല്ലാഹുവിന്റെ നാമമായ 'അഹദ്'എന്ന നാമത്തെ വിശദീകരിച്ചുകൊണ്ട് ഇമാം ഇബ്നു കസീർ (റഹി) പറഞ്ഞത് -

 لِأَنَّهُ الْكَامِلُ فِي جَمِيعِ صِفَاتِهِ وَأَفْعَالِهِ

"അവൻ (അല്ലാഹു) അവന്റെ മുഴുവൻ വിശേഷണങ്ങളിലും പ്രവർത്തനങ്ങളിലും പരിപൂർണ്ണൻ ആകുന്നു. " - ഇബ്നു കസീർ(റഹി), ഖുർആൻ  112:1-2.

ഇത്തരുണത്തിൽ തൗഹീദ് അഥവാ അല്ലാഹുവിനെ ഏകൻ ആക്കുക എന്നതിന്റെ അടിസ്ഥാനങ്ങൾ എന്നാൽ  അത് അവന്റെ നാമ-വിശേഷണങ്ങളും, പ്രവർത്തനങ്ങളും ആകുന്നു .

C. തൗഹീദിന്റെ അടിസ്ഥാനം അല്ലാഹുവിന്റെ നാമ-വിശേഷണങ്ങൾ 

അല്ലാഹുവിന്റെ ഏകത്വത്തിന്റെ അടിസ്ഥാനം എന്നാൽ അത് അവന്റെ ഉന്നതങ്ങളായ, തുല്യത ഇല്ലാത്ത, സാദ്രിശ്യം ഇല്ലാത്ത, ആരുമായും പങ്കുവെക്കാത്ത, അതിനെ പോലെ എന്ന് പറയുവാൻ വേറെ ഒന്ന് ഇല്ലാത്ത, ഉന്നതവും, മഹത്വമേറിയതുമായ അവന്റെ നാമ-വിശേഷണങ്ങൾ ആകുന്നു. അല്ലാഹു പറയുന്നു -

"അല്ലാഹുവിന്‌ ഏറ്റവും നല്ല നാമങ്ങൾ ഉണ്ട്. അതിനാല്‍ ആ നാമങ്ങളിൽ അവനെ നിങ്ങള്‍ വിളിച്ചുകൊള്ളുക, അവന്‍റെ പേരുകളില്‍ കൃത്രിമം കാണിക്കുന്നവരെ നിങ്ങള്‍ വിട്ടുകളയുക. അവര്‍ ചെയ്തു വരുന്നതിന്‍റെ ഫലം അവര്‍ക്കു വഴിയെ നല്‍കപ്പെടും." - ഖുർആൻ  7:180.

തൗഹീദ് അഥവാ അല്ലാഹുവിന്റെ ഏകത്വം, അത് മനസ്സിലാക്കേണ്ടത് അല്ലാഹിവിന്റെ നാമങ്ങൾ പ്രതിനിധാനം ചെയ്യുന്ന  വിശേഷണങ്ങൾ മനസ്സിലാക്കിക്കൊണ്ടായിരിക്കണം. അത് അതേപടി അങ്ങീകരിക്കുക, അത് സൃഷ്ടികളിൽ ഒരാൾക്കും വകവെച്ചുകൊടുക്കാതെ, അല്ലാഹുവിന്നു മാത്രം വകവെച്ചുകൊടുക്കുക, ആ പരിശുദ്ധങ്ങളായ നാമങ്ങൾകൊണ്ട്   അവന്റെ വിളിച്ചു പ്രാർത്ഥിക്കുക.

ഈ വചനത്തിന്റെ വിശദീകരണത്തിൽ, പണ്ഡിതന്മാരിൽ ബഹുഭൂരിഭാഗവും ചർച്ച ചെയ്ത, ഇമാം ബുഖാരി(റഹി)യും ഇമാം മുസ്ലിം(റഹി)യും അവരുടെ സ്വഹീഹുകളിൽ കൊടുത്ത ഒരു ഹദീസിൽ നബി(സ) പറയുന്നു -

"തീർച്ചയായും അല്ലാഹുവിന്നും തൊണൂറ്റി ഒൻപത് നാമങ്ങൾ ഉണ്ട്, നൂറിൽ ഒന്ന് കുറവ്. ആരെങ്കിലും അത് ശരിയാവണ്ണം പഠിച്ചാൽ,അവൻ സ്വർഗത്തിൽ പ്രവേശിച്ചു" - ബുഖാരി, മുസ്ലിം.

എന്നാൽ അല്ലാഹുവിന്റെ നാമങ്ങൾ തൊണൂറ്റി ഒൻപതിൽ പരിമിധമല്ലെന്നും, അതിന്റെ എണ്ണത്തിന്  കൃത്ത്യമായ ഒരു കണക്ക്  നമ്മുടെ പക്കൽ ഇല്ലെന്നും, അല്ലാഹുവിന്റെ പക്കൽ മാത്രമാണ് അതിന്റെ യഥാർത്ത വിവരമെന്നും, മറ്റു ഹദീസുകളെ ഉദ്ധരിച്ചുകൊണ്ട് ഇമാം ഇബ്നു കസീർ(റഹി)യെ പോലെ ഉള്ള പ്രാമാണികരായ പണ്ഡിതന്മാർ വിശദീകരിക്കുന്നുണ്ട്.

അല്ലാഹുവിന്റെ നാമവിശേഷണങ്ങളുടെ എണ്ണം അത് എത്രതന്നെ ആയായാലും അതിൽ എല്ലാം തന്നെ അവന്റെ ഏകത്വം ആദിയിൽ തന്നെ പരിപൂർണ്ണമായി, ഇന്നും പരിപൂർണ്ണം, സൃഷ്ടികൾ എല്ലാം നശിച്ചതിന്നു ശേഷം, അവസാനത്തിലും പരിപൂർണ്ണം. അല്ലാഹുവിന്റെ ഏകത്വത്തിലേക്ക് ഒന്നും കൂട്ടുവാനോ ഒന്നും കുറക്കുവാനോ ഇല്ല, ഒരിക്കലും ഇല്ല.

അങ്ങിനെ, അല്ലാഹു അവന്നാകുന്നു എന്ന് പറഞ്ഞ നാമവിശേഷണങ്ങളും, പ്രവർത്തനങ്ങളും അവന്നു മാത്രം വകവെച്ചുകൊടുക്കുമ്പോൾ  ആണ് തൗഹീദ് അഥവാ 'അല്ലാഹുവിനെ ഏകനാക്കൽ' സംഭവിക്കുന്നത്‌.

سَمَّى اللَّهُ سُبْحَانَهُ أَسْمَاءَهُ بِالْحُسْنَى لِأَنَّهَا حَسَنَةٌ فِي الْأَسْمَاعِ وَالْقُلُوبِ، فَإِنَّهَا تَدُلُّ عَلَى تَوْحِيدِهِ وَكَرَمِهِ وَجُودِهِ وَرَحْمَتِهِ وَإِفْضَالِهِ.

"പരിശുദ്ധനായ അല്ലാഹു അവന്റെ നാമങ്ങളെ നല്ലത് എന്നാണ് വിളിച്ചിരിക്കുന്നത്, കാരണം അത് ഹ്രിദയങ്ങൾക്കും കേൾവികൾക്കും നല്ലതാണ്. തീർച്ചയായും അതറിയിക്കുന്നത് അവന്റെ ഏകത്വവും, അവന്റെ മാന്യതയും, അവന്റെ വിശാല-ഗുണവും, അവന്റെ കാരുണ്യവും, അവന്റെ ഔദാര്യവും ആകുന്നു." - ഇമാം ഖുർത്വുബി(റഹി), ഖുർആൻ 7:180.

അതെ, അല്ലാഹുവിന്റെ നാമ-വിശേഷണങ്ങൾ അറിയിക്കുന്നത് അവന്റെ ഏകത്വം ആകുന്നു.

അതുകൊണ്ട് തന്നെയാണ് തൗഹീദിന്റെ അടിസ്ഥാനം എന്നാൽ അത് അല്ലാഹുവിന്റെ, സാദ്രിശ്യം ഇല്ലാത്ത, തുല്യത ഇല്ലാത്ത, ആരുമായും പങ്കുവെക്കാത്ത, അതിനെ പോലെ എന്ന് പറയുവാൻ വേറെ ഒന്ന് ഇല്ലാത്ത ഉന്നതവും, മഹത്വമേറിയതുമായ അവന്റെ നാമ-വിശേഷണങ്ങൾ ആകുന്നു എന്ന് പറയുന്നത്.

കാര്യം അങ്ങിനെയാണെങ്കിൽ -

• അല്ലാഹു 'പരമകാരുണ്യകൻ' ആകുന്നു എന്ന് പറഞ്ഞാൽ അത് അവന്നു മാത്രം വകവെച്ചു കൊടുക്കുന്നതാണ് തൗഹീദ്.

• അല്ലാഹു 'എല്ലാം കേൾക്കുന്നവൻ' ആകുന്നു എന്ന് പറഞ്ഞാൽ അത് അവന്നു മാത്രം വകവെച്ചു കൊടുക്കുന്നതാണ് തൗഹീദ്.

• അല്ലാഹു 'എല്ലാം കാണുന്നവൻ' ആകുന്നു എന്ന് പറഞ്ഞാൽ അത് അവന്നു മാത്രം വകവെച്ചു കൊടുക്കുന്നതാണ് തൗഹീദ്.

• അല്ലാഹു അവന്നുണ്ട്‌ എന്ന് പറഞ്ഞ ഏതെല്ലാം 'നാമ-വിശേഷണങ്ങൾ' ഉണ്ടോ, അതെല്ലാം തന്നെ അവന്നു മാത്രം വകവെച്ചു കൊടുക്കുന്നതാണ് തൗഹീദ്.

അതേസമയം -

• മനുഷ്യന്ന് കേൾവിയും, കാഴ്ചയും ഉണ്ടെങ്കിൽ ആ കഴിവ്   അല്ലാഹുവിന്ന്  മാത്രം വകവെച്ചുകൊടുക്കുന്നത് അല്ല തൗഹീദ്.

• നിശ്ചയിക്കപ്പെട്ട  മലക്കുകൾ  മനുഷ്യൻ പ്രവൃത്തിക്കുന്നത് അറിയുന്നു എന്ന്  പറഞ്ഞാൽ, മലക്കുകളുടെ ആ കഴിവ്  അല്ലാഹുവിന്ന്  മാത്രം വകവെച്ചുകൊടുക്കുന്നത് അല്ല തൗഹീദ്.

• ജിന്നുകൾ,   മനുഷ്യന്ന് അങ്ങോട്ട്‌ കാണാതെ, മനുഷ്യനെ ഇങ്ങോട്ട്  കാണുന്നു എന്ന് പറഞ്ഞാൽ, ജിന്നുകളുടെ ആ കഴിവ് അല്ലാഹുവിന്ന് മാത്രം വകവെച്ചുകൊടുക്കുന്നത് അല്ല തൗഹീദ്.

മനുഷ്യന്റെയോ, മലക്കിന്റെയോ, ജിന്നിന്റെയോ, ഏതെങ്കിലും സൃഷ്ടികളുടെയോ കഴിവുകളിൽ അല്ല അല്ലാഹുവിനെ ഏകൻ ആക്കേണ്ടത് കാരണം, നാലാം ഭാഗത്ത് വളരെ കൃത്യമായി സൂചിപ്പിച്ച പോലെ  അല്ലാഹുവിന്റെ കഴിവിന്ന് സൃഷ്ടികളുടെ കഴിവുമായി സാദ്രിശ്യം ഇല്ല, അല്ലാഹുവിന്റെ കഴിവ് സൃഷ്ടികളുടെ കഴിവ് പോലെ അല്ല, അല്ലാഹുവിന്റെ കഴിവുകൾക്ക് സൃഷ്ടികളിൽ ഉപമ ഇല്ല.

D. തൗഹീദിന്റെ അടിസ്ഥാനം അല്ലാഹുവിന്റെ പ്രവർത്തനങ്ങൾ

അല്ലാഹുവിന്റെ നാമ-വിശേഷനങ്ങളോടൊപ്പം വരുന്ന തൗഹീദിന്റെ രണ്ടാമത്തെ അടിസ്ഥാന കാര്യമാണ് അല്ലാഹുവിന്റെ പ്രവർത്തനങ്ങൾ.

പരിശുദ്ധ ഖുർആനിലും നബി(സ)യുടെ ഹദീസുകളിലും അല്ലാഹുവിന്റെ വിവിധങ്ങളായ പ്രവർത്തനങ്ങളെ കുറിച്ച് ധാരാളം കാണാവുന്നതാണ്. അത്തരം പ്രവർത്തനങ്ങൾ എങ്ങിനെയാണ് ഒരു സത്യവിശ്വാസി മനസ്സിലാക്കേണ്ടത് എന്നും, എന്തൊരു നിലപാടാണ് അതിനോട് ഒരു സത്യവിശ്വാസി സ്വീകരിക്കേണ്ടത് എന്നും ഒക്കെ അത് വിശദീകരിച്ച പണ്ഡിതന്മാർ വളരെ കൃത്യമായി നമുക്ക് പറഞ്ഞു തന്നിട്ടുണ്ട്.

وَأَنَّ الْمَسْلَكَ الْأَسْلَمَ فِي ذَلِكَ طَرِيقَةُ السَّلَفِ إِمْرَارُ مَا جَاءَ فِي ذَلِكَ مِنَ الْكِتَابِ وَالسُّنَّةِ مِنْ غَيْرِ تَكْيِيفٍ وَلَا تَحْرِيفٍ وَلَا تَشْبِيهٍ وَلَا تَعْطِيلٍ وَلَا تَمْثِيلٍ

"സലഫുകളുടെ (മുൻഗാമികളുടെ) പാതയാണ് ഇത്തരം കാര്യങ്ങൾ സൂക്ഷ്മതയോടുകൂടി മനസ്സിലാക്കുന്നതിനുള്ള വഴി. അവരുടെ വഴി എന്നാൽ, ഖുർആനിലും നബിചര്യയിലും എന്തെലാം വന്നോ, അത്  'എങ്ങിനെ' എന്ന് പറയാതെ, (സ്വന്തം വക) 'വിശദീകരണം' പറയാതെ, (സൃഷ്ടികളോട് ) 'സാദ്രിശ്യം' പറയാതെ, 'നിഷേധം' പറയാതെ, 'ഉപമകൾ' പറയാതെ സ്വീകരിക്കൽ ആകുന്നു " - ഇമാം ഇബ്നു കസീർ(റഹി), ഖുർആൻ 20:5-8.

അല്ലാഹുവിന്റെ പ്രവർത്തനങ്ങളിൽ ഒന്നായ  اسْتَوَى നെ അഥവാ  സിംഹാസനത്തിൽ ഉള്ള ആരോഹണത്തെ കുറിച്ച് വിശദീകരിക്കുന്നിടത്ത്, അല്ലാഹുവിന്റെ പ്രവർത്തനങ്ങളോട് മുൻഗാമികൾ സ്വീകരിച്ച നിലപാട് എന്താണ് എന്നാണ് മഹാനായ ഇമാം ഇബ്നു കസീർ (റഹി)  വിശദീകരിച്ചത്.

• അല്ലാഹു തന്റെ ദാസനോട്  'നേരിട്ട് സംസാരിച്ചു' എന്ന് പറഞ്ഞാൽ അത് അവന്റെ സൃഷ്ടികളുടെ സംസാരവുമായി സാദ്രിശ്യപ്പെടുത്താതെ, തുലനം ചെയ്യാതെ, അല്ലാഹുവിന്നു മാത്രം യോജിച്ച രീതിയിൽ അവൻ സംസാരിച്ചു എന്ന് വകവെച്ചുകൊടുക്കുന്നതാകുന്നു തൗഹീദ്.

• അല്ലാഹു 'ഒന്നാം ആകാശത്തേക്ക് ഇറങ്ങി വരും' എന്ന് പറഞ്ഞാൽ അത് അവന്റെ സൃഷ്ടികളുടെ ഇറക്കവുമായി സാദ്രിശ്യപ്പെടുത്താതെ, തുലനം ചെയ്യാതെ, അല്ലാഹുവിന്നു മാത്രം യോജിച്ച രീതിയിൽ അവൻ ഇറങ്ങുന്നു എന്ന് വകവെച്ചുകൊടുക്കുന്നതാകുന്നു തൗഹീദ്.

• അല്ലാഹു തന്റെ 'തന്റെ അടിമയുടെ പ്രവർത്തനം കണ്ടുകൊണ്ടിരിക്കുന്നു' എന്ന് പറഞ്ഞാൽ അത് അവന്റെ സൃഷ്ടികളുടെ കാഴ്ചയുമായി സാദ്രിശ്യപ്പെടുത്താതെ, തുലനം ചെയ്യാതെ, അല്ലാഹുവിന്നു മാത്രം യോജിച്ച രീതിയിൽ അവൻ കാണുന്നു എന്ന് വകവെച്ചുകൊടുക്കുന്നതാകുന്നു തൗഹീദ്.

مَذْهَب أهل السّنة وَالْجَمَاعَة أَن أَفعَال الله تَعَالَى لَا تقاس بِأَفْعَال عباده وَلَا تدخل تَحت شرائع عُقُولهمْ القاصرة بل أَفعاله لَا تشبه أَفعَال خلقه وَلَا صِفَاته صفاتهم وَلَا ذَاته ذواتهم لَيْسَ كمثله شَيْء وَهُوَ السَّمِيع الْبَصِير

"അഹ്ലു സുന്നത്ത് വൽ ജമാത്തിന്റെ നിലപാട് എന്തെന്നാൽ, തീർച്ചയായും ഉന്നതനായ അല്ലാഹുവിന്റെ പ്രവർത്തനങ്ങൾ അവന്റെ അടിമയുടെ പ്രവർത്തനങ്ങളുമായി തുലനം ചെയ്യൽ ഇല്ല, പരിമിധമായ അവരുടെ ബുദ്ധിയിൽ അത് പ്രവേശിക്കുക ഇല്ല. 

