Friday, May 18, 2018

മായാ ജലം!

മായാ ജലം!

മായാജാലം എന്ന് കേൾക്കാത്തവർ ഉണ്ടാകില്ല എന്ന് കരുതുന്നു. എൽ.പി. സ്‌കൂളിൽ പഠിക്കുന്ന കാലത്ത് ഒരു രൂപയോ മറ്റോ കൊടുത്ത് മായാജാലം കണ്ടവരാണ് നമ്മിൽ പലരും.

എന്നാൽ ഇവിടെ പറയുന്നത് ഒരു മായാ ജലത്തെ കുറിച്ചാണ്. ആഴിപ്പരപ്പിലെ ഉപ്പു വെള്ളത്തെ വളരെ ലളിതമായി ശുദ്ധീകരിച്ചുണ്ടാക്കുന്ന അത്ഭുത വെള്ളം, കുടിവെള്ളം.

അറബിക്കടലിന്റെ അനന്ത വിസ്‌മൃതിയിലെ ഒരു പച്ച തുരുത്തായ ലക്ഷദ്വീപിൽ ജനങ്ങൾക്ക് കുടിക്കുവാനായി വെള്ളം കണ്ടെത്തുന്നത് തീർത്തും ഉപ്പ് കലർന്ന കടൽ വെള്ളത്തിൽ നിന്നുമാണ്.



കടൽ വെള്ള ശുദ്ധീകണം എന്ന് കേട്ടപ്പോൾ എന്റെ മനസ്സിൽ ഓടിയെത്തിയത് ഒരു പാട് കെമിക്കൽസും മറ്റു സംവിധാനങ്ങളും ഉപയോഗിച്ചുള്ള ഒരു പരിപാടിയെ കുറിച്ചാണ്.

എന്നാൽ കുടിവെള്ള ശുദ്ധീകരണ രംഗത്തെ തീർത്തും വ്യത്യസ്തമായ ഒരു കാഴ്ചയാണ് കവരത്തി ദ്വീപിൽ കാണുവാൻ സാധിച്ചത്.

ലഗൂണിലെ ഉപരിതല ജലം ഒരു ഫ്‌ളാഷ് ചേമ്പറിലേക്ക് പമ്പ് ചെയ്യുമ്പോൾ രൂപപ്പെടുന്ന നീരാവിയെ മറ്റൊരു ചേമ്പറിലേക്ക് കടത്തി വിടുകയും അവിടെ വെച്ച് ആ നീരാവിയെ തണുപ്പിക്കുകയും ചെയ്യുന്നു. ഇങ്ങിനെ തണുപ്പിക്കുമ്പോൾ കിട്ടുന്ന വെള്ളമാണ് കുടിവെള്ളം. വളരെ ലളിതമായ രീതി.

ഏതെങ്കിലും ഒരു അസംസ്‌കൃത വസ്തുവിന്റെ ഒരു ആവശ്യം ഇവിടെ വരുന്നില്ല. ബാക്കിവരുന്ന വെള്ളം കടലിലേക്ക് തന്നെ ഒഴുക്കുകയാണ് ചെയ്യുന്നത്. LTTD (Low Temperature Thermal Desalination) എന്നാണ് ഈ പ്രവർത്തനത്തെ വിളിക്കുന്നത്.



ആദ്യത്തെ ഫ്‌ളാഷ് ചേമ്പറിൽ നൂറു ലിറ്റർ വെള്ളം പമ്പ് ചെയ്യുമ്പോൾ ഒരു ലിറ്റർ വെള്ളത്തിനുള്ള നീരാവി ഉണ്ടാകുന്നു. ആ നീരാവിയെ രണ്ടാമത്തെ ചേമ്പറിൽ വെച്ച് തണുപ്പിക്കുന്നത് കടലിന്റെ ഏകദേശം 350 മീറ്റർ താഴ്ചയിൽ നിന്നും പമ്പ് ചെയ്യുന്ന വെള്ളം ഉപയോഗിച്ചാണ്. 

കടലിന്റെ അടിയിലേക്ക് പോകുംതോറും വെള്ളത്തിന്ന് തണുപ്പ് കൂടും. 350 മീറ്റർ താഴ്ചയിലെ വെള്ളത്തിന്റെ താപം ഏകദേശം 23 ഡിഗ്രിയാണ്.

ഈ കുടിക്കുവാൻ പാകമായ ജലത്തിൽ ഉപ്പിന്റെ അംശം തീരെ ഉണ്ടാകില്ല എന്ന് മാത്രമല്ല ആ വെള്ളത്തിന്ന് നല്ല തണുപ്പും ഉണ്ടായിരിക്കും.

ഇങ്ങിനെ ഉൽപാദിപ്പിക്കുന്ന കുടിവെള്ളത്തിൽ ഉപ്പിന്റെകൂടെ, കാൽസ്യം പോലുള്ള, മനുഷ്യന്ന് ആവശ്യമുള്ള മിനറൽസും പോകും എന്നതാണ് ഈ വെള്ളത്തിന്റെ ഒരു പോരായ്മയായി പറയുന്നത്. എന്നാൽ കാൽസ്യം കൂടുതൽ അടങ്ങിയ ചൂരയും, ക്വിന്റൽ ചൂരയും പോലുള്ള മൽസ്യങ്ങൾ ദ്വീപിൽ സുലഭമായതിനാൽ കാൽസ്യത്തിന്റെ കുറവ് അതു വഴി പരിഹരിക്കപ്പെട്ടേക്കാം.

ശുദ്ധീകരണ തത്വങ്ങൾ ലളിതമാണെങ്കിലും കടലിന്റെ ആഴിയിൽ നിന്നും വെള്ളം പമ്പ് ചെയ്യുവാൻ ഉപയോഗിക്കുന്ന മെഷിനറീസും മറ്റും അൽപ്പം കോംപ്ലക്സ് ആണ് എന്നാണ് മനസ്സിലാക്കുവാൻ സാധിച്ചത്.


മുഹമ്മദ് നിസാമുദ്ധീൻ

ദാരിദ്ര്യത്തിൽ നിന്നും രക്ഷ തേടുക

​​ദാരിദ്ര്യത്തിൽ നിന്നും രക്ഷ തേടുക

ദാരിദ്ര്യം മനുഷ്യനെ പല തിന്മകളിലേക്കും എത്തിക്കും എന്നുള്ളത് ഒരു യാഥാർഥ്യമാണ്.

ഈ അടുത്തു നടന്ന തീയേറ്റർ പീഡനത്തിന്റെ അടിസ്ഥാന കാരണം ദാരിദ്ര്യമാണ് എന്നാണ് മനസ്സിലാക്കുവാൻ സാധിച്ചത്. ​
നബി (സ) പറഞ്ഞു തന്ന ഗുഹയിൽ അകപ്പെട്ട മൂന്നാളുടെ സംഭ​വം ഓർക്കുമല്ലോ. അതിൽ ഒരാൾ മറ്റൊരാളെ ചൂഷണം ചെയ്യുവാൻ ​തുനിഞ്ഞതിന്റെ കാരണം സാമ്പത്തിക പ്രയാസം ആയിരുന്നല്ലോ.  

​ഇവിടെയാണ് നബി(സ) രാവിലെയും വൈകീട്ടും മൂന്ന് പ്രാവശ്യം പ്രാർത്ഥിക്കുവാൻ പറഞ്ഞ പ്രാർത്ഥനയുടെ പ്രസക്തി കടന്നു വരുന്നത്.

​ഇമാം ബുഖാരി അദബുൽ മുഫ്രദിലും, ഇമാം അഹ്മദും,  ഇമാം ​അബൂ ദാവൂ​ദും ഇമാം നസാഈയും ഹസനായ സനദോടെ ഉദ്ധരിച്ച ഹദീസിൽ ഈ പ്രാർത്ഥന കാണാം.

​ ​ ​اللهم عافني في بدني، اللهم عافني في سمعي، اللهم عافني في بصري لا إله إلا أنت، اللهم إني أعوذ بك من الكفر والفقر،  ​وأعوذ بك  من عذاب القبر لا إله إلا أنت ​ ​


"അല്ലാഹുമ്മ ആഫിനീ ഫീ ബദനീ. അല്ലാഹുമ്മ ആഫിനീ ഫീ സംഈ, അല്ലാഹുമ്മ ആഫിനീ ഫീ ബസ്വരീ ലാ ഇലാഹ ഇല്ലാ അൻത്ത. അല്ലാഹുമ്മ ഇന്നീ അഊദുബിക മിനൽ കുഫ്‌രി വൽ ഫഖ്‌ർ. വ അഊദുബിക  മിൻ അദാബിൽ ഖബ്ർ,  ലാ ഇലാഹ ഇല്ലാ അൻത്ത ".

അർത്ഥം: "​അല്ലാഹുവേ എന്റെ ശരീരത്തിൽ നീ സൗഖ്യം പ്രദാനം ചെയ്യേണമേ,​ അല്ലാഹുവേ എന്റെ കേൾവിയിൽ  നീ സൗഖ്യം പ്രദാനം ചെയ്യേണമേ, അല്ലാഹുവേ എന്റെ കാഴ്ച്ചയിൽ  നീ സൗഖ്യം പ്രദാനം ചെയ്യേണമേ. നീ അല്ലാതെ ആരാധനക്കർഹനായി ഒരാളും ഇല്ല. അല്ലാഹുവേ, സത്യ നിഷേധത്തെ തൊട്ടും, ദാരിദ്ര്യത്തെ തൊട്ടും ഞാൻ നിന്നിൽ ശരണം തേടുന്നു,  ഖബർ ശിക്ഷയിൽ നിന്നും ഞാൻ നിന്നിൽ ശരണം തേടുന്നു.  നീ അല്ലാതെ ആരാധനക്കർഹനായി ഒരാളും ഇല്ല."

അബൂ അബ്ദുൽ മന്നാൻ 

Saturday, April 28, 2018

ബന്ധങ്ങൾ പൂത്തുലയട്ടെ

ബന്ധങ്ങൾ പൂത്തുലയട്ടെ

കഴിഞ്ഞ ഏതാനും ആഴ്ചകൾക്ക് മുമ്പ് കോഴിക്കോട് നിന്നും എറണാകുളത്തേക്കുള്ള തീവണ്ടിയിൽ യാത്ര ചെയ്തപ്പോൾ ഉണ്ടായ വളരെ ഹൃദ്യമായ ഒരു അനുഭവമാണ് ഇങ്ങിനെ ഒരു കുറിപ്പെഴുതുവാൻ കാരണം.

തലപ്പാവും താടിയുമൊക്കെയുള്ള ഒരാളായിരുന്നു എന്റെ തൊട്ടടുത്ത സീറ്റിൽ വന്നിരുന്നത്.  ഞാൻ സലാം പറഞ്ഞു. പുഞ്ചിരിക്കുന്ന മുഖത്തോടു കൂടി അദ്ദേഹം സലാം മടക്കി. അങ്ങിനെ പരസ്പരം പരിചയപ്പെട്ടപ്പോഴാണ് അദ്ദേഹം ആരാണെന്ന് മനസ്സിലായത്.

സുന്നീ കേരളത്തിലെ പ്രമുഖനായ പണ്ഡിതനും വാഗ്മിയുമാണ് അദ്ദേഹം. യൂറ്റൂബിലും മറ്റും ലക്ഷങ്ങളുടെ വ്യൂവർഷിപ്പുള്ള പണ്ഡിതൻ.  ഇന്നും ഇന്നലകളിലുമായി സുന്നീ സ്റ്റേജിൽ നിറഞ്ഞു നിൽക്കുന്ന പല പ്രമുഖ പ്രഭാഷകന്മാരുടെയും ഗുരുവര്യൻ.

എന്നാൽ ഇപ്പറഞ്ഞ യോഗ്യതകളുടെ ഒരു തലയെടുപ്പോ ഭാവമോ ഒന്നും തന്നെ അദ്ദേഹത്തിന്റെ സംസാരത്തിലോ ശരീര ഭാഷയിലോ എനിക്ക് കാണാനായില്ല. വളരെ വിനയത്തോടും സ്നേഹത്തോടുമുള്ള അദ്ദേഹത്തിന്റെ സംസാരം എനിക്ക് വല്ലാത്ത ഇഷ്ടമായി.

ചെറുതല്ലാത്ത എന്റെ താടി കണ്ടിട്ടായിരിക്കണം, സംസാരത്തിന്റെ ഇടക്ക് അദ്ദേഹം എന്നോട് ചോദിച്ചു. "സലഫി ആണല്ലേ". ചിരിച്ചുകൊണ്ട് അതെ എന്ന് ഞാൻ പറഞ്ഞു. ഞങ്ങൾ സംസാരം തുടർന്നു.

വളരെ കാലികമായ വിഷയത്തിൽ അദ്ദേഹം ഖുർആനിൽ നിന്നും ഹദീസുകളിൽ നിന്നും എനിക്ക് കുറെ കാര്യങ്ങൾ പറഞ്ഞു തന്നു. അതോടൊപ്പം തന്നെ എന്റെ മനസ്സിൽ ഉണ്ടായിരുന്ന വലിയ ഒരു കാർ മേഘം അദ്ദേഹം നീക്കുകയും ചെയ്തു. അദ്ദേഹം പറഞ്ഞു: മോൻ ഖബറിങ്ങൽ പോയാൽ സിയാറത്ത് നിയ്യത്ത് വെച്ചാൽ മതി. ചോദിക്കേണ്ടത് അല്ലാഹുവിനോട് മാത്രം ചോദിച്ചാൽ മതി.

ആദർശപരമായി വ്യത്യസ്ത തലങ്ങളിലുള്ള ജനങ്ങളെ, ഒരു ഗുണകാംക്ഷയും ഇല്ലാതെ അത്യന്തം വിമർശിച്ചുകൊണ്ട് അന്യാതീനപ്പെടുത്തുന്ന ശൈലികൾ ഒഴിവാക്കുന്നത് നന്നായിരിക്കുമെന്ന് ഞാൻ പറഞ്ഞപ്പോൾ അദ്ദേഹം അത് ശരിയാണെന്നു പറഞ്ഞു.

അങ്ങിനെ എനിക്കെത്തേണ്ട സ്ഥലമായപ്പോൾ, കമ്പാർട്മെന്റിലെ ജനബാഹുല്യം വകവെക്കാതെ ഹൃദയം കൊണ്ടും ശരീരം കൊണ്ടും  പരസ്പരം കെട്ടിപ്പിടിച്ചുകൊണ്ട് സലാം പറഞ്ഞു പിരിഞ്ഞു.

വിഭിന്നങ്ങളായ ആദർശ നിലപാടുകളിൽ നാം ഉറച്ചു തന്നെ നിൽക്കുമ്പോഴും, അല്ലാഹു എന്ന ഒരൊറ്റ ആളുടെ പേരിൽ, പരസ്പര സാഹോദര്യം മുറുകെപ്പിടിച്ച്, പരസ്പരം ഗുണകാംഷികളായി വർത്തിക്കാൻ സാദാരണക്കാർക്കും പണ്ഡിതന്മാർക്കും സാധിക്കട്ടെ എന്ന പ്രാർത്ഥനയോടെ.

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ.

Sunday, April 22, 2018

അവർക്കുള്ള പ്രതിഫലം അവര്‍ കൊന്നൊടുക്കപ്പെടുകയോ, ക്രൂശിക്കപ്പെടുകയോ ചെയ്യലാകുന്നു

അവർക്കുള്ള പ്രതിഫലം അവര്‍ കൊന്നൊടുക്കപ്പെടുകയോ, ക്രൂശിക്കപ്പെടുകയോ അവരുടെ കൈകളും കാലുകളും എതിര്‍വശങ്ങളില്‍ നിന്നായി മുറിച്ചുകളയപ്പെടുകയോ, നാടുകടത്തപ്പെടുകയോ ചെയ്യലാകുന്നു

വർഷം രണ്ടായിരത്തി പന്ത്രണ്ടിൽ ഡൽഹിയിൽ ഒരു പെൺകുട്ടി ഓടുന്ന ബസ്സിൽ വെച്ച് അതി നിഷ്ടൂരമായ പീഡനത്തിനിരയായി കൊല്ലപ്പെട്ടപ്പോഴും, എറണാകുളം ഷൊർണൂർ ട്രെയിനിൽ വെച്ച് മറ്റൊരു സഹോദരി അതി നിഷ്ടൂരമായ പീഡനത്തിനിരയായി കൊല്ലപ്പെട്ടപ്പോഴും, പെരുമ്പാവൂരിലെ നിയമ വിദ്യാർത്ഥിനി അതി നിഷ്ടൂരമായ പീഡനത്തിനിരയായി കൊല്ലപ്പെട്ടപ്പോഴും, ഇന്നിതാ ജമ്മു കാശ്മീർ താഴ്‌വരയിൽ എട്ടു വയസ്സുകാരി അതി നിഷ്ടൂരമായ പീഡനത്തിനിരയായി കൊല്ലപ്പെട്ടപ്പോഴും ഹൃദയത്തിന്റെ ഏതെങ്കിലും ഒരു കോണിൽ മനുഷ്യത്വത്തിന്റെ കണികകൾ അവശേഷിക്കുന്നവർ നടപ്പാക്കണം എന്ന് ഒരേ സ്വരത്തിൽ ആവശ്യപ്പെട്ട ഒരു ശിക്ഷാ നടപടിയാണ് കുറ്റവാളികൾക്ക് തൂക്ക് കയർ വിധിക്കണം എന്നുള്ളത്.

അങ്ങ് ഡൽഹിയിൽ സ്ഥിതി ചെയ്യുന്ന ഇന്ത്യ ഗേറ്റ് മുതൽ ഇങ്ങു കേരളത്തിൽ വരെ, രാജ്യത്തിന്റെ നാനാ തുറകളിലുള്ള ആളുകൾ ഇത്തരം ശിക്ഷ വളരെ പരസ്യമായി ആവശ്യപ്പെട്ടത് കണ്ടവരാണ് നമ്മൾ.

ഈ ഒരു സന്ദര്ഭത്തിലാണ് പരിശുദ്ധ ഖുർആൻ വളരെ കൃത്യമായി മുന്നോട്ട് വെക്കുന്ന ശിക്ഷാ നടപടി കടന്നു വരുന്നത്.

"അല്ലാഹുവോടും അവന്‍റെ ദൂതനോടും പോരാടുകയും, ഭൂമിയില്‍ കുഴപ്പമുണ്ടാക്കാന്‍ ശ്രമിക്കുകയും ചെയ്യുന്നവര്‍ക്കുള്ള പ്രതിഫലം അവര്‍ കൊന്നൊടുക്കപ്പെടുകയോ, ക്രൂശിക്കപ്പെടുകയോ, അവരുടെ കൈകളും കാലുകളും എതിര്‍വശങ്ങളില്‍ നിന്നായി മുറിച്ചുകളയപ്പെടുകയോ, നാടുകടത്തപ്പെടുകയോ ചെയ്യുക മാത്രമാകുന്നു. അതവര്‍ക്ക്‌ ഇഹലോകത്തുള്ള അപമാനമാകുന്നു. പരലോകത്ത്‌ അവര്‍ക്ക്‌ കനത്ത ശിക്ഷയുമുണ്ടായിരിക്കും." - ഖുർആൻ 5:33.

പലപ്പോഴും നിരപരാധികളായ ആളുകളെ വകവരുത്തുവാൻ ഖുർആൻനിതാ പറയുന്നു എന്ന് കാണിച്ചുകൊണ്ട് തൽപര കക്ഷികൾ ഈ വചനത്തെ സന്ദർഭങ്ങളിൽ നിന്നും അടർത്തിയെടുത്തു കൊണ്ട് കുപ്രചരണം നടത്താറുണ്ട് എന്നത് സാന്ദർഭികമായി സൂചിപ്പിക്കുകയാണ്.

ഭൂമിയിൽ മനുഷ്യന്റെ സമാധാന പൂർണ്ണമായ ജീവിതത്തിന്ന് കരുതിക്കൂട്ടി തടസ്സം നിൽക്കുകയും, കൊള്ളയും, കൊള്ളിവെപ്പും, കലാപവും, കൊലപാതകങ്ങളും തുടങ്ങിയ നിഷ്ടൂര കൃത്യങ്ങൾ ചെയ്യുന്ന കുറ്റവാളികൾക്ക് ഇസ്ലാമിക ശിക്ഷാവിധികൾ നിലനിൽക്കുന്ന രാജ്യത്തിലെ ന്യായാധിപന്ന് വിധിക്കാവുന്ന ഏറ്റവും കൂടിയ ശിക്ഷാവിധികളാണ് ഈ വചനത്തിൽ പറയുന്നത്. ഇവിടെ മുസ്ലിമെന്നോ അമുസ്ലിമെന്നോ എന്ന വ്യതാസം ഇല്ല. കുറ്റവാളി ആണോ അല്ലെ എന്നതാണ് മാനദണ്ഡം.