അവന്റെ പ്രവർത്തനങ്ങൾ എന്നാൽ, അതിന്ന് അവന്റെ സൃഷ്ടികളുടെ പ്രവർത്തനങ്ങളുമായി സാദ്രിശ്യം ഇല്ല, അവന്റെ വിശേഷണം അവരുടെ വിശേഷണം അല്ല, അവന്റെ സത്ത അവരുടെ സത്തകൾ (പോലെ) അല്ല, അവനെ പോലെ ഒന്നും ഇല്ല, അവൻ എല്ലാം കേൾക്കുന്നവനും കാണുന്നവനും ആകുന്നു " - ഇമാം ഇബ്നു ഖയ്യിം(റഹി), مفتاح دار السعادة

കാര്യം അങ്ങിനെയാണെങ്കിൽ -

• മനുഷ്യൻ  എന്തെങ്കിലും ഒരു കാര്യം പ്രവൃത്തിച്ചാൽ  അത് അല്ലാഹുവിന്ന് മാത്രം വകവെച്ചുകൊടുക്കുന്നത് അല്ല തൗഹീദ്.

• മലക്കിന്ന്  ആകാശ ലോകത്ത്  സഞ്ചരിക്കുവാൻ സാധിക്കും എങ്കിൽ ആ പ്രവർത്തനം  അല്ലാഹുവിന്നു മാത്രം വകവെച്ചുകൊടുക്കുന്നത് അല്ല തൗഹീദ്.

• ജിന്നിന്ന്  കടലിൽ നിന്നും മുത്തും പവിഴവും കൊണ്ടുവരുവാൻ സാധിക്കും എങ്കിൽ ആ പ്രവർത്തനം   അല്ലാഹുവിന്നു മാത്രം വകവെച്ചുകൊടുക്കുന്നത് അല്ല തൗഹീദ്.

• ഏതെങ്കിലും ഒരു സൃഷ്ടിയുടെ എന്തെങ്കിലും  ഒരു പ്രവർത്തനം  അല്ലാഹുവിന്നു മാത്രം വകവെച്ചുകൊടുക്കുന്നത് അല്ല തൗഹീദ്.

ഏതൊരു പ്രവർത്തനങ്ങളിൽ അല്ലാഹുവിന്നു അവന്റെ സൃഷ്ടികളുമായി ഒരു സാമ്യത ഇല്ലയോ, ഉപമ ഇല്ലയോ, തുലനം ചെയ്യൽ ഇല്ലയോ,  അത് അല്ലാഹുവിന്നു മാത്രം വകവെച്ചുകൊടുക്കുമ്പോൾ ആണ് തൗഹീദ് അഥവാ അല്ലാഹുവിനെ എകനാക്കൽ ഒരാളുടെ ജീവിതത്തിൽ ഉണ്ടാകുന്നത്.

എന്നാൽ ഈ പറഞ്ഞതിന്ന് വിരുദ്ധമായി,  മനുഷ്യന്റെയോ, മലക്കിന്റെയോ, ജിന്നിന്റെയോ, ഏതെങ്കിലും സൃഷ്ടികളുടെയോ കഴിവുകളിൽപെട്ടതോ / പ്രവര്‍ത്തനങ്ങളിൽ പെട്ടതോ ആയത് അല്ലാഹുവിന്ന് മാത്രം വകവെച്ച് കൊടുക്കുന്നത് തൗഹീദിന്റെ ഭാഗം ആണ് എന്ന് ഒരാൾ വാദിച്ചാൽ, തീർച്ചയായും അയാൾ അല്ലാഹുവിന്റെ കൂടെ അവന്റെ സൃഷ്ടിയേയും ഏകനാക്കി, അല്ലാഹുവിൽ ശരണം.

• ആദിയിലും അവസാനത്തിലും  സര്‍വ്വഗുണ-സമ്പൂര്‍ണ്ണമായ അല്ലാഹഹുവിന്റെ നാമങ്ങളെ പറ്റി അലാഹു തന്നെ പറയുന്നു وَلِلَّهِ الْأَسْمَاءُ الْحُسْنَى അഥവാ  'അല്ലാഹുവിന്‌ ഏറ്റവും നല്ല നാമങ്ങൾ ഉണ്ട്' എന്ന്.

• ആദിയിലും അവസാനത്തിലും സര്‍വ്വഗുണ-സമ്പൂര്‍ണ്ണമായ അല്ലാഹഹുവിന്റെ നാമങ്ങളെ പറ്റിയും അവന്റെ പ്രവർത്തനങ്ങളെ  പറ്റിയും  അലാഹു തന്നെ പറയുന്നു لَيْسَ كَمِثْلِهِ شَيْءٌ അഥവാ 'അവനെ പോലെ ഒന്നും ഇല്ല' എന്ന്.

അല്ലാഹു അവന്നുണ്ട്‌ എന്ന് പറയാത്ത, ആദിയിൽ ഇല്ലാത്ത, അവസാനത്തിലും ഇല്ലാത്ത, സൃഷ്ടിക്കപ്പെടുകയും, നശിപ്പിക്കപ്പെടുകയും ചെയ്യുന്ന, പരിധിയും, പരിമിധിയും, ന്യൂനതകളും ഒക്കെ ഉള്ള മനുഷ്യന്റെയോ, ജിന്നിന്റെയോ, മലക്കിന്റെയോ, ഏതെങ്കിലും സൃഷ്ടിയുടെയോ കഴിവുകളിൽ പെട്ടതോ, പ്രവർത്തനങ്ങളിൽ പെട്ടതോ ആയത്, അല്ലാഹുവിന്റെ ഏകത്വത്തിന്റെ അഥവാ തൗഹീദിന്റെ ഭാഗാമാണ് എന്ന് ഒരാൾ വാദിച്ചാൽ, തീർച്ചയായും അയാൾ അല്ലാഹുവിന്റെ കൂടെ അവന്റെ സൃഷ്ടിയേയും ഏകനാക്കിയവൻ ആയി, അങ്ങിനെ അയാൾ  അല്ലാഹുവിന്റെ ഏകത്വത്തിൽ അവന്റെ സൃഷ്ടിയെ പങ്കാളിയാക്കിയവൻ ആയി , അങ്ങിനെ അയാൾ അല്ലാഹുവിന്ന് സമൻമാരെ ഉണ്ടാക്കിയവൻ ആയി, അല്ലാഹുവിൽ ശരണം. 

തുടരും ഇൻഷാ അല്ലാഹു

سُبْحَانَ رَبِّكَ رَبِّ الْعِزَّةِ عَمَّا يَصِفُونَ وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ 

പ്രതാപത്തിന്‍റെ നാഥനായ നിന്‍റെ രക്ഷിതാവ്‌ അവര്‍ ചമച്ചു പറയുന്നതില്‍ നിന്നെല്ലാം എത്ര പരിശുദ്ധന്‍! ദൂതന്‍മാര്‍ക്കു സമാധാനം! ലോകരക്ഷിതാവായ അല്ലാഹുവിന്‌ സ്തുതി!

അബൂ അബ്ദുൽ മന്നാൻ

 ابو عبد المنان محمد نزامدين  ابن عبداللطيف

തൗഹീദും ശിർക്കും - ഭാഗം - 5

​അസ്സലാമുഅലൈക്കും വ റഹ്മതുല്ലാഹി 

പ്രിയപ്പെട്ട സഹോദരങ്ങളെ,

കഴിഞ്ഞ നാല് ഭാഗങ്ങളിൽ പറഞ്ഞത് തൗഹീദ് എന്ന നമ്മുടെ വിഷയത്തിന്റെ വളരെ അടിസ്ഥാനപരമായ, കാതലായ ഭാഗങ്ങൾ ആകുന്നു. അവകൾ  താഴെ കൊടുക്കുന്നു.

A. ആദിയിലും അവസാനത്തിലും ഉള്ളവൻ അല്ലാഹു.

B. ആദിയിൽ ഏകൻ ആയവനും, തന്റെ മുഴുവൻ നാമവിശേഷണങ്ങളിലും പ്രവർത്തനങ്ങളിലും പരിപൂർണ്ണനായവൻ അല്ലാഹു.

C. ആദിയിൽ പരിപൂർണ്ണമായ തന്റെ ഏകത്വവും സർവാധികാരവും ഒരിക്കലും പങ്കുവെക്കാത്തവൻ  അല്ലാഹു. 

D. മുഇജിസത്തുകളിലൂടെ തന്റെ രാജാധികാരം പങ്കുവെക്കാത്തവൻ അല്ലാഹു.

E. തന്റെ എകത്വത്തിന്നു സൃഷ്ടികളുമായി യാതൊരു സാമ്യതയും  ഇല്ലാത്തവൻ അല്ലാഹു.

ഈ പറഞ്ഞ കാര്യങ്ങളിൽ ഓരോന്നും മനസ്സിലാക്കേണ്ട രീതിയിൽ മനസ്സിലാക്കിയില്ലെങ്കിൽ അതിന്റെ പര്യാവസാനം കുഫുറും,  അല്ലാഹു ഒരിക്കലും പൊറുക്കാത്ത ശിർക്കും ആയിരിക്കും എന്നത് ഓരോ ആളുകളും വളരെ ഗൌരവമായി കാണേണ്ടതാകുന്നു.

ഇതുവരെ പറഞ്ഞ മർമ്മപ്രധാനമായ കാര്യങ്ങളുടെ വെളിച്ചത്തിൽ ആണ്  തൗഹീദ് എന്നാൽ എന്താണ് എന്നും എങ്ങിനെയാണ് പണ്ഡിതന്മാർ തൗഹീദിനെ നിർവചിച്ചത്  എന്നും മനസ്സിലാക്കേണ്ടത്.

തൗഹീദ് 

"വഹ്ഹദ" എന്ന അറബി പദത്തിൽനിന്നുമാണ് 'തൗഹീദ്' എന്ന പദം വന്നത്. 'വഹ്ഹദ' എന്നാൽ അതിനർത്ഥം 'എകനാക്കി' എന്നതാണ്. അങ്ങിനെവരുമ്പോൾ ഉയർന്നു വരുന്ന രണ്ടു സുപ്രധാനമായ ചോദ്യങ്ങളാണ് ആരെയാണ് ഏകൻ ആകേണ്ടത്? എന്തിലാണ് ഏകൻ ആകേണ്ടത് ?

A. ഏകാനാക്കേണ്ടത് ആരെ ?

ഒരു സംശയവും ഇല്ല, ആദിയിലും അവസാനത്തിലും സർവ്വഗുണ സംബൂർണ്ണൻ ആയ അല്ലാഹുവിനെ ആകുന്നു ഏകാനാക്കേണ്ടത് , അവനെ മാത്രം ആകുന്നു ഏകാനാക്കേണ്ടത് .

'തൗഹീദ്' എന്ന് മറ്റൊരു പേരുള്ള പരിശുദ്ധ ഖുർആൻ അദ്ധ്യായം 112ലെ ആദ്യത്തെ രണ്ടു വചനങ്ങൾ ഇമാം ഇബ്നു കസീർ (റഹി) വിശദീകരിച്ചത് ഈ വിഷയത്തിന്റെ രണ്ടാം ഭാഗത്ത് പറഞ്ഞത് ഇവിടെ ഓർക്കണം.

"(നബിയേ) പറയുക: കാര്യം അല്ലാഹു ഏകനാണ്‌ എന്നതാകുന്നു. അല്ലാഹു സ്വാശ്രയനും ഏവര്‍ക്കും  ആശ്രയമായിട്ടുള്ളവനും ആകുന്നു." - ഖുർആൻ 112:1-2

يَعْنِي: هُوَ الْوَاحِدُ الْأَحَدُ، الَّذِي لَا نَظِيرَ لَهُ وَلَا وَزِيرَ، وَلَا نَدِيدَ وَلَا شَبِيهَ وَلَا عَدِيلَ، وَلَا يُطلَق هَذَا اللَّفْظُ عَلَى أَحَدٍ فِي الْإِثْبَاتِ إِلَّا عَلَى اللَّهِ، عَزَّ وَجَلَّ؛ لِأَنَّهُ الْكَامِلُ فِي جَمِيعِ صِفَاتِهِ وَأَفْعَالِهِ

"അതായത്, അവൻ (അല്ലാഹു) ഏകനിൽ ഏകനാകുന്നു. അവന്ന് തുണ ഇല്ല, അവന്ന് സഹായി ഇല്ല, അവന്ന് എതിരാളി ഇല്ല, അവന്ന് സമപ്പെടുത്തിനോക്കുവാൻ ഒരാളില്ല. ഈ വാക്ക് ( അൽ  അഹദ്) സർവ്വശക്തനും പ്രതാപവാനുമായ അല്ലാഹുവിനല്ലാതെ മറ്റാർക്കും ഒരിക്കലും വകവെച്ചുകൊടുക്കുവാൻ പാടില്ല, കാരണം, അവൻ (അല്ലാഹു) അവന്റെ മുഴുവൻ വിശേഷണങ്ങളിലും പ്രവര്ത്തനങ്ങളിലും പരിപൂർണ്ണൻ ആകുന്നു. " - ഇബ്നു കസീർ(റഹി), ഖുർആൻ  112:1-2.

അപ്പോൾ ഏകൻ ആക്കേണ്ടത്, ആദിയിൽ ഏകനിൽ ഏകനായ, തുണ ഇല്ലാത്ത, സഹായി ഇല്ലാത്ത, എതിരാളി ഇല്ലാത്ത, സമപ്പെടുത്തി നോക്കുവാൻ വേറെ ഒരാൾ ഇല്ലാത്ത, സർവ്വശക്തനും പ്രതാപവാനുമായ അല്ലാഹുവിനെ ആകുന്നു.

കാര്യം അങ്ങിനെയാണെങ്കിൽ -

• ഏകൻ ആക്കേണ്ടത്  ആദിയിലും അവസാനത്തിലും ഒരിക്കലും ഇല്ലാത്ത മനുഷ്യനെ അല്ല.

• ഏകൻ ആക്കേണ്ടത്  ആദിയിലും അവസാനത്തിലും ഒരിക്കലും ഇല്ലാത്ത മലക്കിനെ  അല്ല.

• ഏകൻ ആക്കേണ്ടത്  ആദിയിലും അവസാനത്തിലും ഒരിക്കലും ഇല്ലാത്ത ജിന്നിനെ  അല്ല.

• ഏകൻ ആക്കേണ്ടത്  ആദിയിലും അവസാനത്തിലും ഒരിക്കലും ഇല്ലാത്ത ഒരു  സൃഷ്ടിയെയും  അല്ല.

എന്നാൽ, ഏകൻ ആകേണ്ടത് മനുഷ്യനെയോ, മലക്കിനെയോ, ജിന്നിനെയോ, ഏതെങ്കിലും ഒരു സ്രിഷ്ടിയെയോ ആണ് എന്നാണ് ആരെങ്കിലും വാദിക്കുന്നത് എങ്കിൽ, അവരുടെ പര്യാവസാനം കാലാകാലം നരഗം ഉറപ്പിക്കുന്ന ശിർക്കാണ് എന്നത് ഇവിടെ വളരെ ഗൌരവമായി ഉണർത്തുകയാണ്. 

B. ഏകാനാക്കേണ്ടത്  ഏതൊരു കാര്യത്തിൽ  ?

ആദിയിലും അവസാനത്തിലും ഉള്ള അല്ലാഹുവിനെ ഏകൻ ആക്കേണ്ടത്, ഏതൊരു കഴിവുകളിലും പ്രവർത്തനങ്ങളിലും  അവൻ സർവ്വഗുണ സംബൂർണ്ണൻ ആയോ അതിൽ ആകുന്നു.

• ഏതൊരു നാമ-വിശേഷണങ്ങളിലും പ്രവർത്തനങ്ങളിലും അല്ലാഹു ആദിയിലും അവസാനത്തിലും ഏകൻ ആയോ, ആ നാമ-വിശേഷണങ്ങളിലും പ്രവർത്തനങ്ങളിലും ആണ് അല്ലാഹുവിനെ ഏകൻ ആക്കേണ്ടത്.

• ഏതൊരു നാമ-വിശേഷണങ്ങളിലും പ്രവർത്തനങ്ങളിലും അവന്നു തുല്യനായിട്ടു ഒരാളും തന്നെ ഇല്ലയോ, ആ നാമ-വിശേഷണങ്ങളിലും പ്രവർത്തനങ്ങളിലും ആണ് അല്ലാഹുവിനെ ഏകൻ ആക്കേണ്ടത്.

• ഏതൊരു നാമ-വിശേഷണങ്ങളിലും പ്രവർത്തനങ്ങളിലും അവനെ പോലെ എന്ന് പറയുവാൻ ആരും ഇല്ലയോ, ആ നാമ-വിശേഷണങ്ങളിലും പ്രവർത്തനങ്ങളിലും ആണ് അല്ലാഹുവിനെ ഏകൻ ആക്കേണ്ടത്. 

• ഏതൊരു നാമ-വിശേഷണങ്ങളും പ്രവർത്തനങ്ങളും ആരുമായും അവൻ പങ്കുവേചില്ലയോ, ആ നാമ-വിശേഷണങ്ങളിലും പ്രവർത്തനങ്ങളിലും ആണ് അല്ലാഹുവിനെ ഏകൻ ആക്കേണ്ടത്.

അല്ലാഹുവിന്റെ ഒരു ഉന്നതമായ നാമമായ 'സ്വമദ്' എന്നതിനെ മഹാനായ സ്വഹാബിവര്യൻ ഇബ്നു അബ്ബാസ്‌ (റ) വിശദീകരിച്ചത്, രണ്ടാം ഭാഗത്ത് പറഞ്ഞതിന്റെ പ്രസക്തമായ വരികൾ ഇവിടെ ഓർക്കേണ്ടതുണ്ട്.

 وَهُوَ الَّذِي قَدْ كَمُلَ فِي أَنْوَاعِ الشَّرَفِ وَالسُّؤْدُدِ، وَهُوَ اللَّهُ سُبْحَانَهُ، هَذِهِ صِفَتُهُ لَا تَنْبَغِي إِلَّا لَهُ، لَيْسَ لَهُ كُفْءٌ، وليس كمثله شيء، سبحان الله الواحد القهار

"വിവിധങ്ങളായ തന്റെ സർവാധികാരത്തിലും മന്യതയിലും എല്ലാം തന്നെ പരിപൂർണ്ണത ഉള്ളവൻ ആകുന്നു അവൻ. അവനാകുന്നു പരിശുദ്ധനായ അല്ലാഹു. ഈ പറഞ്ഞ വിശേഷണങ്ങൾ എല്ലാം തന്നെ അവൻ (അല്ലാഹു) അല്ലാത്ത യാതൊരാൾക്കും വകവെച്ച് കൊടുക്കുവാൻ പാടില്ല. അവന്നു തുല്യനായിട്ടു ഒരാളും തന്നെ ഇല്ല. അവനെ പോലെ എന്ന് പറയുവാൻ ഒരാളും തന്നെയില്ല. എല്ലാത്തിനേയും വെല്ലുന്ന, ഏകനായ അവൻ പരിശുദ്ധനാകുന്നു." - ഇബ്നു കസീർ(റഹി), ഖുർആൻ 112:1-2.