ജൂതന്മാരും, ക്രിസ്ത്യാനികളും, അഗ്നി ആരാധകരും, വിഗ്രഹാരാധകരും മുസ്ലിം സമൂഹങ്ങളും ഒരുമിച്ച് താമസിച്ചിരുന്ന ആറാം നൂറ്റാണ്ടിലെ മദീന പട്ടണത്തിന്റെ ഭരണാധിപനായും ന്യായാധിപനായും മുഹമ്മദ് നബി(സ) അധികാരമേറ്റെടുത്തപ്പോൾ ക്രമാസമാധാന രംഗത്ത് പല ഉച്ചനീചത്വങ്ങളും നിലനിന്നിരുന്നു.

അത്തരമൊരു സന്ദർഭത്തിലാണ് തുല്യ നീതിയും, അർഹിക്കുന്ന ശിക്ഷകളുമൊക്കെ പരാമർശിക്കുന്ന ഈ ഖുർആനിക വചനം അവതരിക്കുന്നത്.

അറേബ്യയിലെ ഒരു ഗോത്രത്തിൽ നിന്നും ചില ആളുകൾ മദീനയിലെ ഭരണാധികാരിയായിരുന്ന മുഹമ്മദ് നബി(സ)യുടെ അടുത്ത് വരികയും അവരുടെ രോഗ ചികിത്സക്ക് വേണ്ടി ഒട്ടക കൂട്ടങ്ങളെയും അതിന്റെ ഇടയനെയും വിട്ടുതരണം എന്ന് ആവശ്യപ്പെടുകയുണ്ടായി. അങ്ങിനെ അവർക്കത് വിട്ടുകൊടുക്കുകയും, അവരുടെ രോഗം മാറിയ ശേഷം ഇടയനെ കൊന്നുകളയുകയും, ഒട്ടക കൂട്ടങ്ങളുമായി അവർ കടന്നു കളയുകയും ചെയ്തു.

ഇത്തരം ഒരു സന്ദര്ഭത്തിലാണ് ഈ ഖുർആനിക വചനം അവതരിക്കുന്നത്. അങ്ങിനെ വിവരം അറിഞ്ഞ പ്രവാചകൻ ഈ സംഘത്തെ പിടികൂടുകയും വധ ശിക്ഷ നടപ്പാക്കുകയും ചെയ്തു.

കുറ്റവാളികൾക്ക് അവർ അർഹിക്കുന്ന ശിക്ഷയും, അതോടൊപ്പം തന്നെ ജീവിച്ചിരിക്കുന്നവരെ കുറ്റകൃത്യങ്ങൾ ചെയ്യുന്നതിൽ നിന്ന് പിന്തിരിപ്പിക്കുക എന്നതുമാണ് ഇസ്‌ലാം വിഭാവന ചെയ്യുന്ന ശിക്ഷാ വിധികളുടെ കാതൽ.

പരിശുദ്ധ ഖുർആനിന്റെ പ്രാമാണിക വ്യഖ്യാതാക്കളിൽ പ്രമുഖനായ 
ഇമാം ഇബ്നു ജരീർ ത്വബരി(റഹി) സൂചിപ്പിച്ച കുറ്റകൃത്യങ്ങളിൽ ചിലതാണ് താഴെ കൊടുത്തത്.

വ്യഭിചാരം,
കളവ് ,
കൊലപാതകം,
വിളകളും കൃഷികളും നശിപ്പിക്കൽ,
കൊള്ള നടത്തൽ,
അന്യന്റെ മുതൽ അപഹരിക്കൽ.

ഇത്തരം കുറ്റകൃത്യങ്ങളുടെ പട്ടികയിലേക്കാണ് ജന ജീവിതം തടസ്സപ്പെടുത്തുന്ന ഹർത്താലുമായി ബന്ധമുള്ള ഒരു കുറ്റകൃത്യം കൂടി കടന്നു വരുന്നത്.

"قطع الطريق وإخافة السبيل"

അഥവാ പൊതുവഴികളിൽ തടസ്സം സൃഷ്ടിക്കുകയും, ജനങ്ങളുടെ സ്വൈര്യ സഞ്ചാരത്തിന്ന് ഭയപ്പാടുണ്ടാക്കുക എന്നതും. വളരെ ഗൗരവത്തിലാണ് ഇസ്‌ലാം ഈ കുറ്റ കൃത്യത്തെ കാണുന്നത് എന്നത് ശ്രദ്ധേയമാണ്.

ഇന്നിന്റെ സാഹചര്യത്തിൽ വളരെ പ്രസക്തമാണ് ഈ കുറ്റ കൃത്യം. ഹർത്താൽ നടത്തി ജന ജീവിതം ദുസ്സഹമാക്കുകയും, ഹർത്താലിന്റെ മറവിൽ പൊതുമുതൽ നശിപ്പിക്കുകയും, അന്യന്റെ മുതൽ കൊള്ളയടിക്കുകയും ചെയ്യുന്ന അവസ്ഥായാണല്ലോ ഇന്നുള്ളത്.

ഇത്തരുണത്തിൽ ജനങ്ങളുടെ വഴിമുടക്കുകയും പൊതുവഴികളിൽ ഭീതി സൃഷ്ടിക്കുന്നവരും ഇസ്‌ലാമിക ശിക്ഷാ നടപടികൾ നിലനിൽക്കുന്ന രാജ്യത്ത് ആണെങ്കിൽ, ഈ വചനത്തിൽ പറഞ്ഞ ശിക്ഷാ വിധികൾക്ക് അർഹരായേക്കാം.

എന്തെങ്കിലുമൊക്കെ കുറ്റ കൃത്യം ചെയ്യുമ്പോഴേക്കും ഈ ശിക്ഷാ വിധികൾ നടപ്പിലാക്കലാണ് എന്ന് ഒരിക്കലും മനസ്സിലാക്കരുത്. അതോടൊപ്പം തന്നെ ശിക്ഷ നടപ്പാക്കൽ ഏതെങ്കിലും ഒരു കൂട്ടം ജനങ്ങളാണ് എന്നും മനസ്സിലാക്കരുത്.

മറിച്ച്, ഉത്തരവാദിത്തപ്പെട്ട ഒരു ന്യായാധിപൻ, കൃത്യമായ അന്വേഷണങ്ങൾക്കൊടുവിൽ, കുറ്റകൃത്യം തെളിഞ്ഞതിന്ന് ശേഷം, അതിന്റെ തോതും, ആ കുറ്റക്രിത്യം കൊണ്ടുണ്ടായ നാശനഷ്ടങ്ങളും ഒക്കെ കണക്കിലെടുത്തുകൊണ്ടാണ് ശിക്ഷ വിധിക്കുക എന്ന് വേണം മനസ്സിലാക്കുവാൻ.

ജനങ്ങളുടെ സുരക്ഷയും, ഭയപ്പാടില്ലാത്ത സഞ്ചാര സ്വാതന്ത്ര്യവും തുല്യ നീതിയുമൊക്കെ നടപ്പാക്കുവാൻ ഇസ്‌ലാം മുന്നോട്ട് വെക്കുന്ന ശിക്ഷാ വിധികളുടെ സമകാലീനമായ പ്രയോഗികതയും അതുമൂലമുണ്ടാകുന്ന വളരെ ഉയർന്ന ക്രമസമാധാനത്തെയും കുറിച്ചൊക്കെ പൊതുജനങ്ങളും വിശിഷ്യാ നിയമ വൃത്തങ്ങളിൽ ഉള്ളവരുമൊക്കെ പഠിക്കേണ്ട സമയമാണ് ഇത് എന്നാണ് അഭിപ്രായം.

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ

Monday, February 19, 2018

അല്ലാഹുവിന്‍റെ ഖുർആനിൽ കാണുന്നില്ലല്ലോ?!

അല്ലാഹുവിന്‍റെ ഖുർആനിൽ കാണുന്നില്ലല്ലോ?!

ഈ ഒരു ചോദ്യത്തിന്ന് മുഹമ്മദ് നബി (സ)യുടെ സ്വഹാബികളുടെ  കാലത്തോളം പഴക്കമുണ്ട്; ഇരുപത്തി ഒന്നാം നൂറ്റാണ്ടിന്റെ പുതുമയും ഉണ്ട്.

ഇസ്‌ലാമിലെ ഒരു വിഷയത്തെ കുറിച്ച് അത് ഖുർആനിൽ ഉണ്ടെങ്കിൽ മാത്രം എടുക്കുകയും അതേ സമയം പരിശുദ്ധ ഖുർആനിനെ ജീവിച്ചു കാണിച്ചു തന്ന, സ്ഥിരപ്പെട്ട ഹദീസുകളിൽ വന്ന തിരു ചര്യകളെ വേണ്ടത്ര ശ്രദ്ധിക്കാതെയും, ഒരു വേള സൗകര്യപൂർവ്വം അവഗണിച്ചുകൊണ്ടും കാര്യങ്ങളെ സമീപിക്കുന്ന സഹോദരങ്ങൾ ബുദ്ധികൊടുത്ത് വിലയിരുത്തേണ്ട ഒരു സംഭവമാണ് ഇവിടെ സൂചിപ്പിക്കുന്നത്.

മുഹമ്മദ് നബി(സ) യെ കണ്ടും കേട്ടും ജീവിച്ച മഹാനായ സ്വഹാബി വര്യൻ ഇബ്നു ഉമർ (റ)നോടാണ് ആ ചോദ്യം ചോദിച്ചത്. ഭയപ്പാടിന്റെ നിസ്‌കാരത്തെ പ്രതിപാദിക്കുന്ന പരിശുദ്ധ ഖുർആൻ വചനം 4:101 ചർച്ച ചെയ്യുന്നിടത്തും മറ്റുമാണ് ഇത്തരമൊരു ചോദ്യത്തെ പണ്ഡിതന്മാർ ഉദ്ധരിക്കുന്നത്.

حدثني يحيى عن مالك عن ابن شهاب عن رجل من آل خالد بن أسيد أنه سأل عبد الله بن عمر فقال يا أبا عبد الرحمن إنا نجد صلاة الخوف وصلاة الحضر في القرآن ولا نجد صلاة السفر فقال ابن عمر يا ابن أخي إن الله عز وجل بعث إلينا محمدا صلى الله عليه وسلم ولا نعلم شيئا فإنما نفعل كما رأيناه يفعل   -  موطأ الإمام مالك  

"അല്ലയോ അബ്ദുറഹ്മാനിന്റെ പിതാവേ - യുദ്ധത്തിന്റെ വേളയിലുള്ള നിസ്‌കാരത്തെ കുറിച്ചും ഭയപ്പാടിന്റെ വേളയിലുള്ള നിസ്‌കാരത്തെ കുറിച്ചും നമ്മൾ ഖുർആനിൽ കാണുന്നു. എന്നാൽ യാത്രയിലുള്ള നിസ്കാരത്തെ കുറിച്ച്‌ (ഖുർആനിൽ) കാണുന്നുമില്ല."

ഭയപ്പാടിന്റെയും യുദ്ധത്തിന്റെയും അവസരത്തിലുള്ള ചുരുക്കി  നിസ്‌കാരത്തെ കുറിച്ച് പരിശുദ്ധ ഖുർആനിൽ കാണുമ്പോൾ, യാത്രാ വേളയിലുള്ള ചുരുക്കി നിസ്‌കാരം ഖുർആനിൽ കാണുന്നില്ല. ഈ ഒരു സന്ദർഭത്തിലാണ് ഖുർആനിൽ കാണിന്നില്ല എന്ന ചോദ്യം വന്നത്.

ഈ ചോദ്യത്തിന്ന് ഇബ്‌നു ഉമർ (റ) കൊടുക്കുന്ന മറുപടിയിലാണ് വിഷയത്തിന്റെ മർമ്മം.

"അപ്പോൾ ഇബ്‌നു ഉമർ (റ) പറഞ്ഞു - ഓ സഹോദര പുത്രാ, പ്രതാപവാനും മഹത്വമുള്ളവനുമായ അല്ലാഹു മുഹമ്മദ് നബി(സ)യെ അയച്ചപ്പോൾ നമുക്ക് ഒന്നും അറിവില്ലായിരുന്നു. തീർച്ചയായും അദ്ദേഹം എന്തൊന്ന് പ്രവൃത്തിക്കുന്നതായി നമ്മൾ കണ്ടുവോ അത് നമ്മൾ പ്രവൃത്തിക്കുന്നു."

യാത്രാ വേളയിലുള്ള ചുരുക്കി നിസ്‌കാരം യഥാർത്ഥത്തിൽ വന്നത് പരിശുദ്ധ ഖുർആനിന്റെ ജീവിത മാതൃകയായ തിരു സുന്നത്തിലൂടെ മാത്രമാണ്.

അപ്പോൾ, ഖുർആനിന്റെ കൂടെ ആ ഖുർആനിനെ ജീവിച്ചു ജീവിച്ചു കാണിച്ചു തന്ന മുഹമ്മദ് നബി(സ)യുടെ ചര്യകൂടി നോക്കാതെ ഒരു സംഗതി ഖുർആനിൽ ഉണ്ടെങ്കിൽ എടുക്കാം അല്ലെങ്കിൽ സ്വന്തം സൗകര്യപ്രകാരവും മറ്റും അതിനെ മാറ്റിവെക്കുന്നവർക്ക് ഇബ്‌നു ഉമർ (റ)ന്റെ മറുപടിയിൽ യഥാർത്ഥ മാതൃകയുണ്ട്‌.

വളരെ സുപ്രധാനമായ കാര്യം എന്തെന്നാൽ പരിശുദ്ധ ഖുർആനും തിരു സുന്നത്തും ഒരിക്കലും വേർപിരിയാതെ, അത് രണ്ടും എത്രത്തോളം അഭേദ്യമാണ് എന്ന വസ്‌തുതയും ഈ ഒരു സംഭവവും അതുപോലുള്ളതും കൃത്യമായി വിരൽ ചൂണ്ടുന്നുണ്ട്.  

കാര്യങ്ങൾ അങ്ങനെയാകുമ്പോൾ,  ലോകാവസാനം വരെയുള്ള ജനതതിക്ക് വേണ്ടി അല്ലാഹുവാൽ സംരക്ഷിക്കപ്പെട്ട ഇസ്‌ലാം അന്നും ഇന്നും എന്നും അതിന്റെ പൂർണ്ണ രൂപത്തിൽ നിലനിൽക്കുന്നത് പരിശുദ്ധ ഖുർആനിനാലും, ആ പരിശുദ്ധ ഖുർആനിനെ ജീവിച്ചു ഉത്തമ മാതൃക സൃഷ്ടിച്ച തിരു നബി(സ)യുടെ ചര്യയാലും, ആ ചര്യയെ സ്വഹാബത്ത് (റ) അനുധാവനം ചെയ്‌ത രീതിയിലുമാണ് എന്നും നമുക്ക് മനസ്സിലാകും.

യുക്തിയുടെയോ മറ്റെന്തെങ്കിലും ഭൗതികതയുടെയോ അളവുകോലുകൾ വെച്ചല്ല മഹാനായ സ്വഹാബി ഇബ്‌നു ഉമർ (റ)  ഖുർആനിൽ കാണുന്നില്ലല്ലോ എന്ന ചോദ്യത്തിന്ന് മറുപടി പറഞ്ഞത്. പകരം, അല്ലാഹുവിന്റെ തിരു ദൂതർ എപ്രകാരം പ്രവൃത്തിച്ചോ അത് അതേപടി സ്വീകരിക്കുക എന്നതാണ് അടിസ്ഥാന തത്വമായി അദ്ദേഹം പറഞ്ഞത്. അത്തരമൊരു നിലപാട് സ്വീകരിച്ച സ്വഹാബത്തിന്റെ നിലപാടാണ് ശരി എന്നാണ് അല്ലാഹു തന്നെ പറയുന്നത്.

"നിങ്ങള്‍ ഈ വിശ്വസിച്ചത്‌ പോലെ അവരും വിശ്വസിച്ചിരുന്നാല്‍ അവര്‍ നേര്‍മാര്‍ഗത്തിലായിക്കഴിഞ്ഞു. അവര്‍ പിന്തിരിഞ്ഞ്‌ കളയുകയാണെങ്കിലോ അവരുടെ നിലപാട്‌ കക്ഷിമാത്സര്യം മാത്രമാകുന്നു." - ഖുർആൻ 2:137. 

അതെ, സ്വാഹാബാത്താകുന്ന നിങ്ങൾ വിശ്വസിച്ചപോലെ അവരും വിശ്വിസിച്ചാൽ അവർ നേർമാർഗത്തിലായി. അല്ല എങ്കിൽ കക്ഷതിത്വത്തിന്റെ പടുകുഴിയിലാണ് അവർ ചെന്നെത്തുക എന്നതാണ് സാരം. 

അപ്പോൾ ഖുർആൻ ഈ ലോകത്ത് നിലനിൽക്കണം എന്നുണ്ടെങ്കിൽ അതിന്റെ കൂടെ ആ ഖുർആനിന്റെ ഏറ്റവും ഉത്തമമായ മാതൃക കൂടി  അന്യൂനമായി നിലനിൽക്കണം എന്നത് അത്യന്താപേക്ഷിതമാണ്. അല്ല എന്നാണെങ്കിൽ, മുഹമ്മദ് നബി(സ)യുടെ സ്ഥിരപ്പെട്ട സുന്നത്തിൽ മാത്രം കാണുന്ന യാത്രയിലുള്ള ചുരുക്കി നിസ്കാരം പോലെയുള്ള ഒരുപാട് വിഷയങ്ങൾ തോന്നുന്നവർ തോന്നുന്ന പോലെ സ്വീകരിക്കുകയും തോന്നുന്നവർ തോന്നുന്ന പോലെ തള്ളിക്കളയുകയും ചെയ്യും ​و​​الله المستعان
  
അബൂ അബ്ദുൽ മന്നാൻ മുഹമ്മദ് നിസാമുദ്ധീൻ.

Sunday, January 28, 2018

ഇഷ്ടമുള്ളവർ വിശ്വസിക്കട്ടെ; ഇഷ്ടമുള്ളവർ അവിശ്വസിക്കട്ടെ

ഇതര ജീവികളില്‍ നിന്നും മനുഷ്യന്‍ എന്ന ജീവി വര്‍ഗത്തെ ഏറ്റവും വ്യതിരിക്തനാക്കുന്നത് ചിന്തിക്കുവാനും അതിനനുസരിച്ച് തിരെഞ്ഞെടുക്കുവാനുമുള്ള അവന്റെ കഴിവും സ്വാതന്ത്ര്യവും ആണല്ലോ.

വൈവിധ്യങ്ങളായ ഭൌതിക പ്രത്യയ ശാസ്ത്രങ്ങളും, രാഷ്ട്രീയ പ്രസ്ഥാനങ്ങളും വിവിധ തരം മതങ്ങളും നിലനിൽക്കുന്ന ലോകമാണല്ലോ ഇത്. വ്യത്യസ്ത ആശയക്കാർ തമ്മിലുള്ള സംവാദങ്ങളും മറ്റുമൊക്കെ പലപ്പോഴും ബഹളങ്ങളിലും കോലാഹലങ്ങളിലും, ഒരുപാട് നീണ്ടുനിൽക്കുന്ന തർക്ക-വിതർക്കങ്ങളിലുമൊക്കെയാണ് അവസാനിക്കാറുള്ളത്.

ഇത്തരമൊരു സന്ദർഭത്തിലാണ് പൂര്‍വ്വ വേദങ്ങളെ മുഴുവനും അവയുടെ യാഥാര്‍ത്ഥ രൂപത്തില്‍ അംഗീകരിച്ചുകൊണ്ടും ലോകത്തെ സര്‍വ്വ ജനങ്ങള്‍ക്കും മാര്‍ഗദര്‍ശനമാണെന്നും പ്രഖ്യാപിച്ചുകൊണ്ടുമുള്ള പരിശുദ്ധ ഖുര്‍ആനിന്റെ ഈ വിഷയത്തിലുള്ള നിലപാട് വളരെ പ്രസക്തമാകുന്നത്.

മതത്തിൽ നിർബന്ധം ചെലുത്തലേ ഇല്ല. ഖുർആൻ 2:256.

ഇഷ്ട്ടമുള്ളവർ വിശ്വസിക്കട്ടെ, ഇഷ്ടമുള്ളവർ അവിശ്വസിക്കട്ടെ. ഖുർആൻ 18:29.

നിങ്ങള്‍ക്ക്‌ നിങ്ങളുടെ മതം. എനിക്ക്‌ എന്‍റെ മതവും. ഖുർആൻ 109:6

പരിശുദ്ധ ഖുർആനിൽ മൂന്ന് വ്യത്യസ്ത  സ്ഥലങ്ങളിൽ പറഞ്ഞ സ്പഷ്ടമായ മൂന്ന് കൽപ്പനകളാണ് മുകളിൽ.