അതെ, യാതൊരാൾക്കും വകവെച്ചു കൊടുക്കുവാൻ പാടില്ലാത്ത അല്ലാഹുവിന്റെ സർവ്വ കഴിവുകളിലും, പ്രവർത്തനങ്ങളിലും  ആകുന്നു തീർച്ചയായും അല്ലാഹുവിനെ ഏകൻ ആക്കേണ്ടത്.

കാര്യം അങ്ങിനെയാണെങ്കിൽ -

• അല്ലാഹുവിനെ ഏകൻ ആക്കേണ്ടത് സൃഷ്ടിക്കപ്പെടുകയും നശിപ്പിക്കപ്പെടുകയും ചെയ്യുന്ന മനുഷ്യന്റെ കഴിവുകളിലോ പ്രവർത്തനങ്ങളിലോ അല്ല.

• അല്ലാഹുവിനെ ഏകൻ ആക്കേണ്ടത് സൃഷ്ടിക്കപ്പെടുകയും നശിപ്പിക്കപ്പെടുകയും ചെയ്യുന്ന മലക്കിന്റെ കഴിവുകളിലോ പ്രവർത്തനങ്ങളിലോ അല്ല.

• അല്ലാഹുവിനെ ഏകൻ ആക്കേണ്ടത് സൃഷ്ടിക്കപ്പെടുകയും നശിപ്പിക്കപ്പെടുകയും ചെയ്യുന്ന ജിന്നിന്റെ കഴിവുകളിലോ പ്രവർത്തനങ്ങളിലോ അല്ല. 

• അല്ലാഹുവിനെ ഏകൻ ആക്കേണ്ടത് സൃഷ്ടിക്കപ്പെടുകയും നശിപ്പിക്കപ്പെടുകയും ചെയ്യുന്ന ഒരു സൃഷ്ടിയുടെയും ഏതെങ്കിലും കഴിവുകളിലോ പ്രവർത്തനങ്ങളിലോ അല്ല.

എന്നാൽ, ആദിയിലോ, അവസാനത്തിലോ ഒരിക്കലും ഇല്ലാത്ത, സൃഷ്ടിക്കപ്പെടുകയും, നശിപ്പിക്കപ്പെടുകയും ചെയ്യുന്ന മനുഷ്യന്റെയോ, ജിന്നിന്റെയോ, മലക്കിന്റെയോ, ഏതെങ്കിലും ഒരു സ്രിഷ്ടിയുടെയോ കഴിവിലോ, പ്രവർത്തനത്തിലൊ ആണ് അല്ലാഹുവിനെ ഏകൻ ആക്കേണ്ടത് എന്ന് ഒരാൾ വാദിച്ചാൽ, അത് അല്ലാഹുവിന്റെ കഴിവോ, പ്രവർത്തനമോ അവന്റെ സൃഷ്ടികളിൽ ആരോപിക്കുന്നതിനു തുല്യമാണ്, അത് പര്യാവസാനിക്കുന്നത് കാലാകാലം നരഗം ഉറപ്പിക്കുന്ന ശിർക്കിലെക്കാണ്, അല്ലാഹുവിൽ ശരണം.

ആദിയിൽ സർവ്വഗുണ സംബൂർണ്ണമായ, ആരുമായും ഒരിക്കലും പങ്കുവെക്കാത്ത, മുഇജിസത്തുകളിലൂടെ ഒരിക്കലും പങ്കുവെക്കാത്ത,  ആരുമായും ഒരു സാദ്രിശ്യവും ഇല്ലാത്ത, ആരുമായും ഒരു തുല്യതയും ഇല്ലാത്ത, അവനെ പോലെ എന്ന് പറയുവാൻ ഒരാൾ ഇല്ലാത്ത  അല്ലാഹുവിന്റെ അപാരമായ, അനന്തമായ കഴിവുകളിലും പ്രവർത്തനങ്ങളിലും ആകുന്നു ഉന്നതനും, പ്രതാപവാനുമായ അല്ലാഹുവിനെ ഏകൻ ആക്കേണ്ടത്.

ഇത്തരുണത്തിൽ അല്ലാഹുവിനെ ഏകാനാക്കുന്നതിന്റെ പേരാകുന്നു 'തൗഹീദ്'.

തുടരും ഇൻഷാ അല്ലാഹു

سُبْحَانَ رَبِّكَ رَبِّ الْعِزَّةِ عَمَّا يَصِفُونَ وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ 

പ്രതാപത്തിന്‍റെ നാഥനായ നിന്‍റെ രക്ഷിതാവ്‌ അവര്‍ ചമച്ചു പറയുന്നതില്‍ നിന്നെല്ലാം എത്ര പരിശുദ്ധന്‍! ദൂതന്‍മാര്‍ക്കു സമാധാനം! ലോകരക്ഷിതാവായ അല്ലാഹുവിന്‌ സ്തുതി!

അബൂ അബ്ദുൽ മന്നാൻ

 ابو عبد المنان محمد نزامدين  ابن عبداللطيف

തൗഹീദും ശിർക്കും - ഭാഗം - 4

അസ്സലാമു അലൈക്കും വ റഹ്മതുല്ലാഹി

പ്രിയപ്പെട്ട സഹോദരങ്ങളെ

ഒന്നാം ഭാഗത്ത് സൂചിപ്പിച്ച പോലെ, ഒരാൾ 'ലാ ഇലാഹ ഇല്ലാ അല്ലാഹു' എന്ന് പ്രഖ്യാപിക്കുന്നതിന്നു മുൻപ്,  ഏതൊരു അല്ലാഹുവിനെ കുറിച്ചാണ് 'അവനല്ലാതെ ഒരു ആരാധ്യനും ഇല്ല' എന്ന സത്യസാക്ഷ്യം താൻ വഹിക്കുന്നത് എന്ന് വളരെ കൃത്യമായി അറിയേണ്ടതുണ്ട്.

കഴിഞ്ഞ മൂന്ന് ഭാഗങ്ങളിലും ആരാണ് ആ അല്ലാഹു എന്നതിനെ കുറിച്ചാണ് സുപ്രധാനമായ, അറിഞ്ഞില്ലെങ്കിൽ വിശ്വാസം അപകടത്തിൽ പെട്ടുപോകുന്ന ചില കാര്യങ്ങൾ പരിശുദ്ധ ഖുർആനിന്റെ വെളിച്ചത്തിൽ നമ്മൾ പറഞ്ഞത്.

ഇനിയും വളരെ പ്രാധാന്യത്തോട്കൂടി മനസ്സിലാക്കേണ്ട മറ്റൊരു സംഗതി ആണ് അല്ലാഹുവിന്റെ ഏകത്വത്തിനോ, അവന്റെ സർവ്വഗുണ സമ്പൂർണ്ണതക്കോ, സൃഷ്ടിക്കപ്പെടുകയും നശിപ്പിക്കപ്പെടുകയും ചെയ്യുന്ന കേവല സൃഷ്ടികളുമായി യാതൊരുവിധത്തിലും ഒരു  സാമ്യതയും ഒരിക്കലും ഇല്ല എന്നത്.

E. തന്റെ എകത്വത്തിന്നു സൃഷ്ടികളുമായി യാതൊരു സാമ്യതയും  ഇല്ലാത്തവൻ അല്ലാഹു

സൃഷ്ടികൾ ഒന്നും തന്നെ ഇല്ലാത്ത ആദിയിൽ പരിപൂര്‍ണ്ണമായ തന്റെ ഏകത്വവും ആ എകത്വത്തില്‍ പരിപൂർണ്ണമായ തന്റെ സര്‍വ്വഗുണ സമ്പൂര്‍ണ്ണതയും അല്ലാഹു  ഒരാളുമായും ഒരിക്കലും പങ്കുവെക്കില്ല എന്ന്‍ വളരെ വ്യക്തമായി.

അതേപോലെതന്നെ, മുഇജിസത്തുകൾ എന്നാൽ അത് അല്ലാഹുവിന്റെ അനുമതിയോടുകൂടി മാത്രം നടക്കുന്ന ഒന്നാണെന്നും, അതിൽ അല്ലാഹുവിന്റെ ഏകത്വത്തിന്റെ ഒരു അംശം പോലും പങ്കുവെക്കുന്ന പ്രശ്നം ഒരിക്കലും  ഇല്ല എന്നും പറഞ്ഞുകഴിഞ്ഞു.

ഇനി, തന്റെ ഏകത്വത്തിന്നും, സർവ്വഗുണ സമ്പൂർണ്ണതക്കും, ആരുമായും പങ്കുവെക്കാത്ത രാജാതിപത്യത്തിന്നും പിന്നീട് വന്ന സൃഷ്ടികളുമായി എന്തെങ്കിലും സാമ്യത ഉണ്ടോ?

രണ്ടാം ഭാഗത്ത്, 'തൗഹീദ്' എന്ന് മറ്റൊരു  പേരുള്ള പരിശുദ്ധ ഖുർആൻ അദ്ധ്യായം 112ലെ ഒന്നാം വചനമായ  "കാര്യം അല്ലാഹു ഏകനാണ്‌ എന്നതാകുന്നു" എന്നതിനെ വിശദീകരിച്ചുകൊണ്ട്  ഇമാം ഇബ്നു കസീർ(റഹി) പറഞ്ഞത് ഒരിക്കൽ കൂടി ഓർമിപ്പിക്കുന്നു.

 لِأَنَّهُ الْكَامِلُ فِي جَمِيعِ صِفَاتِهِ وَأَفْعَالِهِ

"അവൻ (അല്ലാഹു) അവന്റെ മുഴുവൻ വിശേഷണങ്ങളിലും പ്രവര്ത്തനങ്ങളിലും പരിപൂർണ്ണൻ ആകുന്നു. " - ഇബ്നു കസീർ(റഹി), ഖുർആൻ  112:1-2.

• യാതൊരു കഴിവില്‍ അല്ലാഹു ഏകാനായോ, ആ ഒരു കഴിവും പിന്നീട് വന്ന സൃഷ്ടിയുടെ ഒരു കഴിവും തമ്മില്‍ എന്തെങ്കിലും ഒരു സാമ്യം ഉണ്ടോ? ഒരിക്കലും ഇല്ല.

• യാതൊരു പ്രവൃത്തിയില്‍ അല്ലാഹു ഏകാനായോ, ആ ഒരു പ്രവൃത്തിയും സൃഷ്ടിയുടെ ഒരു പ്രവൃത്തിയും തമ്മില്‍ എന്തെങ്കിലും ഒരു സാമ്യം ഉണ്ടോ? ഒരിക്കലും ഇല്ല.

"ആകാശങ്ങളുടെയും ഭൂമിയുടെയും സ്രഷ്ടാവാകുന്നു ( അവന്‍. ) നിങ്ങള്‍ക്ക്‌ വേണ്ടി നിങ്ങളുടെ വര്‍ഗത്തില്‍ നിന്നു തന്നെ അവന്‍ ഇണകളെ ( ഉണ്ടാക്കിത്തന്നിരിക്കുന്നു. ) അതിലൂടെ നിങ്ങളെ അവന്‍ സൃഷ്ടിച്ച്‌ വര്‍ധിപ്പിക്കുന്നു. അവനെ പോലെ യാതൊന്നുമില്ല. അവന്‍ എല്ലാം കാണുന്നവനും എല്ലാം കേള്‍ക്കുന്നവനുമാകുന്നു." - ഖുർആൻ 42:11.

لَيْسَ كَمِثْلِهِ شَيْءٌ أَيْ: لَيْسَ كَخَالِقِ الْأَزْوَاجِ كُلِّهَا شَيْءٌ؛ لِأَنَّهُ الْفَرْدُ الصَّمَدُ الَّذِي لَا نَظِيرَ لَهُ

" 'അവനെ പോലെ യാതൊന്നും ഇല്ല' അതായതു, എല്ലാ ഇണകളെയും  സൃഷ്ടിച്ചവനെ പോലെ ഒന്നും ഇല്ല കാരണം, അവൻ അതുല്യനും, സർവ്വാശ്രയനായ യജമാനനുമായ തുണ ഇല്ലാത്തവനും ആകുന്നു." - ഇമാം ഇബ്നു കസീർ(റഹി), ഖുർആൻ 42:11.

അതെ, എല്ലാ ഇണകളെയും സ്രിഷ്ടിച്ച അല്ലാഹുവിന്നു, അവന്റെ സൃഷ്ടികളുമായി കഴിവിലോ പ്രവൃത്തിയിലോ യാതൊരു സാമ്യതയും ഒരിക്കലും  ഇല്ല.

അമാനി മൗലവി(റഹി), ഒന്ന് കൂടി വിശദമാക്കുന്നു -

"ഇസ്ലാമിക വീക്ഷണത്തിൽ മൌലികപ്രദാനമായ ഒരു തത്വമാണ് لَيْسَ كَمِثْلِهِ شَيْءٌ (അവനെ പോലെ ഒരു വസ്തുവും ഇല്ല) എന്ന വാക്യം. അല്ലാഹുവിന്റെ പരിശുദ്ധ സത്തയിലാകട്ടെ, ഉൽക്രിഷ്ട്ട ഗുണങ്ങളിലാകട്ടെ, പ്രവർത്തനങ്ങളിൽ ആകട്ടെ, അധികാരാവകാശങ്ങളിലാകട്ടെ, അവനെപോലെ  - അവന്നു തുല്യമായതോ, കിടയത്തതോ യാതൊന്നും തന്നെ ഇല്ല." - അമാനി മൗലവി(റഹി), ഖുർആൻ 42:11.

അപ്പോൾ, സൃഷ്ടികളുടെ എന്തെങ്കിലും കഴിവിവോ പ്രവർത്തനമോ അല്ലാഹുവിന്റെ എന്തെങ്കിലും കഴിവുമായോ പ്രവർത്തനവുമായോ യാതൊരു സദ്രിശ്യമോ തുലനം ചെയ്യലോ ഒരിക്കലും സാധ്യം അല്ല.

I. അല്ലാഹുവിന്റെ ഇറക്കം     

അല്ലാഹുവിന്റെ ഒന്നാം ആകാശത്തേക്കുള്ള ഇറക്കവുമായി ബന്ധപ്പെട്ടുകൊണ്ട്‌ നബി (സ) പറഞ്ഞു -

"രാത്രിയുടെ മൂന്നിൽ ഒന്ന് ബാകിയാകുമ്പോൾ അല്ലാഹു ഒന്നാം ആകാശത്തേക്ക് ഇറങ്ങി വരും. എന്നിട്ട് പറയും 'ആരെങ്കിലും എന്നെ വിളിച്ചാൽ, ഞാൻ അവന്ന് ഉത്തരം നൽകും, ആരെങ്കിലും എന്നോട് ചോദിച്ചാൽ, ഞാൻ അവന്നു നൽകും, ആരെങ്കിലും എന്നോട് പാപമോചനം തേടിയാൽ, ഞാൻ അവന്നു പൊറുത്തു കൊടുക്കും.' " - ബുഖാരി, മുസ്ലിം.

ലൈലത്തുൽ ഖദ്റിന്റെ രാത്രിയിൽ മലക്കുകൾ ഇറങ്ങുന്നതിനെപറ്റി  അല്ലാഹു പറയുന്നു -

"മലക്കുകളും ആത്മാവും അവരുടെ രക്ഷിതാവിന്‍റെ എല്ലാകാര്യത്തെ സംബന്ധിച്ചുമുള്ള ഉത്തരവുമായി ആ രാത്രിയില്‍ ഇറങ്ങി വരുന്നു." ഖുർആൻ 97:4.

അല്ലാഹുവിന്റെ ഉന്നതിക്കും, പ്രതാപത്തിന്നും യോജിച്ച അവന്റെ  ഇറക്കവും, അവന്റെ സൃഷ്ടികളിൽ ഒന്നായ മലക്കുകളുടെ ഇറക്കവും തമ്മിൽ ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല.

II. അല്ലാഹുവിന്റെ കാഴ്ച   

നബി(സ)യെ ദ്രോഹിച്ച ഒരു മനുഷ്യന്റെ ചെയ്തിയെ അല്ലാഹു കാണുന്നുണ്ട് എന്നതിനെ കുറിച്ച് അല്ലാഹു പറയുന്നു - 

"അവന്‍ മനസ്സിലാക്കിയിട്ടില്ലേ, അല്ലാഹു കാണുന്നുണ്ടെന്ന് ?" ഖുർആൻ 96 :14.

അതേ അല്ലാഹു തന്നെ പറയുന്നു ശൈത്വാനും കൂട്ടരും മനുഷ്യരായ നിങ്ങളെ കണ്ടുകൊണ്ടിരിക്കുന്നു എന്ന്.

"തീര്‍ച്ചയായും അവനും (ശൈത്വാനും) അവന്‍റെ വര്‍ഗക്കാരും നിങ്ങളെ കണ്ടുകൊണ്ടിരിക്കും; നിങ്ങള്‍ക്ക്‌ അവരെ കാണാന്‍ പറ്റാത്ത വിധത്തില്‍. തീര്‍ച്ചയായും വിശ്വസിക്കാത്തവര്‍ക്ക്‌ പിശാചുക്കളെ നാം മിത്രങ്ങളാക്കി കൊടുത്തിരിക്കുന്നു." - ഖുർആൻ 7:27.

അല്ലാഹുവിന്റെ ഉന്നതിക്കും, പ്രതാപത്തിന്നും യോജിച്ച അവന്റെ കാഴ്ചയും, അവന്റെ സൃഷ്ടികളിൽ ഒന്നായ ജിന്നിന്റെ കാഴ്ചയും തമ്മിൽ ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല.