താൻ ശരിയാണെന്ന് വിശ്വസിക്കുന്ന ഒരു ആദർശത്തെ ഒരിക്കലും മറ്റുള്ളവരുടെ മേൽ അടിച്ചേൽപ്പിക്കുവാനോ, നിർബന്ധം ചെലുത്തുവാനോ പാടില്ല എന്ന് വളരെ സ്പഷ്ടമായാണ് പറഞ്ഞിരിക്കുന്നത്.

വൈജ്ഞാനികവും, ധൈഷണികവുമായ സംവാദങ്ങൾ ആകാം. ശരിയെന്ന് തോന്നുന്നുവെങ്കിൽ സ്വീകരിക്കാം, അല്ലെങ്കിൽ  തള്ളിക്കളയാം.

വൈജ്ഞാനികമായ ഒരു സംവാദമോ ചർച്ചയോ ഒക്കെ ഉണ്ടായാൽ അതിൽ  തർക്കിച്ചു-തർക്കിച്ചു നിൽക്കാതെ അവസാനം പറയേണ്ട വാക്കും അർത്ഥശങ്കക്ക് ഇടയില്ലാത്ത വിധം ഖുർആൻ പറഞ്ഞു തന്നു "നിങ്ങള്‍ക്ക്‌ നിങ്ങളുടെ മതം. എനിക്ക്‌ എന്‍റെ മതവും".

എന്റെ മതം മാത്രമേ ഇവിടെ നിലനിൽക്കാവൂ എന്നല്ല പറഞ്ഞത്. മറിച്ച്, നിങ്ങൾക്ക് നിങ്ങളുടെ മതവുമായി മുന്നോട്ട് പോകാം; എനിക്ക് എന്റെ മതവുമായും.

നിർബന്ധം ചെലുത്തരുത് 

പരിശുദ്ധ ഖുർആനിനെ കുറിച്ച് ഒരൽപം അടിസ്ഥാന ബോധമുള്ളവർക്ക് വ്യക്തമായി അറിയുന്ന കാര്യമാണ് അതിലേക് ആരെയെങ്കിലും എന്തെങ്കിലും നിർബന്ധം ചെലുത്തി കൊണ്ടുവരുവാൻ ഒരിക്കലും പാടില്ല എന്നുള്ളത്.

"മതത്തിന്‍റെ കാര്യത്തില്‍ ബലപ്രയോഗമേ. ഇല്ല. സന്‍മാര്‍ഗം ദുര്‍മാര്‍ഗത്തില്‍ നിന്ന്‌ വ്യക്തമായി വേര്‍തിരിഞ്ഞ്‌ കഴിഞ്ഞിരിക്കുന്നു." - ഖുര്‍ആന്‍ 2:256.

മുഹമ്മദ്‌ നബി(സ)യുടെ 23 വര്‍ഷത്തെ പ്രവാചക ജീവിതത്തില്‍ വ്യതസ്ത്യ സമയങ്ങളിലായി അവതരിച്ച ഖുര്‍ആനിലെ ഈ വചനത്തിന്റെ അവതരണ പശ്ചാത്തലം വളരെ പ്രസക്തമാണ്.

"മദീനക്കാരായ അന്‍സ്വാരികളില്‍പെട്ട ചിലര്‍ക്ക് യഹൂദമതമോ ക്രിസ്തീയ മതമോ സ്വീകരിച്ച മക്കളുണ്ടായിരുന്നു. മുസ്‌ലിംകളായ ആ പിതാക്കള്‍ അവരെ തടയുകയും ഇസ്‌ലാം മതം സ്വീകരിക്കുവാന്‍ നിര്‍ബന്ധിക്കുകയും ചെയ്തു. ഈ അവസരത്തിലാണ് ഈ വചനം അവതരിച്ചത്." - അമാനി മൌലവി, ഖുര്‍ആന്‍ 2:256.

മദീന പട്ടണത്തില്‍ നിന്നും ഇസ്ലാം സ്വീകരിച്ച ചില ആളുകള്‍ക്ക് യഹൂദ-ക്രിസ്തീയ മതങ്ങള്‍ സ്വീകരിച്ച മക്കള്‍ ഉണ്ടായിരുന്നു. ആ മക്കളെ ഇസ്ലാം സ്വീകരിക്കുവാന്‍ വേണ്ടി ഇസ്ലാം സ്വീകരിച്ച അവരുടെ പിതാക്കള്‍ നിർബന്ധം ചെലുത്തി. എന്നാല്‍ അങ്ങിനെയൊരു നിര്‍ബന്ധം പാടില്ല എന്ന മഹത്വമേറിയ നിലപാട് തുറന്ന് പ്രഖ്യാപിക്കുകയാണ് പരിശുദ്ധ ഖുര്‍ആന്‍ ഈ വചനത്തിലൂടെ ചെയ്യുന്നത്.

"മതം കേവലം ബാഹ്യമായ ചില ആചാരാനുഷ്ഠാനങ്ങള്‍ മാത്രമല്ല; വിശ്വാസമാണ് അതിന്‍റെ അടിസ്ഥാനം. നിര്‍ബന്ധവും ശക്തിയും ഉപയോഗിച്ച് വിശ്വാസം മാറ്റുവാനും ഉണ്ടാക്കുവാനും സാധ്യമല്ല." - അമാനി മൌലവി, ഖുര്‍ആന്‍ 2:256.

പരിശുദ്ധ ഖുര്‍ആനിന്റെ നിലപാട് ഇവിടെ വളരെ ഉന്നതമാണ്. വിശ്വാസമാണ് മതത്തിന്റെ അടിസ്ഥാനം എന്നിരിക്കെ അതിലേക്ക് ഏതെങ്കിലും ഒരാളെ എന്തെങ്കിലും നിര്‍ബന്ധം ചെലുത്തിയോ അല്ലെങ്കില്‍ എന്തെങ്കിലും പ്രലോഭനങ്ങള്‍ നല്‍കിയോ കൊണ്ടുവരുന്നത് തീര്‍ത്തും നിരര്‍ത്ഥകമാണ്.

സന്മാർഗം ഇന്നതാണെന്നും ദുർമാർഗം ഇന്നതാണെന്നും പരിശുദ്ധ ഖുർആൻ അർത്ഥശങ്കക്ക് ഇടയില്ലാത്ത വിധം വിശദീകരിക്കുന്നുണ്ട്. അതുകൊണ്ടു തന്നെ തിരഞ്ഞെടുക്കുവാൻ സ്വാതന്ത്ര്യമുള്ള മനുഷ്യ ബുദ്ധിയുടെ മുന്നിൽ ആ സന്മാർഗ്ഗ പാത വളരെ തെളിമയോടെ സമർപ്പിക്കുകയാണ് പരിശുദ്ധ ഖുർആൻ ചെയ്യുന്നത്. അതിൽ ഒരാളെയും നിർബന്ധിക്കുകയോ പ്രലോഭിപ്പിക്കുകയോ ചെയ്യേണ്ട ഒരു കാര്യവും ഇല്ല, ആവശ്യവും ഇല്ല.

ഇഷ്ട്ടമുള്ളവർ വിശ്വസിക്കട്ടെ; ഇഷ്ടമുള്ളവർ അവിശ്വസിക്കട്ടെ

"പറയുക: സത്യം നിങ്ങളുടെ രക്ഷിതാവിങ്കല്‍ നിന്നുള്ളതാകുന്നു. അതിനാല്‍ ഇഷ്ടമുള്ളവര്‍ വിശ്വസിക്കട്ടെ. ഇഷ്ടമുള്ളവര്‍ അവിശ്വസിക്കട്ടെ." ഖുര്‍ആന്‍ 18:29.

ഖുർആൻ വീണ്ടും പറയുന്നു. സത്യം ഇന്നതാണെന്നും അസത്യം ഇന്നതാണെന്നും വ്യക്തമാക്കുക എന്നതാണ് ഖുർആനിന്റെ ശൈലി. അത് പഠിച്ചും, മനസ്സിലാക്കിയും വേണമെങ്കിൽ സ്വീകരിക്കാനും അല്ലെങ്കിൽ സ്വീകരിക്കാതിരിക്കുവാനുമുള്ള പരിപൂർണ്ണ സ്വാതന്ത്ര്യം ഖുർആൻ നൽകുന്നു എന്നതുമൊക്കെയാണ് യാഥാർഥ്യം.

നിങ്ങള്‍ക്ക്‌ നിങ്ങളുടെ മതം; എനിക്ക്‌ എന്‍റെ മതവും

"മുഹമ്മദേ, ഞങ്ങളുടെ മതം നീ പിന്‍പറ്റുക. നിന്റെ മതം ഞങ്ങളും പിന്‍പറ്റാം. ഞങ്ങളുടെ ദൈവങ്ങളെ നീയും ആരാധിക്കുക. നിന്റെ ദൈവത്തെ ഞങ്ങളും ആരാധിക്കാം. എന്നാല്‍ നിന്റെതാണ് ഉത്തമമെങ്കില്‍ അതില്‍ ഞങ്ങളും, ഞങ്ങളുടേതാണ് ഉത്തമമെങ്കില്‍ അതില്‍ നീയും ഭാഗഭാക്കാകുമല്ലോ.- അമാനി മൌലവി, ഖുര്‍ആന്‍ 109:6.

മക്കയിലെ വിഗ്രഹാരാധകരായിരുന്ന ആളുകൾ മുഹമ്മദ് നബി(സ)യുടെ മുൻപിൽ സമർപ്പിച്ച ഒരു നീക്കുപോക്ക് നിർദേശമാണ് മുകളിൽ. ഇത്തരം ഒരു നീക്കുപോക്കിനുള്ള മറുപടിയായിക്കൊണ്ടാണ് പരിശുദ്ധ ഖുര്ആനിലെ  അദ്ധ്യായം  109 അവതരിക്കുന്നത്.

"(ബിയേ, ) പറയുക: അവിശ്വാസികളേ,

നിങ്ങള്‍ ആരാധിച്ചുവരുന്നതിനെ ഞാന്‍ ആരാധിക്കുന്നില്ല.

ഞാന്‍ ആരാധിച്ചുവരുന്നതിനെ നിങ്ങളും ആരാധിക്കുന്നവരല്ല.

നിങ്ങള്‍ ആരാധിച്ചുവന്നതിനെ ഞാന്‍ ആരാധിക്കാന്‍ പോകുന്നവനുമല്ല.

ഞാന്‍ ആരാധിച്ചു വരുന്നതിനെ നിങ്ങളും ആരാധിക്കാന്‍ പോകുന്നവരല്ല.

നിങ്ങള്‍ക്ക്‌ നിങ്ങളുടെ മതം. എനിക്ക്‌ എന്‍റെ മതവും." - ഖുർആൻ 109. 

ഏകനായ ആരാധ്യനെ വിട്ട് വ്യത്യസ്തങ്ങളായ ആരാധ്യന്മാരെ സ്വീകരിക്കുക എന്നത് ഒരിക്കലും യോജിക്കുവാൻ പറ്റില്ല എന്നായിരുന്നു മുഹമ്മദ് നബി (സ) അവരോട് പറഞ്ഞത്. 

അതേസമയം ഭൗതികമായ പരസ്പര സഹായങ്ങളിലും, ജനങ്ങളുടെ പൊതുവായ പ്രശ്നങ്ങളിലും, കാര്യങ്ങളിലും എല്ലാം തന്നെ പരസ്പരം സഹകരിച്ചും ഇടപെട്ടും മുന്നോട്ട് പോകുകയും  ചെയ്‌ത വളരെ ഉന്നതമായ ഒരു നിലപാടായിരുന്നു പ്രവാചകൻ മുഹമ്മദ് നബി(സ) ജീവിച്ചു കാണിച്ച  പരിശുദ്ധ ഖുർആനിന്റെ  മാതൃക.

പ്രിയ സഹോദരങ്ങളെ, വ്യത്യസ്ത മതങ്ങളിലും, ആചാരങ്ങളിലും, ആശയങ്ങളിലും ഒക്കെ വിശ്വസിച്ചുകൊണ്ട് തന്നെ നമുക്ക്  ഒന്നിച്ചു ജീവിക്കാം, പരസ്പരം സഹായിക്കാം, പരസ്പരം സഹകരിക്കാം.

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ.

Saturday, September 9, 2017

വേദങ്ങളിലെ ഈശ്വരൻ വിഗ്രഹമോ?

പ്രിയ സുഹൃത്തുക്കളെ,

എറണാകുളം ജില്ലയിലെ പറവൂരിൽ നടന്ന ലഖുലേഖ വിതരണത്തോടനുബന്ധിച്ചുണ്ടായ സംഭവവികാസങ്ങളാണ് ഇങ്ങിനെ ഒരു കുറിപ്പെഴുതുവാൻ കാരണം.

വിഗ്രഹാരാധന തെറ്റാണെന്ന് പറഞ്ഞത് അത് ചെയ്യുന്നവരെ അവഹേളിക്കലാണെന്നാണ് മറ്റ് വിഷശദാംശങ്ങൾ എല്ലാം മാറ്റി നിറുത്തിയാൽ ചാനൽ ചർച്ചയിലും മറ്റും കേൾക്കുവാൻ സാധിച്ചത്.

ഒരാൾക്ക് ഒരു സംഗതി ശരിയാണെന്ന് തോന്നുന്നതും വേറെ ഒരാൾക്ക് അതേ കാര്യം തീർത്തും തെറ്റാണെന്ന് തോന്നുന്നതിന്നുമൊക്കെ മനുഷ്യ രാശിയോളം പഴക്കമുണ്ടല്ലോ. വ്യത്യസ്‌തങ്ങളായ വീക്ഷണങ്ങളും നിലപാടുകളുമൊക്കെ പരസ്‌പരം പങ്ക് വെക്കുന്നതും നല്ല നിലക്ക് സംവദിക്കുന്നതുമൊക്കെ സാംസ്‌കാരിക പുരോഗതിയുടെ നല്ലൊരു അടയാളമായിട്ടാണ് തോന്നിയിട്ടുള്ളത്, ചരിത്രത്തിന്റെ പിൻബലവും അതിനാണുള്ളത്.

വിഗ്രഹാരാധനപോലുള്ളവയിലെ ശരിതെറ്റുകൾ വിലയിരുത്തുന്നത് ഒരു അവഹേളനമാണോ എന്ന് ചോദിച്ചാൽ എനിക്ക് പറയുവാനുള്ളത് അത് അവഹേളനമല്ല, വിമർശനവുമല്ല മറിച്ച് അതൊരു ഗുണകാംഷയാണ്. ഭാരതീയ പശ്ചാത്തലത്തിൽ കടന്നുവന്ന വേദസംഹിതകളിലടക്കം രൂഡമൂലമായിക്കിടക്കുന്ന പ്രപഞ്ചാതീതനായ സൃഷ്ടാവിനെ തന്റെ സഹജീവിക്ക് മനസ്സിലാക്കികൊടുക്കുവാനുള്ള നിഷ്‌കളങ്കവും ആത്മാർത്ഥതയും നിറഞ്ഞ ഗുണകാംഷ.

യഥാർത്ഥത്തിൽ വിഗ്രഹാരാധനയിലെ ശരിതെറ്റുകൾ അന്വേഷിക്കുന്നതിന്ന് മുൻപ് പഠിക്കേണ്ട ഒരു കാര്യമാണ് ആരാണ് ദൈവം എന്നുള്ളത്. എന്തൊരു ശക്തിവിശേഷങ്ങളാണ് ആ ദൈവത്തിനുള്ളത് എന്ന് അറിയുമ്പോൾ മാത്രമേ വിഗ്രഹാരാധനയുടെ ആവശ്യം ഉണ്ടോ ഇല്ലേ എന്ന് ഒരാൾക്ക് തിരിച്ചറിയാൻ സാധിക്കുകയുള്ളൂ.

ആര്യസമാജത്തിന്റെ സ്ഥാപകനും, മലയാളമടക്കം വിവിധ ഭാഷകളിലേക്ക് വിവർത്തനം ചെയ്യപ്പെട്ട "സത്യാർത്ഥ പ്രകാശം" എന്ന ഗ്രന്ഥത്തിന്റെ കർത്താവുമായ സ്വാമി ദയാനന്ദ സരസ്വതി, ആരാണ് ദൈവമെന്നും, എങ്ങിനെ അവനെ മസസ്സിലാക്കാം എന്നും, ദൈവത്തെ ആരാധിക്കുവാൻ വിഗ്രഹത്തിന്റെ ആവശ്യം ഉണ്ടോ ഇല്ലേ എന്നുമൊക്ക വേദവാക്യങ്ങളുടെ അടിസ്ഥാനത്തിൽ വിശദീകരിക്കുന്നുണ്ട്.

ആരാണ് ദൈവം 

ഈ ചോദ്യത്തിന് ഉത്തരം കണ്ടെത്തേണ്ടത് ഓരോ മനുഷ്യരുമാണ്. പിറന്നു വീണ സാഹചര്യം പഠിപ്പിച്ചതാണോ ദൈവം? അറിവില്ലാതെ ഇന്നലെകളിൽ  പിറന്നുവീണ ഒരാൾ ഇന്ന് കണ്ടെത്തുന്നതാണ് ദൈവമെങ്കിൽ പലർക്കും പലത് ദൈവമാകും.

ആരാണ്  ദൈവം എന്നറിയുവാൻ മനുഷ്യന്റെ അറിവിനും കഴിവിന്നും അതീതമായ, സകല സൃഷ്ടികൾക്കും അതീതമായ ഒരു സ്രോതസിന്റെ ആവശ്യകതയാണ് പറഞ്ഞു വരുന്നത്. വേദങ്ങൾ എന്ന് നമുക്കതിനെ വിളിക്കാം. 

"അഹമിന്ത്രോ ന പരാജിഗ്യ ഇദ്ധനം ന മ്ര്യത്യ വേവത സ്ഥേകദാചന: സോമാമിൻമാ സുന്വന്തോ  യാചതാ വസുനമേ. പൂരവ: സറുയേരിഷാഥനാ" - ഋഗ്വേദം 10.48.1.5.

"പരമൈശ്വര്യവാനായ ഞാൻ സൂര്യതുല്യം സകല ലോകങ്ങളെയും പ്രകാശിപ്പിച്ചുകൊണ്ടിരിക്കുന്നവനാണ്. ഞാൻ ഒരിക്കലും പരാജയപ്പെടുകയില്ല. മരിക്കുകയും ഇല്ല.  ലോകമാകുന്ന ധനത്തിന്റെ സൃഷ്ടാവ് ഞാൻ തന്നെ. 

സകല ജഗത്തിന്റെയും സൃഷ്ടികർത്താവും ഞാൻ തന്നെ എന്നറിയുക. 

മാനവരേ! ഐശ്വര്യ ലബ്ധിക്കായി പ്രയത്നിക്കുന്ന നിങ്ങളെല്ലാവരും വിജ്ഞാനാദി ധനത്തെ എന്നോട് തന്നെ അപേക്ഷിച്ച് വാങ്ങുവിൻ. എന്റെ മൈത്രിയെ നിങ്ങൾ ഒരിക്കലും കൈവെടിയരുത്" - സ്വാമി ദയാനന്ദ സരസ്വതി, ഋഗ്വേദം 10.48.1.5, സത്യാർത്ത പ്രകാശം, പേജ് 128.

ലോകങ്ങളെ പടച്ച, ഒരിക്കലും മരിക്കാത്ത, ഒരിക്കലും പരാജിതനാകാത്ത സകല സമ്പത്തിന്റെയും ഉടയവനായ അവനാണ് ദൈവം.

"അഹംധാം ഗൃണതേ പൂർവ്വം വസ്വഹം ബ്രഹ്മ്മകൃണവം മഹ്യം വർധനമ്. അഹംബുവം യജമാനസ്യ ചോദിതായജ്വന: സാക്ഷി വിശ്വാസമിൻ ഭരേ:"- ഋഗ്വേദം 10.49.1.

"സത്യമായി സ്‌തുതിക്കുന്ന മനുഷ്യന്ന് ഞാൻ സനാതനമായ വിജ്ഞാന സമ്പത്ത് നൽകുന്നു. ബ്രഹ്മമെന്ന് കൂടി പേരുള്ള ആ ദൈവത്തെ വെളിവാക്കിയവൻ ഞാൻ തന്നെ. ആ വേദങ്ങൾ വഴിയാം വണ്ണം വെളിവാക്കുന്ന പൊരുളും ഞാൻ തന്നെ. 

വേദത്തിലൂടെ എല്ലാവരുടെയും ജ്ഞാനത്തെ വർദ്ധിപ്പിക്കുന്നതും ഞാൻ തന്നെയാണ്. സജ്ജനങ്ങളെ പ്രവൃത്തിപ്പിക്കുന്നും യജ്ഞങ്ങൾ ചെയ്യുന്നവർക്കു പ്രതിഫലം നൽകുന്നതും ഞാനാകുന്നു. ഈ വിശ്വത്തിലുള്ളതെല്ലാം കാര്യവസ്തുക്കളെയെല്ലാം സൃഷ്ടിച്ചു ധാരണം ചെയ്യുന്നതും ഞാൻ തന്നെ. 