III. അല്ലാഹുവിന്റെ സംസാരം 

മൂസ നബിയുമായി അല്ലാഹു നേരിട്ട് നടത്തിയ സംസാരത്തെ കുറിച്ച് അല്ലാഹു പറയുന്നു -

"നിനക്ക്‌ നാം മുമ്പ്‌ വിവരിച്ചുതന്നിട്ടുള്ള ദൂതന്‍മാരെയും, നിനക്ക്‌ നാം വിവരിച്ചുതന്നിട്ടില്ലാത്ത ദൂതന്‍മാരെയും ( നാം നിയോഗിക്കുകയുണ്ടായി. ) മൂസായോട്‌ അല്ലാഹു നേരിട്ട്‌ സംസാരിക്കുകയും ചെയ്തു." - ഖുർആൻ 4:164.

ഇബ്രാഹീം നബിയുടെ അടുത്തേക്ക്‌ മനുഷ്യരൂപത്തിൽ വന്ന മലക്കുകളോട്, അദ്ദേഹം ചോദിച്ച ചോദ്യത്തെ കുറിച്ച്  അല്ലാഹു പറയുന്നു -

"അനന്തരം അദ്ദേഹം ധൃതിയില്‍ തന്‍റെ ഭാര്യയുടെ അടുത്തേക്ക്‌ ചെന്നു. എന്നിട്ട്‌ ഒരു തടിച്ച കാളക്കുട്ടിയെ ( വേവിച്ചു ) കൊണ്ടുവന്നു. എന്നിട്ട്‌ അത്‌ അവരുടെ അടുത്തേക്ക്‌ വെച്ചു. അദ്ദേഹം പറഞ്ഞു: നിങ്ങള്‍ തിന്നുന്നില്ലേ?" - ഖുർആൻ 51:26-27.

അല്ലാഹുവിന്റെ ഉന്നതിക്കും, പ്രതാപത്തിന്നും യോജിച്ച, അവന്റെ ഒരു സൃഷ്ടിയോടുള്ള അവന്റെ സംസാരവും, അവന്റെ സൃഷ്ടികളിൽ ഒന്നായ മനുഷ്യനും, അവന്റെ  മറ്റൊരു സൃഷ്ടിയായ മലക്കും തമ്മിലുള്ള സംസാരവും ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല.

ഇനിയും ഒരുപാട് ഇത്തരത്തിൽ ഉള്ള, അല്ലാഹുവിന്റെ കഴിവും, പ്രവർത്തനവും, അവന്റെ വിവിധങ്ങൾ ആയ സൃഷ്ടികളുടെ കഴിവും പ്രവർത്തനത്തെ കുറിച്ചും ഒക്കെ ഉദാഹരണങ്ങൾ പരിശുദ്ധ ഖുർആനിലും സ്വഹീഹായ ഹദീസുകളിലും നമുക്ക് കാണാവുന്നതാണ്. അവിടങ്ങളിൽ എല്ലാം തന്നെ അല്ലാഹുവിന്റെ ഏതെങ്കിലും കഴിവിന്ന് അവന്റെ സൃഷ്ടികളുടെ കഴിവുമായോ,   അല്ലാഹുവിന്റെ ഏതെങ്കിലും പ്രവർത്തനത്തിന്ന് അവന്റെ സൃഷ്ടികളുടെ പ്രവർത്തനവുമായോ ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല.

ഇത്തരുണത്തിൽ ഏതെങ്കിലും ഒരു സൃഷ്ടിയുടെ എന്തെങ്കിലും കഴിവിനോ പ്രവർത്തനത്തിനോ, ഏതൊരു കാര്യത്തിൽ അല്ലാഹു ആദിയിലും അവസാനത്തിലും സർവ്വഗുണ സംബൂർണ്ണൻ ആയോ, അതിന്നു യാതൊരു സാദ്രിശ്യവും ഇല്ല, "അല്ലാഹുവിനെ പോലെ" എന്ന് പറയുവാൻ വേറെ ആൾ ഇല്ല.

• അല്ലാഹുവിന്റെ ഉന്നതിക്കും പ്രതാപത്തിന്നും യോജിച്ച അവന്റെ ഏതെങ്കിലും ഒരു കഴിവോ, ഒരു പ്രവർത്തനമോ  അവന്റെ സൃഷ്ടിയായ മനുഷ്യന്റെ  ഏതെങ്കിലും കഴിവുമായോ / പ്രവർത്തനവുമായൊ  ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല.   

• അല്ലാഹുവിന്റെ ഉന്നതിക്കും പ്രതാപത്തിന്നും യോജിച്ച അവന്റെ ഏതെങ്കിലും ഒരു കഴിവോ, ഒരു പ്രവർത്തനമോ  അവന്റെ സൃഷ്ടിയായ മലക്കിന്റെ   ഏതെങ്കിലും കഴിവുമായോ / പ്രവർത്തനവുമായൊ ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല.   

• അല്ലാഹുവിന്റെ ഉന്നതിക്കും പ്രതാപത്തിന്നും യോജിച്ച അവന്റെ ഏതെങ്കിലും ഒരു കഴിവോ, ഒരു പ്രവർത്തനമോ  അവന്റെ സൃഷ്ടിയായ ജിന്നിന്റെ   ഏതെങ്കിലും കഴിവുമായോ / പ്രവർത്തനവുമായൊ ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല. 

• അല്ലാഹുവിന്റെ ഉന്നതിക്കും പ്രതാപത്തിന്നും യോജിച്ച അവന്റെ ഏതെങ്കിലും ഒരു കഴിവോ, ഒരു പ്രവർത്തനമോ അവന്റെ ഏതെങ്കിലും സൃഷ്ടിയുടെ, ഏതെങ്കിലും കഴിവുമായോ / പ്രവർത്തനവുമായൊ ഒരു തരത്തിലും തുല്യതയോ, സാദ്രിശ്യമോ ഒരിക്കലും ഇല്ല.

بَلِ الْأَمْرُ كَمَا قَالَ الْأَئِمَّةُ -مِنْهُمْ نُعَيْم بْنُ حَمَّادٍ الْخُزَاعِيُّ شَيْخُ الْبُخَارِيِّ -: "مَنْ شَبَّهَ اللَّهَ بِخَلْقِهِ فَقَدْ كَفَرَ، وَمَنْ جَحَدَ مَا وَصَفَ اللَّهُ بِهِ نَفْسَهُ فَقَدْ كَفَرَ". وَلَيْسَ فِيمَا وَصَفَ اللَّهُ بِهِ نَفْسَهُ وَلَا رَسُولَهُ تَشْبِيهٌ، فَمَنْ أَثْبَتَ لِلَّهِ تَعَالَى مَا وَرَدَتْ بِهِ الْآيَاتُ الصَّرِيحَةُ وَالْأَخْبَارُ الصَّحِيحَةُ، عَلَى الْوَجْهِ الَّذِي يَلِيقُ بِجَلَالِ اللَّهِ تَعَالَى، وَنَفَى عَنِ اللَّهِ تَعَالَى النَّقَائِصَ، فَقَدْ سَلَكَ سَبِيلَ الْهُدَى.

"എന്നാൽ കാര്യം ഇമാം ബുഖാരിയുടെ ഉസ്താതായ നുഐമ്  ഇബ്നു ഹമ്മാദിനെ പോലുള്ള നേതാക്കൾ പറഞ്ഞത് പോലെയാണ്: - 'ആരെങ്കിലും അല്ലാഹുവിനെ, അവന്റെ സൃഷ്ടിയോട്‌ സാദ്രിശ്യപ്പെടുത്തിയാൽ അവൻ കാഫിറായി. ആരെങ്കിലും അല്ലാഹു അവനെ വിശേഷിപ്പിച്ചതിനെ നിഷേധിച്ചാൽ അവൻ കാഫിറായി.' അല്ലാഹുവും അവന്റെ ദൂദനും അവനെ (അല്ലാഹുവിനെ) വിശേഷിപ്പിച്ചതിൽ സദ്രിശ്യപ്പെടുത്തൽ ഇല്ല. 

ഉന്നതനായ അല്ലാഹുവിന്റെ മഹത്വത്തിന്നു യോജിച്ച രീതിയിൽ, (ഖുർആൻ) വചനങ്ങളിലും  സ്വഹീഹായ (നബി) വചനങ്ങളിലും  വന്നതിനെ ആരെങ്കിലും സത്യപ്പെടുത്തുകയും അല്ലാഹുവിന്നു എന്തെങ്കിലും കുറവുണ്ട് എന്നതിനെ നിഷേധിക്കുകയും ചെയ്‌താൽ, തീർച്ചയായും അവൻ സന്മാർഗത്തിൽ പ്രവേശിച്ചു. " - ഇമാം ഇബ്നു കസീർ(റഹി), ഖുർആൻ 7:54. 

അല്ലാഹുവിന്റെ ഒരു ന്യൂനതയും ഇല്ലാത്ത, ഒരു കുറവും ഇല്ലാത്ത കഴിവുകളെ പറ്റിയും, അല്ലാഹുവിന്റെ ഉന്നതിക്കും പ്രതാപത്തിന്നും യോജിച്ച അവന്റെ പ്രവൃത്തികളിൽപെട്ട സിംഹാസത്തിലുള്ള ആരോഹണവും ഒക്കെ പരാമർശിച്ചുകൊണ്ട് മഹാനായ ഇമാം ഇബ്നു കസീർ(റഹി) പറയുന്നതാണ് തൊട്ട് മുകളിൽ ഉള്ളത്.

കാര്യം അങ്ങിനെയാണെങ്കിൽ -

• മനുഷ്യന്റെ ഏതെങ്കിലും കഴിവോ / പ്രവർത്തനമോ, അല്ലാഹുവിന്റെ ഏതെങ്കിലും കഴിവോ പ്രവർത്തനമോ ആയി എന്തെങ്കിലും ബന്ധമോ, സാദ്രിശ്യമോ ഉണ്ടെന്നു പറഞ്ഞവൻ കാഫിറായി.

• മലക്കിന്റെ ഏതെങ്കിലും കഴിവോ / പ്രവർത്തനമോ, അല്ലാഹുവിന്റെ ഏതെങ്കിലും കഴിവോ പ്രവർത്തനമോ ആയി എന്തെങ്കിലും ബന്ധമോ, സാദ്രിശ്യമോ ഉണ്ടെന്നു പറഞ്ഞവൻ കാഫിറായി.

• ജിന്നിന്റെ ഏതെങ്കിലും കഴിവോ / പ്രവർത്തനമോ, അല്ലാഹുവിന്റെ ഏതെങ്കിലും കഴിവോ പ്രവർത്തനമോ ആയി എന്തെങ്കിലും ബന്ധമോ, സാദ്രിശ്യമോ ഉണ്ടെന്നു പറഞ്ഞവൻ കാഫിറായി.

• ഏതെങ്കിലും ഒരു സൃഷ്ടിയുടെ ഏതെങ്കിലും കഴിവോ പ്രവർത്തനമോ, അല്ലാഹുവിന്റെ ഏതെങ്കിലും കഴിവോ പ്രവർത്തനമോ ആയി എന്തെങ്കിലും ബന്ധമോ, സാദ്രിശ്യമോ ഉണ്ടെന്നു പറഞ്ഞവൻ കാഫിറായി.

എന്റെ പ്രിയപ്പെട്ട സഹോദരങ്ങളെ, ഇതെഴുതുന്നത്, ആരെയെങ്കിലും 'കാഫിർ' എന്ന് വിളിക്കുവാൻ വേണ്ടി അല്ല. മറിച്ച്, സത്യവും അസത്യവും വേർതിരിക്കുന്ന "അൽ ഫുർഖാൻ" എന്ന് മറ്റൊരു പേർ ഉള്ള പരിശുദ്ധ ഖുർആനിൽ, അല്ലാഹുവും അവന്റെ തിരുനബി(സ)യും പറഞ്ഞുതന്ന പാതയിൽ നിന്നും വ്യതിചലിച്ച ആളുകളെ പറ്റി 'മുഷ്രിക്ക് ' എന്നും, 'കാഫിർ' എന്നും, 'വഴിപിഴച്ചവർ' എന്നും, 'തെമ്മാടികൾ' എന്നും, 'സ്വയം വിഡ്ഢി' എന്നും 'കഴുതകൾ' എന്നും 'നാൽകാലികളെക്കാൾ അധപതിച്ചവർ' എന്നും ഒക്കെയുള്ള പ്രയോഗങ്ങൾ നമുക്ക് കാണുവാൻ സാധിക്കും.

ഒരു സത്യവിശ്വാസിയെ സംബന്ധിച്ചിടത്തോളം ഇത്തരം മോശമായ വിശേഷണങ്ങളിൽ നിന്നെല്ലാം അവൻ വിട്ടു നിൽക്കുവാൻ പരമാവധി ശ്രമിക്കും, എന്തെങ്കിലും കക്ഷിത്വമോ വ്യക്തി വിരോധമോ അവനെ സത്യത്തിന്റെ മാർഗത്തിൽ നിന്നും വ്യതിചലിപ്പിക്കുക ഇല്ല തന്നെ.

അല്ലാഹുവിന്റെ ഏകത്വത്തിന്റെ ഭാഗമായ, അല്ലാഹു സർവ്വഗുണ സംബൂർണ്ണൻ ആയ അവന്റെ ഏതെങ്കിലും കഴിവോ പ്രവർത്തനമോ, അവന്റെ സൃഷ്ടികളിൽ ആരോപിക്കുന്നവർ അവസാനം ചെന്നെത്തുന്നത് അല്ലാഹുവിന്നു സമൻമാരെ ഉണ്ടാകുന്ന, ശാശ്വതമായയി നരഗത്തിലേക്ക് എത്തിക്കുന്ന ഷിർക്കിലേക്കാണ്. അല്ലാഹു അനുഗ്രഹിക്കുകയാണെകിൽ അത് എങ്ങിനെ എന്ന് പരിശുദ്ധ ഖുർആനിന്റെ വെളിച്ചത്തിൽ വഴിയെ നമുക്ക് മനസ്സിലാക്കാം.

പരിശുദ്ധ ഖുർആനും തിരുസുന്നത്തും മുന്നോട്ടു വെക്കുന്ന വിശ്വാസം എന്തെന്നാൽ  അത് അവിശ്വാസത്തിന്റെയും അന്ധവിശ്വാസത്തിന്റെയും മധ്യത്തിൽ ഉള്ള വിശ്വാസമാണ്. ആ വിശ്വാസത്തിൽ എറ്റവും പ്രാധാന്യമേറിയ അല്ലാഹുവിനെ കുറിച്ചുള്ള വളരെ ഉന്നതമായ, മഹത്വമേറിയ, തുലത്യയില്ലാത്ത വിശ്വാസ-ഭാഗങ്ങലിലൂടെയാണ് നമ്മൾ കടന്നു പോയിക്കൊണ്ടിരിക്കുന്നത്. നാളെ ഖബറിലും, പിന്നീട് അല്ലാഹുവിന്റെ കോടതിയിലും ഒറ്റക്ക് നിന്നുകൊണ്ട് മറുപടി പറയേണ്ടിവരുന്ന ആ ദിനത്തെ ഓർത്തുകൊണ്ട്‌ വിശ്വാസം ക്രമപ്പെടുത്തുക, അല്ലാഹു അനുഗ്രഹിക്കട്ടെ.

തുടരും, ഇന്ഷാ അല്ലാാഹു.

سُبْحَانَ رَبِّكَ رَبِّ الْعِزَّةِ عَمَّا يَصِفُونَ وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ 
പ്രതാപത്തിന്‍റെ നാഥനായ നിന്‍റെ രക്ഷിതാവ്‌ അവര്‍ ചമച്ചു പറയുന്നതില്‍ നിന്നെല്ലാം എത്ര പരിശുദ്ധന്‍! ദൂതന്‍മാര്‍ക്കു സമാധാനം! ലോകരക്ഷിതാവായ അല്ലാഹുവിന്‌ സ്തുതി!

അബൂ അബ്ദുൽ മന്നാൻ.
 ابو عبد المنان محمد نزامدين  ابن عبداللطيف

തൗഹീദും ശിർക്കും - ഭാഗം - 3

അസ്സലാമു അലൈക്കും വ റഹ്മതുല്ലാഹി

പ്രിയപ്പെട്ട സഹോദരങ്ങളെ

ആരാണ് ആദിയിൽ ഉള്ളവനായ അല്ലാഹു എന്നതിനെകുറിച്ചാണ് നമ്മൾ ചർച്ച ചെയ്യുന്നത്. ഇവിടെ പറയുന്ന മിക്കവാറും ഭാഗങ്ങളും തൊട്ട്മുൻപ് കഴിഞ്ഞ ഭാഗങ്ങളുടെ തുടർച്ച ആയിരിക്കും. 

കഴിഞ്ഞ ഭാഗത്ത് പറഞ്ഞ രണ്ടു കാര്യങ്ങളാണ് താഴെ കൊടുത്തിരിക്കുന്നത്.

A. സൃഷ്ടികൾ ഒന്നും തന്നെ ഇല്ലാത്ത അവസ്ഥയിൽ അഥവാ ആദിയിൽ അവന്റെ അനന്തമായ കഴിവുകളോട്  കൂടി അല്ലാഹു ഏകനിൽ ഏകനായി.

B. സൃഷ്ടികൾ ഒന്നും തന്നെ ഇല്ലാത്ത അവസ്ഥയിൽ അഥവാ ആദിയിൽ, അവന്റെ കഴിവുകൾ പരിപൂർണ്ണമാണ്. അല്ലാഹുവിന്റെ നാമവിശേഷണങ്ങളിൽ ഇനി ഒന്ന് കൂടുവാണോ കുറയുവാനോ ഇല്ല; അത് ആദിയിൽ പരിപൂർണ്ണം ആകുന്നു, ഇന്നും, എന്നും പരിപൂർണ്ണം ആകുന്നു. 

ആദിയിൽ പരിപൂർണ്ണമായ ഉന്നതനും മഹാനുമായ ആ അല്ലാഹുവിന്റെ അസ്ഥിത്വത്തെ സംബന്ധിച്ചു ചില സുപ്രധാനമായ കാര്യങ്ങൾകൂടി മനസ്സിലാക്കേണ്ടതുണ്ട്.

C. ആദിയിൽ പരിപൂർണ്ണമായ തന്റെ ഏകത്വവും സർവാധികാരവും ഒരിക്കലും പങ്കുവെക്കാത്തവൻ  അല്ലാഹു 

സൃഷ്ടികൾ ഒന്നും തന്നെ ഇല്ലാത്ത ആദിയിൽ അല്ലാഹുവിന്റെ ഏകത്വവും ആ ഏകത്വത്തിൽ  അവന്റെ സർവാധികാരവും പരിപൂർണ്ണമായി എന്ന് പറഞ്ഞുകഴിഞ്ഞു. ഇനി അല്ലാഹു അവന്റെ ഏതെങ്കിലും ഒരു നാമവിശേഷണമോ, ഒരു പ്രവർത്തനമോ, ഒരു കഴിവോ  അവന്റെ ഏതെങ്കിലും ഒരു സൃഷ്ടിയുമായി പങ്കു വെക്കുമോ ? ഇല്ല, ഒരിക്കലും ഇല്ല.

പരിശുദ്ധ ഖുർആൻ അസന്നിഗ്ദമായി, അർത്ഥ-ശങ്കക്ക് ഇടഇല്ലാത്ത വിധം, വളരെ വ്യക്തമായി പ്രഖ്യാപിച്ച കാര്യം ആകുന്നു ഇത്.

പരിശുദ്ധനും ഉന്നതനുമായ അല്ലാഹു ഒരിക്കലും തന്നെ തന്റെ ആധിപത്ത്യത്തിന്റെ ഒരു അംശവും ഒരാളുമായും ഒരു സന്ദർഭത്തിലും പങ്കുവെചിട്ടില്ല പങ്കു വെക്കുകയും ഇല്ല.

"സന്താനത്തെ സ്വീകരിച്ചിട്ടില്ലാത്തവനും, ആധിപത്യത്തില്‍ പങ്കാളിയില്ലാത്തവനും നിന്ദ്യതയില്‍ നിന്ന്‌ രക്ഷിക്കാന്‍ ഒരു രക്ഷകന്‍ ആവശ്യമില്ലാത്തവനുമായ അല്ലാഹുവിന്‌ സ്തുതി! എന്ന്‌ നീ പറയുകയും അവനെ ശരിയാംവണ്ണം മഹത്വപ്പെടുത്തുകയും ചെയ്യുക." - ഖുർആൻ 17:111.

فيكون عاجزا ذا حاجة إلى معونة غيره ضعيفا، ولا يكون إلها من يكون محتاجا إلى معين على ما حاول، ولم يكن منفردا بالمُلك والسلطان

"അങ്ങിനെയാണെങ്കിൽ (അല്ലാഹുവിന്നു  അവന്റെ  ആധിപത്യത്തില്‍ വല്ല പങ്കുകാരനും ഉണ്ടെങ്കിൽ), അവനെ കൂടാതെയുള്ള ദുർബലമായ ഒരു സഹായിയെ ആവശ്യമുള്ളവനാകും അവൻ. കാര്യസാധനം ആവശ്യമുള്ളവരുടെ കാര്യങ്ങൾ നിറവേറ്റികൊടുക്കുന്ന ആരാധ്യൻ ആകുകയില്ല അവൻ. രാജാധികാരത്തിലും അധീശത്തിലും അവൻ ഏകൻ ആകുകയും ഇല്ല." - ത്വബരി(റഹി), ഖുർആൻ  17:111.

കാര്യം വളരെ വ്യക്തമാണ്. അങ്ങിനെയങ്ങാനും ഒരു പങ്കുകാരൻ ഉണ്ടായിരുന്നെങ്കിൽ, അല്ലാഹു ഒരിക്കലും അരാധനക്കർഹൻ ആകുകയില്ല എന്നാണു ഇമാം ഇബ്നു ജരീർ അത്വബരി (റഹി) പരിശുദ്ധ ഖുർആൻ വചനത്തെ വിശദീകരിച്ചുകൊണ്ട് പറയുന്നത്.

അല്ലാഹു വീണ്ടും ആവർത്തിച്ചു പറയുന്നു- 

"ആകാശങ്ങളുടെയും ഭൂമിയുടെയും ആധിപത്യം അവനാകുന്നു. അവന്‍ സന്താനത്തെ സ്വീകരിച്ചിട്ടില്ല. ആധിപത്യത്തില്‍ അവന്ന്‌ യാതൊരു പങ്കാളിയും ഉണ്ടായിട്ടുമില്ല. ഓരോ വസ്തുവെയും അവന്‍ സൃഷ്ടിക്കുകയും, അതിനെ അവന്‍ ശരിയാംവണ്ണം വ്യവസ്ഥപ്പെടുത്തുകയും ചെയ്തിരിക്കുന്നു." - ഖുർആൻ 25:2.

അപ്പോൾ അല്ലാഹിവിന്റെ ആധിപത്യം അവന്റെ സകല സൃഷ്ടികളിൽനിന്നും ഉന്നതമാണ്, ആ ആധിപത്യത്തിൽ അവന്നു യാതൊരു പങ്കാളിയും ഇല്ലായിരുന്നു, ഇന്നും ഇല്ല, ഒരിക്കലും ഉണ്ടാകുകയും ഇല്ല.

D. മുഇജിസത്തുകളിലൂടെ തന്റെ രാജാധികാരം പങ്കുവെക്കാത്തവൻ അല്ലാഹു 

മനുഷ്യകുലത്തെ നേർമാർഗത്തിലേക്ക് നയിക്കുവാൻ വേണ്ടി അല്ലാഹു കാലാകാലങ്ങളിൽ അവന്റെ ദൂദന്മാരെ നിയോഗിച്ചിട്ടുണ്ട്. അവരുടെ പ്രവാചകത്വത്തിന്നു തെളിവായിക്കൊണ്ട് വിവിധങ്ങൾ ആയ മുഇജിസത്തുകൾ അഥവാ അൽഭുതകഴിവുകൾ അല്ലാഹു അവരിലൂടെ ജനങ്ങൾക്ക്‌ വേണ്ടി വെളിവാക്കിയിട്ടുണ്ട്.

• ആദിയിലും അവസാനത്തിലും സർവ്വ-ഗുണ സമ്പൂർണ്ണനായ അല്ലാഹുവിന്റെ കഴിവിൽനിന്നും എന്തെങ്കിലും ഒരു അംശം പങ്കുവെക്കുന്ന ഒരു സംഗതി അല്ല മുഇജിസത്തുകൾ.

മുകളിൽ സൂചിപ്പിച്ച പരിശുദ്ധ ഖുർആൻ വചനങ്ങൾ  17:111, 25:2 എന്നിവയിലൂടെ അല്ലാഹു വളരെ കൃത്യമായി വ്യക്തമാക്കിയ കാര്യമാണ്, അല്ലാഹു അവന്റെ രാജാധികാരം ഒരിക്കലും ഒരാളുമായും പങ്കുവെക്കില്ല എന്നത്.

I. മൂസ നബിക്ക്  അല്ലാഹു അവന്റെ രാജാധികാരം പങ്കു വെച്ചിട്ടില്ല

മുഇജിസത്തുകൾ എന്നാൽ അത് അല്ലാഹുവിന്റെ അനുമതിയോടുകൂടി മാത്രം നടക്കുന്നവയാകുന്നു. മൂസ നബി(അ)യുടെ മുഇജിസത്തുളെ കുറിച്ച് പറയുന്നിടത്ത് അല്ലാഹു പറയുന്നു -

"അദ്ദേഹം ( ഫിര്‍ഔനോട്‌ ) പറഞ്ഞു: കണ്ണുതുറപ്പിക്കുന്ന ദൃഷ്ടാന്തങ്ങളായിക്കൊണ്ട്‌ ഇവ ഇറക്കിയത്‌ ആകാശങ്ങളുടെയും ഭൂമിയുടെയും രക്ഷിതാവ്‌ തന്നെയാണ്‌ എന്ന്‌ തീര്‍ച്ചയായും നീ മനസ്സിലാക്കിയിട്ടുണ്ട്‌. ഫിര്‍ഔനേ, തീര്‍ച്ചയായും നീ നാശമടഞ്ഞവന്‍ തന്നെ എന്നാണ്‌ ഞാന്‍ കരുതുന്നത്‌." - ഖുർആൻ 17:102.

وأنهنّ من عند الله لا من عند غيره، إذ كنّ معجزات لا يقدر عليهنّ، ولا على شيء منهنّ سوى ربّ السموات والأرض، وهو جمع بصيرة.

"തീർച്ചയായും അവകൾ (മുഇജിസത്തുകൾ) അല്ലാഹുവിൽ നിന്നുള്ളതാണ്; അവനെ കൂടാതെ ഉള്ളവരിൽ നിന്നും അല്ല. തീർച്ചയായും മുഇജിസത്തുകൾക്കുമേൽ എന്തെങ്കിലും കഴിവോ, അതിൽ നിന്നും എന്തെങ്കിലും (ഒരു അംഷമോ) ഭൂമിയുടെയും ആകാശങ്ങളുടെയും രക്ഷിതാവിന്നു അല്ലാതെ ഇല്ല, അവൻ മുഴുവൻ (കാര്യങ്ങളെയും) കാണുന്നവനാകുന്നു  " - ഇമാം ത്വബരി(റഹി), ഖുർആൻ 17:102.

മുഇജിസത്തുകളുടെ കാര്യം അങ്ങിനെ ആണെങ്കില്‍, അതിനെക്കാള്‍ താഴ്‌ന്ന ശ്രേണിയില്‍ വരുന്ന കറാമാത്തുകളുടെ കാര്യവും അങ്ങിനെ തന്നെ.

II. ഈസ നബിക്ക്  അല്ലാഹു അവന്റെ രാജാധികാരം പങ്കു വെച്ചിട്ടില്ല 

മഹാനായ ഈസ(അ)ന്റെ മുഇജിസത്തുകളിൽപെട്ട വളരെ അല്‍ഭുതകരമായ മരിച്ചവരെ ജീവിപ്പിക്കുക എന്നതിനെ കുറിച്ച് പറയുമ്പോൾ  "നിങ്ങളുടെ രക്ഷിതാവിങ്കല്‍ നിന്നുള്ള ദൃഷ്ടാന്തവും" എന്നും  "അല്ലാഹുവിന്റെ അനുമതിയോടുകൂടി"എന്നുമൊക്കെ അല്ലാഹു വ്യക്തമാക്കിയത് വളരെ ശ്രദ്ധേയമാണ്.

"ഇസ്രായീല്‍ സന്തതികളിലേക്ക്‌ ( അവനെ ) ദൂതനായി നിയോഗിക്കുകയും ചെയ്യും. അവന്‍ അവരോട്‌ പറയും: ) നിങ്ങളുടെ രക്ഷിതാവിങ്കല്‍ നിന്നുള്ള ദൃഷ്ടാന്തവും കൊണ്ടാണ്‌ ഞാന്‍ നിങ്ങളുടെ അടുത്ത്‌ വന്നിരിക്കുന്നത്‌. പക്ഷിയുടെ ആകൃതിയില്‍ ഒരു കളിമണ്‍ രൂപം നിങ്ങള്‍ക്കു വേണ്ടി ഞാന്‍ ഉണ്ടാക്കുകയും, എന്നിട്ട്‌ ഞാനതില്‍ ഊതുമ്പോള്‍ അല്ലാഹുവിന്‍റെ അനുവാദപ്രകാരം അതൊരു പക്ഷിയായി തീരുകയും ചെയ്യും. അല്ലാഹുവിന്‍റെ അനുവാദപ്രകാരം ജന്‍മനാ കാഴ്ചയില്ലാത്തവനെയും പാണ്ഡുരോഗിയെയും ഞാന്‍ സുഖപ്പെടുത്തുകയും,  മരിച്ചവരെ ഞാന്‍ ജീവിപ്പിക്കുകയും ചെയ്യും." - ഖുർആൻ 3:49.

• ആത്മാവിനെ നൽകുന്നവൻ എന്നത് അല്ലാഹുവിന്നു മാത്രം യോജിച്ച വിശേഷണമാണ്.

• രോഗം സുഖപ്പെടുത്തുന്നവൻ എന്നത് അല്ലാഹുവിന്നു മാത്രം യോജിച്ച വിശേഷണമാണ്.

• മരിച്ചവരെ ജീവിപ്പിക്കുന്നവൻ എന്നതും അല്ലാഹുവിന്നു മാത്രം യോജിച്ച വിശേഷണമാണ്.

അപ്പോൾ, മഹാനായ ഈസ നബിക്ക് അല്ലാഹു ഒരിക്കലും തന്നെ, ആദിയിലും അവസാനത്തിലും സർവ്വഗുണ സമ്പൂർണ്ണമായ തന്റെ കഴിവിൽനിന്നും ഏതെങ്കിലും ഒരു കഴിവ് മുഇജിസത്തു എന്ന പേരിൽ നൽകിയിട്ടില്ല. മറിച്ചു, അവകൾ എല്ലാം തന്നെ അല്ലാഹുവിന്റെ അനുമതിയോടു കൂടി മാത്രം നടക്കുന്ന കാര്യങ്ങൾ ആകുന്നു.

III. സുലൈമാൻ നബിക്ക്  അല്ലാഹു അവന്റെ രാജാധികാരം പങ്കു വെച്ചിട്ടില്ല 

സുലൈമാൻ നബിക്ക് അല്ലാഹു നൽകിയ അൽഭുത കഴിവുകളെ പരാമർശിച്ചുകൊണ്ട് അല്ലാഹു തന്നെ പറയുന്നത്  "രക്ഷിതാവിന്‍റെ കല്‍പനപ്രകാരം" എന്നാണ്.

"സുലൈമാന്ന്‌ കാറ്റിനെയും ( നാം അധീനപ്പെടുത്തികൊടുത്തു. ) അതിന്‍റെ പ്രഭാത സഞ്ചാരം ഒരു മാസത്തെ ദൂരവും അതിന്‍റെ സായാഹ്ന സഞ്ചാരം ഒരു മാസത്തെ ദൂരവുമാകുന്നു. അദ്ദേഹത്തിന്‌ നാം ചെമ്പിന്‍റെ ഒരു ഉറവ്‌ ഒഴുക്കികൊടുക്കുകയും ചെയ്തു. അദ്ദേഹത്തിന്‍റെ രക്ഷിതാവിന്‍റെ കല്‍പനപ്രകാരം അദ്ദേഹത്തിന്‍റെ മുമ്പാകെ ജിന്നുകളില്‍ ചിലര്‍ ജോലി ചെയ്യുന്നുമുണ്ടായിരുന്നു." - ഖുർആൻ 34:12  

അപ്പോൾ, അല്ലാഹു അവന്റെ ദൂദന്മാർക്കു നൽകുന്ന അല്‍ഭുത ദ്രിഷ്ടാന്തങ്ങളിലൂടെ ഒരിക്കലും തന്നെ അവന്റെ രാജാധികാരത്തിന്റെ ഭാഗമായ എന്തെങ്കിലും ഒരു കഴിവ് അവന്റെ ഒരു സ്രിഷ്ടിയുമായും ഒരിക്കലും പങ്കുവെക്കില്ല, ആ സൃഷ്ടികൾ അല്ലാഹുവിനോട് ഏറവും അടുപ്പം സിദ്ധിച്ച അവന്റെ ദൂദന്മാർ ആയിരുന്നാൽ പോലും, കാരണം അല്ലാഹു പറയുന്നു "ആധിപത്യത്തില്‍ അവന്ന്‌ യാതൊരു പങ്കാളിയും ഉണ്ടായിട്ടുമില്ല" (25:2)  എന്ന്.

കാര്യം അങ്ങിനെയാണെങ്കിൽ -

• ആദിയിലും അവസാനത്തിലും സർവ്വഗുണ സമ്പൂർണ്ണനായ അല്ലാഹുവിന്റെ ഏതെങ്കിലും ഒരു കഴിവിൽ നിന്നും എന്തെങ്കിലും ഒന്ന് പങ്കുവെക്കുന്ന ഒന്നല്ല, മൂസ നബിയുടെ കക്ഷത്തിലൂടെയും കയ്യിലൂടെയും ഒക്കെ അല്ലാഹു കാണിച്ച അൽഭുതങ്ങൾ.

• ആദിയിലും അവസാനത്തിലും സർവ്വഗുണ സമ്പൂർണ്ണനായ അല്ലാഹുവിന്റെ ഏതെങ്കിലും ഒരു കഴിവിൽ നിന്നും എന്തെങ്കിലും ഒന്ന് പങ്കുവെക്കുന്ന ഒന്നല്ല, ഈസ നബിയിലൂടെ അല്ലാഹു രോഗം സുഖപ്പെടുത്തിയതും, മരിച്ചവരെ ജീവിപ്പിച്ചതും.

• ആദിയിലും അവസാനത്തിലും സർവ്വഗുണ സമ്പൂർണ്ണനായ അല്ലാഹുവിന്റെ ഏതെങ്കിലും ഒരു കഴിവിൽ നിന്നും എന്തെങ്കിലും ഒന്ന് പങ്കുവെക്കുന്ന ഒന്നല്ല, സുലൈമാൻ നബിക്ക് അല്ലാഹു കാറ്റിനെ കീഴ്പെടുത്തി കൊടുത്തതും, ജിന്നിനെ കീഴ്പെടുത്തി കൊടുത്തതും.

• ആദിയിലും അവസാനത്തിലും സർവ്വഗുണ സമ്പൂർണ്ണനായ അല്ലാഹുവിന്റെ ഏതെങ്കിലും ഒരു കഴിവിൽ നിന്നും എന്തെങ്കിലും ഒന്ന് പങ്കുവെക്കുന്ന ഒന്നല്ല, ഏതൊരു പ്രവാചകനിലൂടെയും അല്ലാഹു വെളിപ്പെടുത്തിയ ഏതൊരു അൽഭുതവും.

ഇനി അതല്ല, മുഇജിസത്തല്ലേ, അത് കൊണ്ട് അങ്ങിനെ ഒക്കെ ആവാം എന്നാണ്‌ ആരെങ്കിലും മനസ്സിലാക്കിയത് എങ്കിൽ, നിങ്ങൾ അറിയുക - അത് അല്ലാഹുവിന്നു പങ്കാളികളെ ഉണ്ടാക്കുന്ന പരിപാടി ആണ്, അത് ശാശ്വതമായ നരഗക്കുഴിയിലേക്ക് ഉള്ള വഴി ആകുന്നു. അല്ലാഹുവിൽ ശരണം.