അതിനാൽ നിങ്ങൾ എന്നെ വിട്ട് മറ്റൊന്നിനെയും എനിക്ക് പകരം പൂജിക്കരുത്, മാനിക്കരുത്, അറിയരുത്." - സ്വാമി ദയാനന്ദ സരസ്വതി, ഋഗ്വേദം 10.48.1.5, സത്യാർത്ത പ്രകാശം, പേജ് 128.

ആരാണ് ദൈവം എന്നറിയണം. മനുഷ്യന്ന് സനാതന വിജ്ഞാനം നൽകിയവനാണ് ദൈവം. സകല ജഗത്തെയും സൃഷ്ടിച്ചവനാണ് ദൈവം. ആ സൃഷ്ടാവിനെ വിട്ട് മറ്റൊന്നിനെയും പകരം പൂജിക്കരുത്, മാനിക്കരുത്, അറിയരുത് എന്നാണ് വേദം പറയുന്നത്.

ഈശ്വരനെ അടുത്തറിയേണ്ടത് അവന്റെ നാമങ്ങളിലൂടെ

ആരാണ് ദൈവം എന്ന് മനസ്സിലായാൽ വീണ്ടും വീണ്ടും അവനെ അറിയുവാനുള്ള ആഗ്രഹം സ്വാഭാവികമാണ്. ഐശ്വര്യത്തിൽ രമിക്കുന്നവൻ എന്നർത്ഥമുള്ള ആ ഈശ്വരന്റെ നാമങ്ങളെളെയും ഗുണങ്ങളെയും വിശദീകരിക്കുന്നത് കാണുക.

"ഓം ശന്നോ മിത്ര: ശം വരുണ: ശന്നോ ഭവത്വര്യമാ..."

"അർഥം:- (ഓം) അ, , മ്  എന്നീ മൂന്നു വർണങ്ങൾ  കൂടിച്ചേർന്നുണ്ടായ ഓംകാരപദം ഈശ്വരന്റെ എല്ലാ നാമധേയങ്ങളിലും വച്ച്, സർവോത്തമമായിട്ടുള്ളതാകുന്നു. ഈ നാമധേയത്തിൽ പരമേശ്വരന്റെ അനേകം നാമങ്ങൾ ഉൾകൊള്ളുന്നു. 

ഈ ഓംകാരത്തിന്റെ അവയവമായ അകാരം കൊണ്ട് വിരാട്, അഗ്നി, വിശ്വൻ മുതലായ പേരുകളേയും, ഉകാരം കൊണ്ട് ഹിരണ്യഗർഭൻ, വായു, തൈജസൻ തുടങ്ങിയ പേരുകളെയും; മകാരം കൊണ്ട് ഈശ്വരൻ, ആദിത്യൻ, പ്രാജ്ഞൻ മുതലായ പേരുകളെയും സംഗ്രഹിക്കുന്നു. 

ഈ പറഞ്ഞ നാമങ്ങളെല്ലാം പ്രകാരണങ്ങളനുസരിച്ച് സർവേശ്വരനെത്തന്നെയാണ് കുറിക്കുന്നതെന്നു വേദം മുതലായ സത്യശാസ്ത്രങ്ങളിൽ സ്പഷ്ടമായി വ്യാഖ്യാനിച്ചിട്ടുണ്ട്." - ഈശ്വര നാമങ്ങളുടെ വ്യാഖ്യാനം, സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 1.

ആരാണ് ഈശ്വരനെന്നുള്ള സ്വാമിജിയുടെ വിശദീകരണം തുടരുന്നു. 

"(സബ്രഹ്മാ സ വിഷ്ണു:) ലോകം മുഴുവനും സൃഷ്ടിച്ചത് കാരണം ബ്രഹ്മാവ് എന്നും എല്ലായിടത്തും വ്യാപിച്ചിരിക്കുന്നതുകൊണ്ടു വിഷ്‌ണു എന്നും, ദുഷ്ടന്മാരെ ശിക്ഷിച്ചു വിലപിപ്പിക്കുന്നതുകൊണ്ട് രുദ്രൻ എന്നും, സ്വയം മംഗളസ്വരൂപനും മറ്റുള്ളവർക്ക് മംഗളപ്രദനുമാകയാൽ ശിവൻ എന്നും, ആ സർവേശ്വരന്ന് പേരുകൾ വന്നു" - ഈശ്വര നാമങ്ങളുടെ വ്യാഖ്യാനം, സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 3.

ബ്രഹ്മാവും ശിവനും വിഷ്ണുവും ഒക്കെ ആ ഈശ്വരന്റെ നാമങ്ങളിൽ പെട്ടതാണെന്നാണ് വേദങ്ങൾ ഉൽഘോഷിക്കുന്നത്. 

ഈശ്വരന്റേതായ നൂറ്റിഎട്ടോളം പേരുകൾ പരിചയപ്പെടുത്തിയവയിൽ നിന്നും ചിലത് കാണുക.

"ഈശ്വരൻ  = ഐശ്വര്യത്തിൽ രമിക്കുന്നവൻ 
ബ്രഹ്മാവ്  = ബ്രിഹത് സൃഷ്ടിജ്ഞാനമുള്ളത്
ഭഗവാൻ = ഐശ്വര്യാധിപതി 
അഗ്നി = ഗതിയിൽ നയിക്കുന്നവൻ
ഇന്ദ്രൻ = ഐശ്വര്യപതി
ശിവൻ = സ്വയം മംഗളപ്രദനും ദാതാവുമാകയാൽ
അനാദി = കാരണരഹിതൻ 
ആനന്ദൻ = ധർമിഷ്ഠരുടെ നന്ദനൻ
അര്യമാ  = അനീതിയിൽ രമിക്കാത്തത് 
ശുദ്ധൻ = മറ്റുള്ളതെല്ലാം പരിശുദ്ധമാക്കുന്നത്.
ഹിരണ്യഗർഭൻ = സൂര്യാദി ലോകങ്ങൾ ഏതിൽ നിന്നും ഉൽഭവിച്ചോ അത്
ഗണപതി = ചരാചരഗണങ്ങളുടെ പതി
ആദിത്യൻ = ഒരുകാലത്തും നശിക്കാത്തത്" - ഈശ്വര നാമങ്ങളുടെ വ്യാഖ്യാനം, സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 19.

അപ്പോൾ ഈശ്വരനെ അറിയേണ്ടത് അവന്റെ നാമങ്ങൾ മനസ്സിലാക്കിക്കൊണ്ടായിരിക്കണം; ആ നാമങ്ങളുടെ അർത്ഥവ്യാപ്തി പഠിച്ചു കൊണ്ടായിരിക്കണം എന്നതാണ് വേദ താല്പര്യം.

ഇനിയും, പല ചോദ്യങ്ങൾക്കും ഉത്തരം പറയുന്ന വേളയിൽ ആരാണ് ആ ഈശ്വരൻ എന്ന് വേദ വാക്യങ്ങൾ ഉദ്ധരിച്ചുകൊണ്ട് സ്വാമി വ്യക്തമാക്കുന്നുണ്ട്.

"യൻമനസാന മനുതേ യേനാഹുർമനോമ തമ്, തദേവ ബ്രഹ്മത്വം വിദ്ധി നേദം യദിദമുപാസിതേ." - കേനോപനിഷത്ത് 1:5.

"മനസ്സിൽ "ഇന്നവിധം" എന്ന് മനനത്തിന്ന് വിഷയമായി വരുന്നില്ലയോ, എന്നാൽ മനസ്സിനെ അറിയുന്നതെന്തോ അതിനെത്തന്നെ നീ ബ്രഹ്മ്മമെന്നറിയുകയും ഉപവസിക്കുകയും വേണം. അതിൽ നിന്നും ഭിന്നമായ ജീവൻ അന്ത:കരണം എന്നിവയെ ബ്രഹ്മത്തിന്ന് പകരം ഉപാസിക്കരുത്." - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 239.

"യച്ചക്ഷു ഷാ ന പശ്യതി യേന ച ക്ഷു ഷി, പശ്യതി, തദേവ ബ്രഹ്മത്വം വിദ്ധി നേദം യദിദമുപാസിതേ."- കേനോപനിഷത്ത് 1:6.

"കണ്ണിനാൽ കാണാത്തതെന്തോ എല്ലാ കണ്ണും ഏതിനാൽ കാണുന്നുവോ അതിനെ നീ ബ്രഹ്മമെന്നറിയുക. അതിനെ മാത്രം ഉപാസിക്കുക. അതിൽ നിന്നും ഭിന്നമായ ശബ്ദാദികളെ അതിന്റെ സ്ഥാനത്ത് ഉപാസിക്കാതിരിക്കുക." - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 239.

കാലഘട്ടത്തിന്റെ വളരെ നിസ്സാരമായ കോണിൽ തങ്ങളുടെ മാതാക്കളുടെ ഗർഭാശയത്തിൽ രൂപം കൊള്ളുകയും, വളരെ നിസ്സഹായരായി കൈകാലിട്ടടിച്ച് ഈ ഭൂലോകത്തേക്ക് പിറന്നു വീഴുകയും, ദാഹം, വിശപ്പ്, രോഗം, മറവി, ഭയം, സുഖം, ദുഃഖം, മരണം എന്നിങ്ങനെയുള്ള ദുർബല ഘട്ടങ്ങളിലൂടെ കടന്നുപോയ ഒരാളെ "ദൈവമേ..." എന്ന വിളിയിൽ ഉൾപ്പെടുത്തുവാൻ പറ്റുമോ എന്ന് ചിന്തിക്കുക.

വിഗ്രഹത്തിന്റെ ആവശ്യം ഉണ്ടോ 

സ്വാമിയുടെ മുൻപിൽ ഒരു ചോദ്യം വന്നു.

"ചോദ്യം:- ഈശ്വരൻ നിരാകാരനാണ്. അതിനാൽ ധ്യാനത്തിൽ കൊണ്ടുവരാൻ സാധ്യമല്ല. അതിനാൽ വിഗ്രഹം കൂടിയേ കഴിയൂ. മറ്റൊന്നും ചെയ്യാനാകുന്നില്ലെങ്കിലും വിഗ്രഹത്തിന്നു മുന്നിൽ ചെന്ന് കൈകൂപ്പി ഈശ്വരനെ സ്മരിക്കുകയും നാമം ചൊല്ലുകയും ചെയ്യുന്നതിലെന്താണ് തരക്കേട്‌?" - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 236.