സൃഷ്ടാവും, സംരക്ഷകനും, സര്‍വ്വ നിയന്താവുമായ, എന്തിന്നും കഴിവുള്ള, ഉന്നതനായ അല്ലാഹുവിന്റെ ഏകത്വവുമായി ബന്ധപെട്ട വളരെ സുപ്രധാനമായ ഭാഗങ്ങളിലൂടെയാണ് നമ്മള്‍ കടന്നു പോയിക്കൊണ്ടിരിക്കുന്നത്.

ഇഹലോകം സമ്പാധിക്കുവാന്‍ ഉപയോഗിക്കുന്ന അല്ലാഹു തന്ന ബുദ്ധി, പ്രമാണങ്ങളിലൂടെ, ബുദ്ധി തന്ന അല്ലാഹുവിനെ മനസ്സിലാക്കുവാന്‍ ഉപയോഗപ്പെടുത്തുക!

തുടരും, ഇന്ഷാ അല്ലാാഹു.

سُبْحَانَ رَبِّكَ رَبِّ الْعِزَّةِ عَمَّا يَصِفُونَ وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ 
പ്രതാപത്തിന്‍റെ നാഥനായ നിന്‍റെ രക്ഷിതാവ്‌ അവര്‍ ചമച്ചു പറയുന്നതില്‍ നിന്നെല്ലാം എത്ര പരിശുദ്ധന്‍! ദൂതന്‍മാര്‍ക്കു സമാധാനം! ലോകരക്ഷിതാവായ അല്ലാഹുവിന്‌ സ്തുതി!

അബൂ അബ്ദുൽ മന്നാൻ.
 ابو عبد المنان محمد نزامدين  ابن عبداللطيف

തൗഹീദും ശിർക്കും - ഭാഗം - 2

അസ്സലാമുഅലൈക്കും വ രഹ്മതുല്ലാഹി 

പ്രിയപ്പെട്ട സഹോദരങ്ങളെ,

ഒന്നാം ഭാഗത്തിൽ പറഞ്ഞ കാര്യങ്ങൾ തൗഹീദാകുന്ന നമ്മുടെ വിഷയത്തിന്റെ അടിത്തറയാണ്. അല്ലാഹു മാത്രമാണ് ആദിയിലും അവസാനത്തിലും ഉള്ളവൻ എന്നത് അവന്റെ രണ്ടു നാമ-വിശേഷണം എന്നതിലുപരി,  വളരെ കൃത്യമായ രണ്ടു മാനങ്ങൾ അതിൽ ഉണ്ട്. 

1. സൃഷ്ടികൾക്ക് മുൻപ് അല്ലാഹു മാത്രമേ ഉണ്ടായിരുന്നു.

2. സൃഷ്ടികൾ നശിച്ചതിന്നു ശേഷവും  അല്ലാഹു മാത്രമേ ഉണ്ടാകൂ.

സൃഷ്ടികൾ ഒന്നും തന്നെ ഇല്ലാത്ത ഒരു അവസ്ഥയെകുറിച്ചാണ് നമ്മൾ സംസാരിക്കുന്നത്. സൃഷ്ടികൾ ഒന്നും തന്നെ ഇല്ലാതിരുന്ന എന്നാൽ അല്ലാഹു മാത്രമുണ്ടായിരുന്ന ആ ആദിയിൽ ഉള്ളവനെയാണ് ഇനി നമ്മൾ പരിചയപ്പെടുവാൻ പോകുന്നത്.

ആരാണ് ആദിയിൽ ഉള്ളവനായ അല്ലാഹു

ആദിയിൽ ഉള്ള അല്ലാഹുവിനെ നമ്മൾ പരിചയപ്പെടേണ്ടത്  അവൻ ഏകനാകുന്നു എന്ന ഉന്നതവും ഉദാത്തവും ആയ അവന്റെ നാമവിശേഷണത്തിലൂടെയാണ് .

A.  ആദിയിൽ ഏകനായവൻ അല്ലാഹു

ആദിയിൽ ഉള്ള അല്ലാഹുവിനെ നമ്മൾ പരിചയപ്പെടുവാൻ പോകുന്നത് വളരെ ഹൃസ്വവും അതേസമയം വളരെയധികം പോരിഷകളും ഉള്ള, തൗഹീദ് എന്ന് മറ്റൊരു പേരുള്ള അദ്ധ്യായത്തിലൂടെയാണ്.

"(നബിയേ) പറയുക: കാര്യം അല്ലാഹു ഏകനാണ്‌ എന്നതാകുന്നു. അല്ലാഹു സ്വാശ്രയനും ഏവര്‍ക്കും  ആശ്രയമായിട്ടുള്ളവനും ആകുന്നു." - ഖുർആൻ 112:1-2

പരിശുദ്ധ ഖുർആൻ അദ്ധ്യായം 112ന്റെ ഒന്നും രണ്ടും വചനങ്ങളെ വിശദീകരിച്ചുകൊണ്ട് ഹാഫിള് ഇമാം ഇബ്നു കസീർ (റഹി) പറയുന്നു -

"അബൂ സഈദിൽ  ഖുളിരിയ്യ് (റ)വിൽ  നിന്നും നിവേദനം. അദ്ദേഹം പറഞ്ഞു: ഒരു രാത്രിയിൽ ഖത്താദ ഇബ്നു നുഇമാൻ (നിസ്കാരത്തിൽ)  എല്ലാം 'ഖുൽ ഹുവല്ലാഹു അഹദു' പാരായണം ചെയ്തു. അങ്ങിനെ അത് റസൂൽ (സ)യുടെ അടുത്ത് പ്രധിപാദിക്കപ്പെട്ടു. അപ്പോൾ അദ്ദേഹം പറഞ്ഞു:  എന്റെ ആത്മാവ് ആരുടെ കയ്യിലാണോ (അവനാണ് സത്യം) തീർച്ചയായും അത് ഖുർആനിന്റെ പകുതിയോ അല്ലെങ്കിൽ മൂന്നിൽ ഒന്നോ ആകുന്നു." - ഇബ്നു കസീർ(റഹി), ഖുർആൻ  112:1-2.

നബി (സ)യുടെ ഈ തിരുവചനങ്ങളിൽ നിന്നും തന്നെ ഈ അധ്യായത്തിന്റെ പ്രാധ്യാനവും മഹത്വവും മനസ്സിലാക്കാം. അങ്ങിനെ അല്ലാഹു ഏകനാകുന്നു എന്നുപറഞ്ഞാൽ -

1. അല്ലാഹു ആദിയിൽ ഏകനാകുന്നു.

2. അല്ലാഹു ഇന്നും ഏകനാകുന്നു.

3. അല്ലാഹു അവസാനത്തിലും ഏകനാകുന്നു.

4. അല്ലാഹു എന്നും ഏകനാകുന്നു. 

അല്ലാഹു ഏകനാകുന്നു എന്നുപറഞ്ഞാൽ -

5. ഏതെങ്കിലും ഒരു സൃഷ്ടിയെ അല്ലാഹു നശിപ്പിച്ചപ്പോൾ അവൻ ഏകാനായതല്ല.

6. ഏതെങ്കിലും ഒരു സൃഷ്ടിയെ അല്ലാഹു സൃഷ്ടിച്ചപ്പോൾ അവൻ ഏകാനായതല്ല.
7. ഏതെങ്കിലും ഒരു സൃഷ്ടി എന്തെങ്കിലും പ്രവർത്തിച്ചപ്പോൾ  അവൻ ഏകാനായതല്ല.

8. ...

ആദിയിൽ സർവ്വ സൃഷ്ടികൾക്കും മുൻപ് ഉണ്ടായിരുന്ന അല്ലാഹു ഏകനിൽ ഏകാനായതിന്ന്  അവന്റെ കോടാനുകോടി വരുന്ന ഏതെങ്കിലും ഒരു സ്രിഷ്ടിയുമായോ, അല്ലെങ്കിൽ ഏതെങ്കിലും ഒരു സൃഷ്ടിയുടെ എന്തെങ്കിലും ഒരു പ്രവർത്തനവുമായൊ യാതൊരു ബന്ധവും ഇല്ല.

يَعْنِي: هُوَ الْوَاحِدُ الْأَحَدُ، الَّذِي لَا نَظِيرَ لَهُ وَلَا وَزِيرَ، وَلَا نَدِيدَ وَلَا شَبِيهَ وَلَا عَدِيلَ، وَلَا يُطلَق هَذَا اللَّفْظُ عَلَى أَحَدٍ فِي الْإِثْبَاتِ إِلَّا عَلَى اللَّهِ، عَزَّ وَجَلَّ؛ لِأَنَّهُ الْكَامِلُ فِي جَمِيعِ صِفَاتِهِ وَأَفْعَالِهِ

"അതായത്, അവൻ (അല്ലാഹു) ഏകനിൽ ഏകനാകുന്നു. അവന്ന് തുണ ഇല്ല, അവന്ന് സഹായി ഇല്ല, അവന്ന് എതിരാളി ഇല്ല, അവന്ന് സമപ്പെടുത്തിനോക്കുവാൻ ഒരാളില്ല. ഈ വാക്ക് ( അൽ  അഹദ്) സർവ്വശക്തനും പ്രതാപവാനുമായ അല്ലാഹുവിനല്ലാതെ മറ്റാർക്കും ഒരിക്കലും വകവെച്ചുകൊടുക്കുവാൻ പാടില്ല, കാരണം, അവൻ (അല്ലാഹു) അവന്റെ മുഴുവൻ വിശേഷണങ്ങളിലും പ്രവര്ത്തനങ്ങളിലും പരിപൂർണ്ണൻ ആകുന്നു. " - ഇബ്നു കസീർ(റഹി), ഖുർആൻ  112:1-2.

അപ്പോൾ, ആദിയിൽ അല്ലാഹു മാത്രം ഉണ്ടായിരുന്ന അവസ്ഥയിൽതന്നെ പരിപൂർണ്ണ അർത്ഥത്തിൽ അല്ലാഹു ഏകനായിരുന്നു.

ഇനി, അല്ലാഹുവിന്റെ ഈ ആദിയിലുള്ള ഈ പരിപൂർണ്ണത, "അവൻ ഏകനാകുന്നു" എന്ന നാമവിശേഷണത്തിൽ മാത്രം പരിമിധമല്ല, അത് അവന്റെ സകല നാമവിശേഷണങ്ങൾക്കും ബാധകമാണ്.

B. ആദിയിൽ തന്റെ മുഴുവൻ നാമവിശേഷണങ്ങളിലും പരിപൂർണ്ണനായവൻ അല്ലാഹു

അല്ലാഹു ആദിയിൽ ഉള്ള അവസ്ഥയിൽ  തന്നെ അവന്റെ എല്ലാ നാമവിശേഷണങ്ങളും അതിൽ അവന്റെ ഏകത്വവും പരിപൂർണ്ണമാകുകയും ചെയ്തിട്ടുണ്ട്.

• അല്ലാഹുവിന്റെ സർവ്വ നാമ-വിശേഷണങ്ങൾക്കും അർഹനായികൊണ്ട്‌ അവൻ മാത്രം ഉള്ള അവസ്ഥ. അതുകൊണ്ട് തന്നെ ആ ആദിയിൽ അവൻ സർവ്വഗുണ സമ്പൂർണ്ണൻ  ആയിട്ടുണ്ട്‌.

അല്ലാഹുവിനു എന്തൊക്കെ നാമങ്ങളും വിശേഷണങ്ങളും ഉണ്ടോ, അതിൽ എല്ലാം തന്നെ അല്ലാഹു പരിപൂർണ്ണൻ ആകുന്നു, അതിലേക്കു ഒന്നും ചേർക്കുവാനോ ഒന്നും കുറക്കുവാനോ ഇല്ല. കാരണം, അല്ലാഹു പറയുന്നു "അവൻ സ്വമദാകുന്നു" - 

"അല്ലാഹു സ്വാശ്രയനും ഏവര്‍ക്കും  ആശ്രയമായിട്ടുള്ളവനും ആകുന്നു." - ഖുർആൻ 112:1-2.

എന്താണ്  'സ്വമദ്' എന്നത്കൊണ്ടുള്ള വിവക്ഷ എന്നതിനെപറ്റി, ഇമാം ഇബ്നു കസീർ(റഹി), ഇബ്നു അബ്ബാസ്‌ (റ) തൊട്ട്  പറയുന്നു.

قَالَ عَلِيُّ بْنُ أَبِي طَلْحَةَ، عَنِ ابْنِ عَبَّاسٍ: هُوَ السَّيِّدُ الَّذِي قَدْ كَمُلَ فِي سُؤْدُدِهِ، وَالشَّرِيفُ الَّذِي قَدْ كَمُلَ فِي شَرَفِهِ، وَالْعَظِيمُ الَّذِي قَدْ كَمُلَ فِي عَظْمَتِهِ، وَالْحَلِيمُ الَّذِي قَدْ كَمُلَ فِي حِلْمِهِ، وَالْعَلِيمُ الَّذِي قَدْ كَمُلَ فِي عِلْمِهِ، وَالْحَكِيمُ الَّذِي قَدْ كَمُلَ فِي حِكْمَتِهِ  وَهُوَ الَّذِي قَدْ كَمُلَ فِي أَنْوَاعِ الشَّرَفِ وَالسُّؤْدُدِ، وَهُوَ اللَّهُ سُبْحَانَهُ، هَذِهِ صِفَتُهُ لَا تَنْبَغِي إِلَّا لَهُ، لَيْسَ لَهُ كُفْءٌ، وليس كمثله شيء، سبحان الله الواحد القهار

"ഇബ്നു അബ്ബാസ് (റ)വിൽ നിന്നും അലി ഇബ്നു അബീ ത്വൽഹ(റ) പറയുന്നു  -

• തന്റെ സർവാധികാരത്തിൽ പരിപൂർണ്ണനായ സർവാധികാരി ആകുന്നു അവൻ (അല്ലാഹു).

• തന്റെ മാന്യതയിൽ  പരിപൂർണ്ണനായ മാന്യൻ ആകുന്നു അവൻ (അല്ലാഹു).

• തന്റെ മഹത്വത്തിൽ പരിപൂർണ്ണനായ മഹത്വമേറിയവൻ ആകുന്നു അവൻ (അല്ലാഹു).

• തന്റെ സഹനശീലത്തിൽ പരിപൂർണ്ണനായ സഹനശീലൻ  ആകുന്നു അവൻ (അല്ലാഹു).

• തന്റെ അറിവിൽ പരിപൂർണ്ണനായ എല്ലാം അറിയുന്നവൻ ആകുന്നു അവൻ (അല്ലാഹു).

• തന്റെ യുക്തിയിൽ പരിപൂർണ്ണനായ യുക്തിയുള്ളവൻ ആകുന്നു അവൻ (അല്ലാഹു).

വിവിധങ്ങളായ തന്റെ സർവാധികാരത്തിലും മന്യതയിലും എല്ലാം തന്നെ പരിപൂർണ്ണത ഉള്ളവൻ ആകുന്നു അവൻ. അവനാകുന്നു പരിശുദ്ധനായ അല്ലാഹു. ഈ പറഞ്ഞ വിശേഷണങ്ങൾ എല്ലാം തന്നെ അവൻ (അല്ലാഹു) അല്ലാത്ത യാതൊരാൾക്കും വകവെച്ച് കൊടുക്കുവാൻ പാടില്ല. അവന്നു തുല്യനായിട്ടു ഒരാളും തന്നെ ഇല്ല. അവനെ പോലെ എന്ന് പറയുവാൻ ഒരാളും തന്നെയില്ല. എല്ലാത്തിനേയും വെല്ലുന്ന, ഏകനായ അവൻ പരിശുദ്ധനാകുന്നു." - ഇബ്നു കസീർ(റഹി), ഖുർആൻ 112:1-2.

അപ്പോൾ, തൂവെള്ള വസ്ത്രം പോലെ അല്ലാഹുവിന്റെ ഏകത്വം വളരെ വ്യക്തം.

1. അല്ലാഹു ആദിയിൽ അവന്റെ സർവ്വ നാമ-വിശേഷണങ്ങളിലും ഏകനാകുന്നു.

2. അല്ലാഹു ഇന്നും അവന്റെ സർവ്വ നാമ-വിശേഷണങ്ങളിലും ഏകനാകുന്നു.

3. അല്ലാഹു അവസാനത്തിലും അവന്റെ സർവ്വ നാമ-വിശേഷണങ്ങളിലും ഏകനാകുന്നു.

4. അല്ലാഹു എന്നും അവന്റെ സർവ്വ നാമ-വിശേഷണങ്ങളിലും ഏകനാകുന്നു. 

അതുകൊണ്ടാണ്  അല്ലാഹു ഏകനാകുന്നു എന്നതിനെ വിശദീകരിക്കുന്നിടത്ത് ഇമാം ഇബ്നു കസീർ(റഹി) പറഞ്ഞത്  -

 لِأَنَّهُ الْكَامِلُ فِي جَمِيعِ صِفَاتِهِ وَأَفْعَالِهِ

"അവൻ (അല്ലാഹു) അവന്റെ മുഴുവൻ വിശേഷണങ്ങളിലും പ്രവര്ത്തനങ്ങളിലും പരിപൂർണ്ണൻ ആകുന്നു. " - ഇബ്നു കസീർ(റഹി), ഖുർആൻ  112:1-2.

ആദിയിൽ സർവ്വ രാജാധികാരത്തിന്റെയും ഉടയവനായ അല്ലാഹു തന്റെ മുഴുവൻ നാമ-വിശേഷണങ്ങളിലും പ്രവര്ത്തനങ്ങളിലും പരിപൂർണ്ണൻ അയതോടൊപ്പം തന്നെ അവൻ അതിൽ ഏകനും ആയിത്തീന്നു.

അപ്പോൾ, ആരാണ് ആദിയിൽ ഉള്ള അല്ലാഹു എന്ന ചോദ്യത്തിനു വളരെ ലളിതവും എന്നാൽ വളരെ സുഭദ്രവുമായ  ഉത്തരം വളരെ വ്യക്തം.

• ആദിയിൽ ഏകാനായവൻ അല്ലാഹു.

• ആദിയിൽ തന്റെ സർവ്വ നാമ-വിശേഷണങ്ങളിലും പരിപൂർണ്ണൻ ആയവൻ അല്ലാഹു.

തന്റെ ഏകത്വത്തിലും, പരിപൂർണ്ണതയിലും സൃഷ്ടികളെതൊട്ട് ഉന്നതനായവൻ അല്ലാഹു 

സർവ്വ ലോകങ്ങളിലേയും സർവ്വ സൃഷ്ടികൾക്കും മുൻപ്, യാതൊരു തുടക്കവും ഇല്ലാതെ, അല്ലാഹു എകനാകുകയും, അതോടൊപ്പം തന്നെ തന്റെ സർവ്വ വിശേഷണങ്ങളിലും ഉന്നതനും പ്രതാപവാനുമായ അല്ലാഹു സർവ്വഗുണ-സംബൂർണ്ണൻ ആകുകയും ചെയ്തു.

ഈ പരമമായ സത്യം, അല്ലാഹുവിന്റെ രണ്ടു ഉന്നത നാമ-വിശേഷണങ്ങളായ  'അഹദ്', 'സ്വമദ്' എന്നതിനെ വിശദീകരിച്ചുകൊണ്ട് ഇമാം ഇബ്നുകസീർ(റഹി) വിശദീകരിച്ചതിൽ  നിന്നും നമുക്ക് വളരെ കൃത്യമായി മനസ്സിലായി.

കാര്യം അങ്ങിനെയാണെങ്കിൽ -

• പേനയെ സൃഷ്ടിച്ചപ്പോൾ അല്ലാഹുവിന്റെ ഏതെങ്കിലും ഒരു വിശേഷണം കൂടുകയോ കുറയുകയോ ചെയ്തിട്ടില്ല, കാരണം അവൻ സർവ്വ സൃഷ്ടികൾക്കും മുൻപ്, ആദിയിൽ സർവ്വ വിശേഷണങ്ങളിലും പരിപൂർണ്ണൻ ആയി.

• അർഷിനെ സൃഷ്ടിച്ചപ്പോൾ അല്ലാഹുവിന്റെ ഏതെങ്കിലും ഒരു വിശേഷണം കൂടുകയോ കുറയുകയോ ചെയ്തിട്ടില്ല, കാരണം അവൻ സർവ്വ സൃഷ്ടികൾക്കും മുൻപ്, ആദിയിൽ സർവ്വ വിശേഷണങ്ങളിലും പരിപൂർണ്ണൻ ആയി.

• സ്വർഗ്ഗ നരഗ ആകാശ സൂര്യ നക്ഷത്ര ചന്ദ്രാദികളെയും ഭൂമിയേയും ഒക്കെ സൃഷ്ടിച്ചപ്പോൾ അല്ലാഹുവിന്റെ ഏതെങ്കിലും ഒരു വിശേഷണം കൂടുകയോ കുറയുകയോ ചെയ്തിട്ടില്ല, കാരണം അവൻ സർവ്വ സൃഷ്ടികൾക്കും മുൻപ്, ആദിയിൽ സർവ്വ വിശേഷണങ്ങളിലും പരിപൂർണ്ണൻ ആയി.

• മലക്കുകളെ സൃഷ്ടിച്ചപ്പോൾ അല്ലാഹുവിന്റെ ഏതെങ്കിലും ഒരു വിശേഷണം കൂടുകയോ കുറയുകയോ ചെയ്തിട്ടില്ല, കാരണം അവൻ സർവ്വ സൃഷ്ടികൾക്കും മുൻപ്, ആദിയിൽ സർവ്വ വിശേഷണങ്ങളിലും പരിപൂർണ്ണൻ ആയി.

• ജിന്നിനെ സൃഷ്ടിച്ചപ്പോൾ അല്ലാഹുവിന്റെ ഏതെങ്കിലും ഒരു വിശേഷണം കൂടുകയോ കുറയുകയോ ചെയ്തിട്ടില്ല, കാരണം അവൻ സർവ്വ സൃഷ്ടികൾക്കും മുൻപ്, ആദിയിൽ സർവ്വ വിശേഷണങ്ങളിലും പരിപൂർണ്ണൻ ആയി.

• മനുഷ്യനെ സൃഷ്ടിച്ചപ്പോൾ അല്ലാഹുവിന്റെ ഏതെങ്കിലും ഒരു വിശേഷണം കൂടുകയോ കുറയുകയോ ചെയ്തിട്ടില്ല, കാരണം അവൻ സർവ്വ സൃഷ്ടികൾക്കും മുൻപ്, ആദിയിൽ സർവ്വ വിശേഷണങ്ങളിലും പരിപൂർണ്ണൻ ആയി.

• ഏതൊരു സൃഷ്ടിയെ സ്രിഷ്ടിക്കുമ്പോഴും അല്ലാഹുവിന്റെ ഏതെങ്കിലും ഒരു വിശേഷണം കൂടുകയോ കുറയുകയോ ചെയ്യുകയില്ല, കാരണം അവൻ സർവ്വ  സൃഷ്ടികൾക്ക് മുൻപ്, ആദിയിൽ സർവ്വ വിശേഷണങ്ങളിലും പരിപൂർണ്ണൻ ആയി അഥവാ അല്ലാഹു സർവ്വഗുണ-സംബൂർണ്ണൻ ആയി.

അനന്തമായ കാലഘട്ടത്തിന്റെ വളരെ നിസ്സാരമായ ഒരു നിമിഷത്തിൽ സൃഷ്ടിക്കപ്പെടുകയും മറ്റൊരു നിമിഷത്തിൽ നശിപ്പിക്കപ്പെടുകയും ചെയ്യുന്ന കഴിവുകെട്ട, നിസ്സാരന്മാരും, ദുർബലരും, നിലനിൽപ്പിന്നു വേണ്ടി പരാശ്രയമുള്ളവരും ആയ സൃഷ്ടികളെതൊട്ട് ആദിയിലും അവസാനത്തിലും ഏകനും സർവ്വഗുണ-സംബൂർണ്ണനും ആയ അല്ലാഹു എത്രയോ പരിശുദ്ധൻ ആകുന്നു, എത്രയോ ഉന്നതൻ ആകുന്നു.

തുടരും, ഇന്ഷാ അല്ലാാഹു.

سُبْحَانَ رَبِّكَ رَبِّ الْعِزَّةِ عَمَّا يَصِفُونَ وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ 
പ്രതാപത്തിന്‍റെ നാഥനായ നിന്‍റെ രക്ഷിതാവ്‌ അവര്‍ ചമച്ചു പറയുന്നതില്‍ നിന്നെല്ലാം എത്ര പരിശുദ്ധന്‍! ദൂതന്‍മാര്‍ക്കു സമാധാനം! ലോകരക്ഷിതാവായ അല്ലാഹുവിന്‌ സ്തുതി!

അബൂ അബ്ദുൽ മന്നാൻ.
 ابو عبد المنان محمد نزامدين  ابن عبداللطيف

തൗഹീദും ശിർക്കും - ഭാഗം - 1

അസ്സലാമുഅലൈക്കും വ രഹ്മതുല്ലാഹി 

പ്രിയപ്പെട്ട സഹോദരങ്ങളെ,

ആമുഖത്തിൽ സൂചിപ്പിച്ച കാര്യങ്ങളിൽ നിന്നും എന്തുകൊണ്ടാണ് ഭിന്നിപ്പുകൾ ഉണ്ടാകുന്നതെന്നും അതിന്നു അല്ലാഹു നിശ്ചയിച്ച രണ്ടു പര്യാവസാനങ്ങളെ കുറിച്ചും ചുരുക്കത്തിൽ നമ്മൾ മനസ്സിലാക്കി. അതിൽ ഏതു പര്യാവസാനം വേണം എന്നത് ഓരോ ആളുകളും തീരുമാനിക്കുക.

"വ്യക്തമായ തെളിവ്" ലഭിച്ചിട്ടും നമുക്ക് മുൻപ് വേദം നൽകപെട്ട സമുദായങ്ങളിൽ സംഭവിച്ച അപചയത്തിന്നു കാരണം ഇഹലോകത്തിന്നു വേണ്ടിയുള്ള "മത്സരം" ആയിരുന്നു എന്നാണ് ഉന്നതനും പ്രതാപവാനുമായ അല്ലാഹു പറയുന്നത് എന്ന് ഈ വിഷയത്തിന്റെ ആമുഖത്തിൽ പറഞ്ഞു കഴിഞ്ഞു.  അതുകൊണ്ട് തന്നെ അത്തരമൊരു മത്സര ബുദ്ധി ഒഴിവാക്കണം എന്നാണു ഇത് വായിക്കുന്ന ഓരോ ആളുകളോടും സ്വന്തത്തെ പോലെത്തന്നെ ഉണർത്തുവാൻ ഉള്ളത്.

ഇനി അതല്ല സത്യം മനസ്സിലാക്കുന്നതിൽ ഉപരി, വല്ല മത്സരത്തിന്നും ആണ് ആരെങ്കിലും ശ്രമിക്കുന്നത് എങ്കിൽ തീർച്ചയായും അത്തരം ആളുകൾ  "ദുർമാർഗ"ത്തിലേക്കുള്ള വഴി വെട്ടുകയാണ് എന്നാണ് വളരെ ഗൌരവമായി, ശക്തമായ ഭാഷയിൽ ഉണർത്തുവാൻ ഉള്ളത്.

"വിശ്വാസികള്‍ക്ക്‌ അവരുടെ ഹൃദയങ്ങള്‍ അല്ലാഹുവിനെ പറ്റിയുള്ള സ്മരണയിലേക്കും, അവതരിച്ചു കിട്ടിയ സത്യത്തിലേക്കും കീഴൊതുങ്ങുവാനും തങ്ങള്‍ക്ക്‌ മുമ്പ്‌ വേദഗ്രന്ഥം നല്‍കപ്പെട്ടവരെപ്പോലെ ആകാതിരിക്കുവാനും സമയമായില്ലേ? അങ്ങനെ ആ വേദക്കാര്‍ക്ക്‌ കാലം ദീര്‍ഘിച്ച്‌ പോകുകയും തന്‍മൂലം അവരുടെ ഹൃദയങ്ങള്‍ കടുത്തുപോകുകയും ചെയ്തു. അവരില്‍ അധികമാളുകളും ദുര്‍മാര്‍ഗികളാകുന്നു." - ഖുർആൻ 57:16. 

فَعَلَيْنَا -أَيُّهَا الْمُسْلِمُونَ-أَنْ نَنْتَهِيَ عَمَّا ذمَّهم اللَّهُ تَعَالَى بِهِ، وَأَنْ نَأْتَمِرَ بِمَا أُمِرْنَا بِهِ، مِنْ تَعَلُّم كِتَابِ اللَّهِ الْمُنَزَّلِ إِلَيْنَا وَتَعْلِيمِهِ، وَتَفَهُّمِهِ وَتَفْهِيمِهِ، 

"അപ്പോൾ നമ്മുടെ മേൽ (ബാധ്യതയായിട്ടുള്ളത്) - ഓ മുസ്ലിമീങ്ങളേ - യാതൊന്നുകൊണ്ട് അല്ലാഹു അവരെ അധിക്ഷേപിച്ചോ അതിൽ നിന്നും വിട്ടുനിൽക്കലും, നമ്മിലേക്ക്‌ ഇറക്കിയ അല്ലാഹുവിന്റെ ഗ്രന്ഥം പഠിക്കുന്നതിലും പഠിപ്പിക്കുന്നതിലും മനസ്സിലാക്കുന്നതിലും മനസ്സിലാക്കിക്കൊടുക്കുന്നതിലും യാതൊന്നുകൊണ്ട് നമ്മൾ കൽപ്പിക്കപെട്ടോ ആ കൽപ്പന സ്വീകരിക്കലും" - ഹാഫിള് ഇബ്നു കസീർ (റഹി), ആമുഖം, തഫ്സീറുൽ ഖുർആനിൽ അളീം.

പരിശുദ്ധ ഖുർആനിന്റെയും തിരുവചനങ്ങളുടെയും അധ്യാപനങ്ങളെ പഠിക്കുവാനും ജീവിതത്തിൽ പകർത്തുവാനും ശ്രമിക്കുന്ന ഏതൊരു വിദ്യാർഥിക്കും   ഉള്ള ഒരു ഉണർത്തൽ ആണ് മഹാനായ ഇമാം ഇബ്നു കസീർ (റഹി) പരിശുദ്ധ ഖുർആൻ വചനം 57:16 ഉദ്ധരിച്ചുകൊണ്ട് തന്റെ തഫസീറിന്റെ ആമുഖത്തിൽ മുസ്ലിം സമുദായത്തെ വിളിച്ചുകൊണ്ടു ഉണർത്തുന്നത്. 

ഇത്തരുണത്തിൽ ഉള്ള ഒരു ഉണർവ്  ആദ്യം മുതൽ അവസാനം വരെ ഉണ്ടായിരിക്കണം എന്നും, ഒന്നും പറയാനില്ലെങ്കിൽ മിണ്ടാതിരിക്കുക എന്ന സൂക്ഷ്മതയുടെ ഒരംശമെങ്കിലും ഉണ്ടായിരിക്കണം എന്ന് സ്വന്തത്തോടും, ഇത് വായിക്കുന്ന ഓരോ ആളുകളോടും ഉണർത്തുകയാണ്. ഇനി, വിഷയത്തിലേക്ക് കടക്കുകയാണ്.

ആദ്യമായി മനസിലാകേണ്ടത് തൗഹീദ് എന്താകുന്നു എന്നാണ്. അല്ലാഹുവിനെ ഏകനാക്കുക്ക എന്നതാണല്ലോ അതുകൊണ്ടുള്ള വിവക്ഷ.   ഒരു സത്യവിശ്വാസി, അവൻ പ്രത്യക്ഷമായ ശിർക്ക് ചെയ്യുന്നില്ലെങ്കിലും തൗഹീദിനെ കുറിച്ച് വളരെ വ്യക്തമായ ഒരു ധാരണയില്ലെങ്കിൽ അവന്റെ വിശ്വാസം കുഴപ്പത്തിൽ ആകുവാൻ ഒരു സാധ്യത ഉണ്ട്. അതിനെ കുറിച്ചുള്ള ഒരു ചെറിയ വിശദീകരണത്തോട് കൂടി തുടങ്ങുകയാണ് . 

നമുക്ക് എല്ലാവര്ക്കും അറിയാവുന്നതുപോലെ  'ലാ ഇലാഹ ഇല്ലാ അല്ലാഹു' എന്നതാണല്ലോ തൗഹീദിന്റെ ഏറ്റവും ഉന്നതമായ വചനം.

• 'ഒരു ആരാധ്യനും ഇല്ല, അല്ലാഹു അല്ലാതെ' എന്ന് ഒരാൾ പറയുമ്പോൾ, പഠിക്കുമ്പോൾ, ആ ആൾ വളരെ അടിസ്ഥാനപരമായി, വളരെ തുടക്കത്തിൽ മനസിലാക്കേണ്ടത് ഏതൊരു അല്ലാഹുവിനെയാണ്, അവനല്ലാതെ ആരാധ്യൻ ഇല്ല എന്ന് താൻ സാക്ഷ്യപ്പെടുത്തുന്നത് എന്നാണ്. 

ഇതറിയാതെ ഒരാൾ  'ലാ ഇലാഹ ഇല്ലാ അല്ലാഹു' മായി മുന്നോട്ട് പോയാൽ അയാളുടെ വിശ്വാസം ഒരിക്കലും പൂർണ്ണമായിടില്ല, പൂർണ്ണമാകുകയും ഇല്ല. 

ഒരു കാര്യത്തിൽ ഒരു പ്രത്യേക വ്യക്തി മാത്രമേ ഉള്ളൂ എന്ന് പറയുമ്പോൾ തീർച്ചയായും ഉയർന്നുവരുന്ന, ഉയർന്നുവരേണ്ട ഒരു ചോദ്യമാണ്  - 'ആരാണ് ആ ആൾ?'. 

ഒരു സ്കൂളിൽ, ഒരു പ്രത്യേക വിഷയം എറ്റവും  നന്നായി അറിയുന്നത് ഇന്ന അധ്യാപകനല്ലാതെ മറ്റാർക്കുമല്ല എന്ന് ഒരു വിദ്യാർത്ഥി പറയുമ്പോൾ, ആ അദ്ധ്യാപകന്റെ അറിവിനെ  കുറിച്ചും കഴിവിനെ കുറിച്ചും നല്ലവണ്ണം അറിയുന്നവനായിരിക്കും, ആയിരിക്കണം അവൻ. അതോടൊപ്പം തന്നെ മറ്റുള്ള അദ്ധ്യാപകന്മാർക്കക്ക്  ആദ്യം പറഞ്ഞ അദ്ധ്യാപകന്റെ അത്ര കഴിവില്ല എന്നും, ഈ പറയുന്ന വിദ്യാർഥിക്ക് നല്ല പോലെ അറിയണം.  ഇത് വളരെ നിർബന്ധമാണ്. 

എന്നാൽ, ആ ഏറ്റവും കഴിവുള്ള അദ്ധ്യാപകന്റെ കഴിവിനെകുറിച്ചും മറ്റു അദ്ധ്യാപകരുടെ കഴിവ്-കുറവിനെ കുറിച്ചും ബോദ്ധ്യമില്ലാത്ത മറ്റൊരു വിദ്യാർത്ഥി ഈ വാദം ഉന്നയിക്കുമ്പോൾ എന്താണ് സംഭവിക്കുന്നത്‌ ?

1. അവൻ പറഞ്ഞത് സത്യമാണ്.

2. അവൻ പറഞ്ഞിരിക്കുന്നത്  (സത്യമെങ്കിലും) അവന്നു ബോദ്ധ്യപ്പെടാത്ത ഒരു കാര്യമാണ് അഥവാ അവൻ മറ്റോരാൾ കേട്ടത്  ഏറ്റു പറഞ്ഞതാണ്. 

3. ഭാവിയിൽ ആ ഏറ്റവും കഴിവുള്ള  അദ്ധ്യാപകന്റെ അറിവും കഴിവുമായോ മറ്റു അദ്ധ്യാപകന്മാരുടെ കഴിവ്-കുറവിനെ പറ്റിയൊ എന്തെങ്കിലും വിഷയം ഉണ്ടാകുമ്പോൾ, കേട്ടത് ഏറ്റു പറഞ്ഞ വ്യക്തിക്ക് ഒന്നും പറയുവാൻ സാധിക്കില്ല. കാരണം, അവന്നു ബോദ്ധ്യപ്പെടാത്ത ഒരു സംഗതിയായിരുന്നു അവൻ സത്യപ്പെടുത്തിയത്.

പറഞ്ഞുവരുന്നത്, 'ലാ ഇലാഹ ഇല്ലാ അല്ലാഹു' എന്ന് ഒരാൾ പ്രഖ്യാപിക്കുന്നതിന്നു മുൻപ്, ഏതൊരു അല്ലാഹുവിനെ കുറിച്ചാണ്  'അവനല്ലാതെ ഒരു ആരാധ്യനും ഇല്ല' എന്ന് താൻ പറയുന്നതെന്ന് വളരെ കൃത്ത്യമായി അവൻ മനസിലാക്കണം. അതൊന്നും അറിയാതെയാണ് ഒരാൾ 'ലാ ഇലാഹ ഇല്ലാ അല്ലാഹു' എന്ന് പറഞ്ഞതെങ്കിൽ, അവൻ പറഞ്ഞത് സത്യമാണ് പക്ഷെ അവന്നു കൃത്യമായി ബോദ്ധ്യപ്പെടാത്ത ഒന്നിനെ കുറിച്ചാണ് അവൻ സത്യപ്പെടുത്തിയിരിക്കുന്നത്. ഭാവിയിൽ,  'ലാ ഇലാഹ ഇല്ലാ അല്ലാഹു' എന്ന വിഷയത്തിൽ എന്തെങ്കിലും ഒരു വിഷയം ഉണ്ടായാൽ അവൻ കുഴപ്പത്തിൽ അകപ്പെടുവാൻ ഉള്ള സാദ്യത വളരെ വളരെ കൂടുതൽ ആണ് .

ഇനി പറയുവാൻ പോകുന്നത്, ആരാണ് ആ അല്ലാഹു എന്നതിനെ കുറിച്ചാണ്.

ആദിയിലും അവസാനത്തിലും ഉള്ളവൻ അല്ലാഹു 

അല്ലാഹുവിനെ കുറിച്ചു വളരെ അടിസ്ഥാനപരമായി മനസ്സിലാക്കേണ്ട ഒന്നാണ് അല്ലാഹുവാണ് ആദിയിൽ ഉള്ളവൻ, അവനാണ് അവസാനത്തിലും ഉള്ളവൻ. 

"അവന്‍ ആദിയും അന്തിമനും പ്രത്യക്ഷമായവനും പരോക്ഷമായവനുമാണ്‌. അവന്‍ സര്‍വ്വകാര്യങ്ങളെക്കുറിച്ചും അറിവുള്ളവനുമാണ്‌." - ഖുർആൻ 57:3.

ഈ വചനത്തെ വിശദീകരിച്ചുകൊണ്ട് ഇമാം ഇബ്നു കസീർ(റഹി) പറയുന്ന, ഇമാം അഹ്മദ് (റഹി) റിപ്പോര്ട്ട് ചെയ്ത ഒരു ഹദീസിൽ, മുഹമ്മദ്‌ നബി (സ) പറയുന്നു  -

أَنْتَ الْأَوَّلُ لَيْسَ  قَبْلَكَ شَيْءٌ وَأَنْتَ الْآخِرُ لَيْسَ  بَعْدَكَ شَيْءٌ، وَأَنْتَ الظَّاهِرُ لَيْسَ فَوْقَكَ شَيْءٌ وَأَنْتَ الْبَاطِنُ لَيْسَ دُونَكَ شَيْءٌ

"നീയാണ് ആദിയിൽ ഉള്ളവൻ, നിനക്ക് മുൻപ് ഒന്നും ഇല്ല. നീയാണ് അവസാനത്തിൽ ഉള്ളവൻ, നിനക്ക് ശേഷം ഒന്നും ഇല്ല, നീയാണ് പ്രത്യക്ഷത്തിൽ ഉള്ളവൻ, നിനക്ക് മുകളിൽ ഒന്നുമില്ല, നീയാണ് പരോക്ഷമായുള്ളവൻ, നിന്നെ കൂടാതെ ഒന്നുമില്ല. " - ഇബ്നു കസീർ(റഹി), ഖുർആൻ 57:3.

അല്ലാഹുവാണ് ആദിയിൽ ഉള്ളവൻ എന്ന് പറഞ്ഞാൽ, സൃഷ്ടികൾ ഒന്നുംതന്നെ ഇല്ലാത്ത ഒരു അവസ്ഥ ഉണ്ടായിരുന്നു. അന്ന് അല്ലാഹു മാത്രമാണ് ഉണ്ടായിരുന്നത്. അല്ലാഹുവാണ് അവസാനത്തിൽ ഉള്ളത് എന്ന് പറഞ്ഞാൽ, സൃഷ്ടികൾ ഒന്നും തന്നെ ഇല്ലാത്ത ഒരു അവസ്ഥ ഇനി വരുമെന്നും, അന്ന് അല്ലാഹു മാത്രമേ ബാകിയാവുകയുള്ളൂ എന്നാണ് , വളരെ പ്രധാനമായി, വിഷയസംബന്ധിയായി നമ്മൾ മനസ്സിലാക്കേണ്ടത്.

A. ആദിയിൽ, സൃഷ്ടികൾ ഒന്നും തന്നെ ഇല്ലാത്ത ഒരു അവസ്ഥ

സൃഷ്ടികൾ ഒന്നും തന്നെ ഇല്ലാത്ത ഒരു അവസ്ഥ ഉണ്ടായിരുന്നു.

أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ: "إِنَّ اللَّهَ قَدَّرَ مَقَادِيرَ الْخَلْقِ قَبْلَ أَنْ يَخْلُقَ السَّمَاوَاتِ وَالْأَرْضَ بِخَمْسِينَ أَلْفَ سَنَةٍ، وَكَانَ عَرْشُهُ عَلَى الْمَاءِ

നബി (സ) പറഞ്ഞു  - "ആകാശങ്ങളെയും  ഭൂമിയേയും സൃഷ്ടിക്കുന്നതിനു  അമ്പതിനായിരം വർഷങ്ങൾക്കു മുൻപ്‌  അല്ലാഹു അവന്റെ സൃഷ്ടികളുടെ കാര്യങ്ങൾ  തീർച്ചയായും തിട്ടപ്പെടുത്തിയിരുന്നു, അവന്റെ അർഷ് വെള്ളത്തിന്നു മുകളിൽ ആയിരുന്നു" - സ്വഹീഹ് മുസ്ലിം.

മുകളിൽ പറഞ്ഞ നബി വചനം വായിക്കുമ്പോൾ, ചിലപ്പോൾ വെള്ളവും അല്ലാഹുവിന്റെ സിംഹാസനമായ അർഷും ആദ്യമേ ഉണ്ടായിരുന്നോ എന്നു തോന്നിയക്കാം. അത് രണ്ടും അവന്റെ സൃഷ്ടികൾ തന്നെയാണ്. ആകാശങ്ങളും ഭൂമിയും സ്രിഷ്ടിക്കുന്നതിന്നു മുൻപ് ഇതു രണ്ടും സൃഷ്ടിക്കപ്പെട്ടു എന്ന് മാത്രം.

ഇമാം ത്വബരി(റഹി) പരിശുദ്ധ ഖുർആൻ 57:3 വചനത്തിൻറെ വിശദീകരണത്തിൽ പറയുന്നു -

هُوَ الأوَّلُ) قبل كل شيء بغير حدّ)

" 'അവൻ ആദിയിൽ ഉള്ളവൻ'. (അതായത്) യാതൊരു പരിധിയും ഇല്ലാതെ, എല്ലാത്തിന്റെയും മുൻപ് " - ഇമാം ത്വബരി(റഹി), ഖുർആൻ - 57:3 .

ഇവിടെ, എല്ലാറ്റിന്റെയും എന്ന് പറഞ്ഞാലൽ, അതിൽ എല്ലാ സൃഷ്ടികളും പെട്ടും. ഒന്നും തന്നെ അതിൽനിന്നും ഒഴിവല്ല.

അപ്പോൾ ഒന്നുറപ്പാണ്. അല്ലാഹുവിന്റെ സകല പഠപ്പുകൾ ഒക്കെയും, അതായത് അർഷ്, വെള്ളം, സ്വർഗം, നരഗം, മലക്കുകൾ, ആകാശങ്ങൾ, ഭൂമി, നമുക്ക്‌ അറിയുന്നതും അറിയാത്തതും ആയ മറ്റു ജീവികൾ, ജിന്ന്, മനുഷ്യൻ, ആദം നബി(അ) തൊട്ടു മുഹമ്മദ്‌ നബി (സ) വരെയുള്ള സകല പ്രവാചകന്മാർ അടക്കം,   സർവ്വ സൃഷ്ടികളെയും പടക്കുന്നതിന്നു മുൻപ് ഒരു അവസ്ഥ ഉണ്ടായിരുന്നു. 

ഇമാം അഹ്മദ് (റഹി) റിപ്പോർട്ട്‌ ചെയ്ത ഹദീസിൽ നബി(സ) പറയുന്നു -

كَانَ اللَّهُ قَبْلَ كُلِّ شَيْءٍ وَكَانَ عَرْشُهُ عَلَى الْمَاءِ وَكَتَبَ فِي اللَّوْحِ ذِكْرَ كُلِّ شَيْءٍ

"അല്ലാഹു എല്ലാറ്റിന്നും മുൻപ് ഉണ്ടായിരുന്നു. അവന്റെ സിംഹാസനം വെള്ളത്തിനു മുകളിൽ ആയിരുന്നു. ലൗഹുൽ മഹ്ഫൂളിൽ എല്ലാറ്റിന്റെയും കാര്യം അവൻ (അല്ലാഹു) എഴുതി" - ഇമാം അഹ്മദ്(റഹി).

എല്ലാറ്റിന്റെയും മുൻപ് അല്ലാഹു മാത്രം ഉണ്ടായിരുന്ന ആ അവസ്ഥ എന്താണെന്നും ഏതാണെന്നും അതിൻറെ കാല ദൈർഖ്യം എത്രയാണെന്നും ആ കാലത്തിൻറെ അളവ്കോൽ എന്താണെന്നുമൊക്കെ വിശുദ്ധ ഖുർആനും തിരുവച്ചനങ്ങളും എന്തൊക്കെയാണോ പറഞ്ഞത് ആ അറിവ് മാത്രമേ നമ്മുടെ അടുത്തുള്ളൂ, അതിന്റെ അപ്പുറത്ത് നമുക്ക് ഒന്നും അറിയില്ല.

അല്ലാഹു ആദിയിൽ ഉണ്ടായിരുന്ന അവസ്ഥയും, ഇനി അവസാനത്തിൽ അല്ലാഹു മാത്രം ബാകിയാകുന്ന അവസ്ഥയും  മനുഷ്യന്റെ നിസ്സാരമായ ബുദ്ധിക്കോ ചിന്തക്കോ കണ്ടുപിടുത്തങ്ങൾക്കോ ഒരിക്കലും കണ്ടെത്തുവാൻ സാധിക്കാത്ത ഒന്നാണ് . അല്ലാഹും അവന്റെ ദൂതനും എന്തൊന്നു പറഞ്ഞുവോ അത് ഒരു സത്യവിശ്വാസി സത്യപ്പെടുത്തും.

B. അവസാനത്തിൽ, സൃഷ്ടികൾ ഒന്നും തന്നെ ഇല്ലാത്ത ഒരു അവസ്ഥ

സൃഷ്ടികൾ ഒന്നും ഇല്ലാത്ത, അവരെല്ലാം നശിച്ച ഒരു അവസ്ഥ വരും. അന്നും ബാക്കിയാകുന്നവൻ അല്ലാഹു മാത്രമായിരിക്കും. അല്ലാഹു, അവൻ സൃഷ്ടിച്ചതിനെ മുഴുവൻ നശിപ്പിക്കും, എന്നിട്ട് അവൻ മാത്രം ബാക്കിയാകും.

"അല്ലാഹുവോടൊപ്പം വേറെ യാതൊരു ദൈവത്തെയും നീ വിളിച്ച്‌ പ്രാര്‍ത്ഥിക്കുകയും ചെയ്യരുത്‌. അവനല്ലാതെ യാതൊരു ദൈവവുമില്ല. അവന്‍റെ തിരുമുഖം ഒഴികെ എല്ലാ വസ്തുക്കളും നാശമടയുന്നതാണ്‌. അവന്നുള്ളതാണ്‌ വിധികര്‍ത്തൃത്വം. അവങ്കലേക്ക്‌ തന്നെ നിങ്ങള്‍ മടക്കപ്പെടുകയും ചെയ്യും. " - ഖുർആൻ 28:88. 

അല്ലാഹുവല്ലാത്ത സകലതും നശിക്കും. അവൻ മാത്രം ബാകിയാകും.

وَقَوْلُهُ: {كُلُّ شَيْءٍ هَالِكٌ إِلا وَجْهَهُ} : إِخْبَارٌ بِأَنَّهُ الدَّائِمُ الْبَاقِي الْحَيُّ الْقَيُّومُ، الَّذِي تَمُوتُ الْخَلَائِقُ وَلَا يَمُوتُ

"'അവന്‍റെ തിരുമുഖം ഒഴികെ എല്ലാ വസ്തുക്കളും നാശമടയുന്നതാണ്‌. ', അതറിയിക്കുന്നത് - തീർച്ചയായും അവനാകുന്നു എന്നും ബാകിയാകുന്നത്, എന്നെന്നും ജീവിച്ചിരിക്കുന്നവനും, സർവത്തിനെയും നിയന്ത്രിക്കുന്നവനും. അവൻ സൃഷ്ടികളെ മരിപ്പിക്കുന്നു, അവൻ മരിക്കുകയും ഇല്ല. " - ഇബ്നു കസീർ(റഹി), ഖുർആൻ  28:88.

അപ്പോൾ സർവ്വ സൃഷ്ടികളും നശിച്ചതിന്നു ശേഷവും അല്ലാഹു മാത്രമേ ബാക്കി ആവുകയുള്ളൂ.

സൃഷ്ടികൾ ഒന്നും തന്നെ ഇല്ലാത്ത അവസ്ഥ 

നമ്മളിപ്പോൾ സംസാരിക്കുന്നത് ആദിയിൽ അല്ലാഹു മാത്രം ഉണ്ടായിരുന്ന അവസ്ഥയെ കുറിച്ചാണ്. സൃഷ്ടികളെ കുറിച്ചു നമ്മൾ ഒന്നും പറഞ്ഞിട്ടില്ല.

ഇമാം ത്വബരി(റ)  പരിശുദ്ധ ഖുർആൻ 57:3 വചനത്തിൻറെ വിശദീകരണത്തിൽ വീണ്ടും പറയുന്നു -

وَالآخِرُ يقول: والآخر بعد كل شيء بغير نهاية. وإنما قيل ذلك كذلك، لأنه كان ولا شيء موجود سواه

" 'അവൻ അവസാനത്തിൽ ഉള്ളവൻ'. (അതായത്) എല്ലാറിന്റെയും ശേഷം, യാതൊരു അറ്റവും ഇല്ലാതെ. അത് അപ്രകാരം പറയപെട്ടിടുണ്ട് . കാരണം, തീർച്ചയായും ഒന്നും തന്നെ ഉണ്ടായിരുന്നില്ല, അവനെ കൂടാതെ." - ത്വബരി - 57:3 

"അവനെ കൂടാതെ."  എന്നുള്ള ഇമാം ത്വബരിയെപോലുള്ളവരുടെ പ്രയോഗം പ്രത്യേകം ശ്രദ്ദിക്കണം. അറബിയിൽ അതിനു 'സിവാഹു'  അതായത്  'അവനെ (അല്ലാഹുവിനെ) കൂടാതെ' എന്ന് പറയും. ഈ പ്രയോഗം നമ്മൾ വീണ്ടും ചർച്ച ചെയ്യും, ഇന്ഷാ അല്ലാഹു.

അപ്പോൾ, 'ലാ ഇലാഹ ഇല്ലാ അല്ലാഹു' എന്ന് ഒരാൾ പ്രഖ്യാപിക്കുന്നതിന്നു മുൻപ് ഒരാൾ ചോദിക്കേണ്ട, ആരാണ് അല്ലാഹു എന്ന ചോദ്യത്തിന് ഉത്തരം വളരെ വ്യക്തം.

• ആദിയിൽ സകല സൃഷ്ടികൾക്കും മുൻപ് ഉള്ളവൻ അല്ലാഹു.

• അവസാനത്തിൽ സകല സൃഷ്ടികളും നശിച്ചതിന്നു ശേഷശവും ബാക്കിയാകുന്നവൻ  അല്ലാഹു.

ഇവിടെ പറഞ്ഞ കാര്യങ്ങൾ നല്ലവണ്ണം വിലയിരുത്തി, പറഞ്ഞ ഖുർആനിക വചനങ്ങളുടെ അർത്ഥങ്ങളും തഫ്സീറുകളും കഴിവിന്റെ പരമാവധി വായിക്കുക പഠിക്കുക. നമ്മെ എല്ലാവരെയും അല്ലാഹു അനുഗ്രഹിക്കട്ടെ.

തുടരും, ഇന്ഷാ അല്ലാാഹു.

سُبْحَانَ رَبِّكَ رَبِّ الْعِزَّةِ عَمَّا يَصِفُونَ وَسَلَامٌ عَلَى الْمُرْسَلِينَ وَالْحَمْدُ لِلَّهِ رَبِّ الْعَالَمِينَ 
പ്രതാപത്തിന്‍റെ നാഥനായ നിന്‍റെ രക്ഷിതാവ്‌ അവര്‍ ചമച്ചു പറയുന്നതില്‍ നിന്നെല്ലാം എത്ര പരിശുദ്ധന്‍! ദൂതന്‍മാര്‍ക്കു സമാധാനം! ലോകരക്ഷിതാവായ അല്ലാഹുവിന്‌ സ്തുതി!

അബൂ അബ്ദുൽ മന്നാൻ.
 ابو عبد المنان محمد نزامدين  ابن عبداللطيف