പല സുഹൃത്തുക്കളും നിഷ്കളങ്കമായി ഈ ചോദ്യം ചോദിക്കുന്നത് കേട്ടിട്ടുണ്ട്. വളരെ ലളിതമായ സ്വാമി അതിന്ന് മറുപടി പറയുന്നുണ്ട്.

"ഉത്തരം:- ഈശ്വരൻ നിരാകാരനും സർവവ്യാപിയുമാണ്. ആ ഈശ്വരന്റെ വിഗ്രഹം നിർമ്മിക്കാനേ സാധ്യമല്ല. 

വിഗ്രഹത്തിന്റെ ദർശന മാത്രയിൽ ഈശ്വരസ്മരണയുണ്ടാകുമെങ്കിൽ ഈശ്വരന്റെ അത്ഭുത രചനയായ പൃഥ്വി, ജലം അഗ്നി, വായു, വന വൃക്ഷങ്ങൾ മുതലായ അനേകം വസ്തുക്കളും, ഈ വകയെല്ലാം ഉള്ള ഭൂമി, പർവതങ്ങൾ- ഈശ്വര രചിതമായ ഈ മഹാ മൂർത്തികളിൽ നിന്നാണല്ലോ മനുഷ്യൻ വിഗ്രഹങ്ങൾ ഉണ്ടാക്കുന്നത് - മുതലായവ കണ്ടാൽ ഈശ്വരസ്മരണ ഉണ്ടാകുകയില്ലേ?

ഇല്ലെങ്കിൽ വിഗ്രഹം കണ്ടാൽ ഈശ്വര സ്മരണ വരുമെന്ന് പറയുന്നത് മിഥ്യയാണ്." - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 236, 237.

സത്യമാണത്. വിഗ്രഹങ്ങൾ ഉണ്ടാക്കുവാൻ ഉപയോഗിക്കുന്ന കല്ലും മണ്ണും മറ്റും എല്ലാം തന്നെ ഈശ്വരന്റെ സൃഷ്ടികളായിരിക്കെ അതൊന്നും കാണുമ്പോൾ നിങ്ങൾക്ക് ആ ഈശ്വരനെ ഓർമിക്കുവാൻ  സാധിക്കുന്നില്ലേ എന്നാണ് സ്വാമി ചോദിക്കുന്നത്. ആദ്ദേഹം തന്റെ ഉത്തരം തുടരുന്നു.

"വിഗ്രഹം മുമ്പിലില്ലാത്തപ്പോൾ ഈശ്വര സ്മരണ ഉണ്ടാകാതിരിക്കുന്നത് മനുഷ്യൻ ഏകാന്തതയിൽ ചെന്ന് മോഷണം വ്യഭിചാരം മുതലായ ദുഷ്കർമ്മങ്ങളിൽ ഏർപ്പെടാൻ സാധ്യതയുണ്ട്. 

ഇവിടെ എന്നെ ആരും കാണാനില്ലെന്ന തോന്നൽ നിമിത്തം അവൻ അനർത്ഥം ചെയ്യാതിരിക്കില്ല ഇങ്ങനെ നിരവധി ദൂഷ്യങ്ങൾ ശിലാദി വിഗ്രഹങ്ങളുടെ ആരാധനയിൽ നിന്നുണ്ടാകും. 

നോക്കൂ! ശിലാ വിഗ്രഹങ്ങളെ ആരാധിക്കാതെ സധാ സർവ്വ വ്യാപനും സർവാന്തര്യാമിയും ന്യായക്കാരിയുമായ പരമാത്മാവിനിനെത്തന്നെ  എങ്ങും നിറഞ്ഞവനെന്ന് അറിയുകയും കരുതുകയും ചെയ്യുന്നയാൾ, ക്ഷണ മാത്ര പോലും താൻ ഈശ്വരനിൽ നിന്നകന്നിരിക്കുന്നില്ലന്നറിഞ്ഞു, ദുഷ്കർമ്മം ചെയ്യുന്നത് പോകട്ടെ മനസ്സിൽ ചിന്തിക്കുക പോലുമില്ല. മനസാ വാചാ കർമണാ എന്തെങ്കിലും ചീത്ത ചെയ്‌താൽ അന്തര്യാമിയുടെ ന്യായത്തിൽ നിന്ന് ശിക്ഷ ലഭിക്കാതെ രക്ഷപ്പെടുകയില്ലെന്നയാൾക്കറിയാം" - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 236, 237.

ഒരു വിശദീകരണവും ആവശ്യമില്ലാത്ത വിധം സ്വാമി അവർകൾ കാര്യം വ്യക്തമാക്കിയിട്ടുണ്ട്.

വീണ്ടും അദ്ദേഹത്തിന്ന് മുമ്പിൽ  ചോദ്യം വരുന്നു.

"ഈശ്വരൻ എങ്ങും നിറഞ്ഞവനാണെങ്കിൽ  വിഗ്രഹത്തിലും ഉണ്ട്. ഏതെങ്കിലും വസ്തുവിൽ ഈശ്വരനെ സങ്കൽപ്പിച്ചു ആരാധിക്കുന്നതിൽ തെറ്റെന്താണ്?"  - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 237.

വളരെ ലളിതവും ചിന്തനീയവുമായ ഒരു ഉദാഹരണത്തിലൂടെ സ്വാമി അതിന്ന് ഉത്തരം നൽകുന്നത് കാണുക.

"ഈശ്വരൻ സർവത്ര വ്യാപിച്ചിരിക്കുന്നതിലാൽ ഏതെങ്കിലും ഒരു വസ്തുവിൽ സങ്കൽപ്പിക്കുകയും അന്യത്ര സങ്കൽപ്പിക്കാതിരിക്കുകയും ചെയ്യുകയാണെങ്കിൽ, ചക്രവർത്തിയെ സാമ്രാജ്യാധികാരത്തിൽ നിന്നുമാറ്റി ഒരു ചെറ്റക്കുടിലിൻറെ അധിപനാക്കുന്നതിന്ന് തുല്യമായിരിക്കും. ഇതെത്ര വലിയ അപമാനമാണ്! ഇങ്ങനെ നിങ്ങൾ ഈശ്വരനെ അപമാനിക്കുന്നു." - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 238.

സർവ്വ ലോകങ്ങളുടെയും പതിയായ ഈശ്വരനെ അവന്റെ കേവല സൃഷ്ടികളായ കല്ലിലും മരത്തിലും കാണുന്നതിൻറെ നിരർത്ഥകത വളരെ ശക്തമായ ഒരു ഉദാഹരണത്തിലൂടെ വ്യക്തമാക്കുകയാണ് സ്വാമിജി.

വീണ്ടും ഒരു ചോദ്യം കാണുക. 

"ചോദ്യം:- വേദത്തിൽ അനേകം ഈശ്വരന്മാർ ഉണ്ട്. ഇത് നിങ്ങൾ അംഗീകരിക്കുന്നുവോ ഇല്ലയോ?

ഉത്തരം:- അംഗീകരിക്കുന്നില്ല. എന്തെന്നാൽ നാലു വേദങ്ങളിൽ ഒരിടത്തും അങ്ങിനെ പറഞ്ഞിട്ടില്ല എന്നു മാത്രമല്ല ഒരു ഈശ്വരനേ ഉള്ളെന്നു പറഞ്ഞിട്ടുമുണ്ട് " - സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 127.

വേദങ്ങൾ പരിചപ്പെടുത്തിയ ആ ഈശ്വര വിശ്വാസത്തിൽ വിഗ്രഹങ്ങൾക്ക് സ്ഥാനം വേണോ എന്ന് ഈശ്വരനെ വേദ വാക്യങ്ങളിലൂടെ പഠിച്ചുകൊണ്ടും അടുത്തറിഞ്ഞു കൊണ്ടും തീരുമാനിക്കുക. തീരുമാനം നിങ്ങളുടേതാണ്.

"ഹിരണ്യ ഗർഭ: സമവർത്തതാഗ്രേ ഭൂതസ്യ ജാത പതിരേക  ആസിത്; സദാധാര പൃഥ്വിവിം ദ്യാമുതേമാം കസ്മൈ ദേവായ ഹവിഷാ വിധേമ" - ഋഗ്വേദം 10. 121.1.

"
അല്ലയോ മനുഷ്യ! സൂര്യൻ മുതലായ തേജോമയവസ്തുക്കൾക്ക് ആധാരവും ഇതുവരെ ഉണ്ടായതും ഉണ്ടാകുന്നതും ആയ ലോകത്തിന്റെ ഏകനും അദ്വിതീയനും അധിപനുമായ പരമാത്മാവ് ഈ ജഗത്തിന്റെ ഉത്ഭവത്തിന്നും മുൻപ് ഉണ്ടായിരുന്നു. ഭൂമി മുതൽ സൂര്യൻവരെയുള്ള ജഗത്തിനെ സൃഷ്ടിച്ച ആ പരമാത്മ  ദേവനെ സ്‌നേഹപൂർവ്വം ഭജിക്കുവിൻ" - ഋഗ്വേദം 10. 121.1 സ്വാമി ദയാനന്ദ സരസ്വതി, സത്യാർത്ത പ്രകാശം, പേജ് 153.

മാനവരേ എന്ന് വിളിച്ചുകൊണ്ട്, സകലതിനെയും സൃഷ്ടിച്ച, മരണമില്ലാത്ത എന്നോട് തന്നെ ഐശ്വര്യ ലബ്ധിക്കായും മറ്റും അപേക്ഷിച്ച് വാങ്ങുവിൻ എന്ന വേദ വാക്യം കേൾക്കുമ്പോൾ, അല്ലയോ മനുഷ്യ എന്ന് വിളിച്ചുകൊണ്ട് ജഗത്തിന്റെ മുൻപും ഉണ്ടായിരുന്ന ഏകനായ ആ പരമാത്മാവിനെ സ്‌നേഹപൂർവ്വം ഭജിക്കുവിൻ എന്ന വേദ വാക്യം കേൾക്കുമ്പോൾ,  ഇല്ല, ഞങ്ങൾ ഇന്നലെകളിൽ ഇന്ന സ്ട്രീയുടെയും ഇന്ന പുരുഷന്റെയും മകനായി ജനിക്കുകയും, പിന്നീട് മരണപ്പെടുകയും ചെയ്ത ആളുകളിൽ നിന്നേ ഐശ്വര്യവും മറ്റും ചോദിക്കുകയുള്ളൂ എന്ന് പറയുമ്പോൾ അതിൽ വേദകൽപ്പനകളെ അവഗണിക്കൽ  ഉണ്ടോ?

റഫറൻസ്: http://satyarthprakash.in/download-satyarth-prakash

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ.