Friday, July 20, 2018

വംശീയതയുടെ അപ്പോസ്തലന്മാർക്ക് തലയിൽ ഒരു കിരീടം കൂടി!

വംശീയതയുടെ അപ്പോസ്തലന്മാർക്ക്  തലയിൽ ഒരു കിരീടം കൂടി!

ലോകത്ത് നിലനിൽക്കുന്ന വർഗ്ഗ വംശീയതയുടെ പ്രകടമായ ആൾരൂപവും, ശക്തരായ പ്രയോക്താക്കളുമായ ഇസ്രാഈൽ മക്കൾ, അവരുടെ "രാജ്യത്തെ" ജൂതന്മാർക്ക് മാത്രമായുള്ള ഒരു സ്ഥലമായി പ്രഖ്യാപിച്ചിരിക്കുകയാണ്.

അവിടങ്ങളിൽ ജീവിക്കുന്ന ജൂതന്മാരല്ലാത്ത മറ്റു ആളുകൾക്ക് വോട്ടവകാശം വരെ നിഷേധിക്കുന്ന തീർത്തും അന്യായമായ ഒരു നീക്കമാണ് അവരുടെ നിയമ നിർമാണ സഭ ഇന്നലെ പാസ്സാക്കിയ ബില്ലിന്റെ കാതൽ.

എന്ത് കൊണ്ട് വംശീയതയുടെ ആളുകളായി ഇസ്രാഈൽ മക്കളെ വിശേഷിപ്പിച്ചു എന്ന് ചോദിച്ചാൽ, അതാണ് തുടക്കം മുതൽ ഇന്നു വരെയുള്ള  അവരുടെ ചരിത്രം എന്നതാണ് അതിനുള്ള ഉത്തരം. 

മഹാനായ ദൈവിക ദൂതൻ യഅകൂബ് നബിയുടെ പന്ത്രണ്ട് മക്കളിൽ നിന്നുണ്ടായ വംശപരമ്പരയായിട്ടാണ് ഇസ്രാഈൽ സന്തതികൾ അന്നും ഇന്നും നിലകൊള്ളുന്നത്. 

ആ പന്ത്രണ്ടു മക്കളിലെ ഒരു ഇളയ മകനോട് മറ്റ് മക്കൾക്കുണ്ടായ അടങ്ങാത്ത വിദ്വേഷവും, അവസാനം ആ ഇളയ മകനെ കൊലപ്പെടുത്തുവാനും, ഇല്ലായ്മ ചെയ്യുവാനും വേണ്ടി അവർ നടത്തിയ ഗൂഢാലോചനകളെ കുറിച്ചുമൊക്കെ ബൈബിളിലും ഖുർആനിലും കാണാവുന്നതാണ്. അവർക്കിടയിൽ തന്നെ അന്യായങ്ങൾ നിലനിന്നിരുന്നു എന്നതാണ് ഇത്തരം സംഭവങ്ങൾ കാണിക്കുന്നത്.

യഹൂദികൾ എന്നറിയപ്പെടുന്ന ഇസ്രാഈൽ സന്തതികളുടെ ഒരു പ്രധാനപ്പെട്ട വാദമാണ് ദൈവത്തിന്റെ പ്രത്യേകം തിരഞ്ഞെടുക്കപ്പെട്ട ആളുകളാണ് അവർ എന്നത്. ലോകത്തുള്ള മറ്റു ഒരു ജനവിഭാഗത്തിന്നും ആ പദവി ഇല്ല എന്നതാണ് അവരുടെ വിശ്വാസം. 

ആ വിശ്വാസത്തെ കുറിച്ച് പരിശുദ്ധ ഖുർആനിൽ പലസ്ഥലങ്ങളിലും പ്രതിപാധിച്ചതായി കാണാവുന്നതാണ്.

"(നബിയേ ) പറയുക: തീര്‍ച്ചയായും യഹൂദികളായുള്ളവരേ, മറ്റു മനുഷ്യരെ കൂടാതെ നിങ്ങള്‍ മാത്രം അല്ലാഹുവിന്‍റെ മിത്രങ്ങളാണെന്ന്‌ നിങ്ങള്‍ വാദിക്കുകയാണെങ്കില്‍ നിങ്ങള്‍ മരണം കൊതിക്കുക. നിങ്ങള്‍ സത്യവാന്‍മാരാണെങ്കില്‍." - ഖുർആൻ 62:6.

ലോകത്തിലെ മറ്റു ജനങ്ങൾക്കില്ലാത്ത, മറ്റു ജനങ്ങൾക്ക് ഒരു തരത്തിലും നേടിയെടുക്കുവാൻ സാധിക്കാത്ത, ഇസ്രാഈൽ മക്കളുടെ സന്തതി പരമ്പരയിൽ ജനിച്ചവർക്ക് മാത്രം, (ജനനം കൊണ്ട് മാത്രം) ദൈവിക സന്നിധിയിൽ ഒരു പ്രത്യേക സ്ഥാനം ഉണ്ട് എന്ന അടിസ്ഥാന വിശ്വാസമാണ് നാളിതുവരെ അവർ നടത്തിക്കൊണ്ടിരിക്കുന്ന സകല വംശീയതകളുടെയും അടിസ്ഥാനം എന്ന് കാണാവുന്നതാണ്.

തങ്ങളുടെ താന്തോന്നിത്തങ്ങൾക്കും, ദേഹേച്ഛക്കും ഒക്കെ എതിരായി ദൈവിക ദൂതന്മാർ അവരിലേക്ക് വരുമ്പോഴൊക്കെ, അവരെ നിഷേധിക്കുകയും, പരിഹസിക്കുകയും, ഒരു വേള കൊന്നുകളയുകയും ചെയ്തതാണ് ബഹുഭൂരിഭാഗം വരുന്ന ഇസ്രാഈൽ മക്കളുടെ ചരിത്രം.

"യരുശലേമേ, യരുശ​ലേമേ, പ്രവാ​ച​ക​ന്മാ​രെ കൊല്ലു​ക​യും നിന്റെ അടു​ത്തേക്ക്‌ അയയ്‌ക്കു​ന്ന​വരെ കല്ലെറി​യു​ക​യും ചെയ്യു​ന്ന​വളേ" എന്ന ലൂക്കോസിന്റെ 13:34 വചനം ചൂണ്ടിക്കാണിക്കുന്നതും ഇസ്രാഈൽ മക്കളുടെ തികഞ്ഞ നിഷേധത്തെയും, അതിക്രമത്തെയും കുറിച്ചാണ്.

വംശീയതയുടെയും വിദ്വേഷത്തിന്റെയും ഭാഗമായി നടത്തിക്കൊണ്ടിരിക്കുന്ന ഭൂമിവെട്ടിപ്പിടിക്കലിന്റെയും, മറ്റു മത വിഭാഗങ്ങളെ ഉന്മൂലനം ചെയ്യുന്നതിന്റെയും ഏറ്റവും പ്രകടമായ സംഭവ വികാസങ്ങളാണ് യഥാർത്ഥത്തിൽ സിറിയയിൽ ഐസിസ് എന്ന കാപട്യത്തിന്റെ മുഖംമൂടി ധരിച്ചുകൊണ്ട് ഇസ്രാഈൽ നടത്തിക്കൊണ്ടിരിക്കുന്നത്. റഷ്യയുടെ ഇടപെടൽ മൂലം ആ നീക്കം അവസാനം പാളി എന്നത് വേറെ ഒരു വശമാണ്.

സിറിയയിലെ മുസ്ലികളെയും, അവരുടെ ആരാധനാലയങ്ങളെയും മാത്രമല്ല അവർ തകർത്തെറിഞ്ഞത്. നൂറ്റാണ്ടുകളോളം സിറിയയിൽ നിലനിൽക്കുന്ന അവിടുത്തെ ക്രിസ്ത്യൻ ചർച്ചുകൾ ബോംബിട്ട് തകർക്കുകയും, അവിടെ താമസിച്ചുകൊണ്ടിരിക്കുന്ന ക്രൈസ്തവ സഹോദരങ്ങളെ ഐസിസിന്റെ മറപിടിച്ച്‌ കൊന്നൊടുക്കിയുമാണ് അവർ മുന്നേറിക്കൊണ്ടിരിക്കുന്നത് .

വംശീയ ഉന്മൂലനങ്ങൾക്കും, വിധ്വംസക പ്രവർത്തങ്ങളൾക്കുമൊക്കെ മുകളിൽ സൂചിപ്പിച്ച പ്രത്യയശാസ്ത്രപരമായ അടിത്തറ ഉണ്ട് എന്നത് കൊണ്ടാണ് അവരുടെ ചരിത്രത്തിന്റെ തുടക്കം മുതൽ നാളിതുവരെ ഇത്തരം നീചകൃത്യങ്ങൾക്ക് ഇസ്രാഈൽ മക്കൾ ഒളിഞ്ഞും തെളിഞ്ഞും നേതൃത്വം നൽകിവരുന്നത്.

ഈ അതിക്രമങ്ങൾ ഏതറ്റം വരെ പോകുമെന്ന് ചോദിച്ചാൽ, ഏതൊരു ജീസസ്സിനെ അവർ കൊലപ്പെടുത്തി എന്ന് വാദിച്ചുവോ, ആ മർയമിന്റെ പുത്രൻ ജീസസ് അഥവാ ഈസ(അ) ഇന്നത്തെ സിറിയൻ തലസ്ഥാനമായ ഡമസ്കസിൽ സ്ഥിതിചെയ്യുന്ന ഉമയ്യാദ് പള്ളിയുടെ കിഴക്കൻ മിനാരത്തിൽ വന്നിറങ്ങുന്നത്  വരെ എന്നാണ് മനസ്സിലാക്കുവാൻ സാധിച്ചത്.

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ

Monday, July 16, 2018

യഥാർത്ഥ രാമ രാജ്യം പുലരട്ടെ

യഥാർത്ഥ രാമ രാജ്യം പുലരട്ടെ

അടുത്ത തിരഞ്ഞെടുപ്പിലൂടെ ഇന്ത്യയെ ഒരു മതാധിഷ്ടിത രാജ്യമാക്കുകയാണ് ഭരണകക്ഷിയുടെ താൽപര്യം എന്ന് ഒരു പ്രതിപക്ഷ നേതാവ് പറഞ്ഞതും അതിനോടനുബന്ധിച്ചുണ്ടായ പ്രതികരണങ്ങളുമാണ് ഇങ്ങിനെ ഒന്നെഴുതുവാൻ പ്രേരണ നൽകിയത്.

സന്തുഷ്ടിയും സമൃദ്ധിയും നിറഞ്ഞ കോസലാ മഹാരാജ്യത്തിലെ പ്രധാനാ നഗരവുമായിരുന്ന അയോദ്ധ്യപുരിയെയാണ് രാമാ രാജ്യത്തിന്റെ നെടുംതൂണായി രാമായണത്തിൽ കാണുവാൻ സാധിക്കുന്നത്.

സത്യം മാത്രം പറയുന്ന, ആറു വേദങ്ങൾ പഠിച്ച, ധർമ്മത്തെ നന്നായി ആശ്രയിച്ച, നന്മയിൽ വർത്തിക്കുന്ന മന്ത്രിമാരാൽ സഹായിക്കപ്പെട്ട ചന്ദ്ര ശോഭയുള്ള ദശരഥ രാജാവിനാൽ ഭരിക്കപ്പെട്ട, ആരാലും കീഴടക്കുവാൻ സാധിക്കാത്ത അയോദ്ധ്യ.

മണ്ണിന്റെ മക്കൾ വാദം ഉന്നയിക്കാത്ത, നാനാ ദേശവാസികളായ വ്യാപാരികളാൽ ശോഭിക്കപ്പെട്ടിരുന്ന രാജ്യമാണ് രാമായണത്തിലെ അയോദ്ധ്യ. കാമവെറിയുള്ളവനോ, ഗുണഹീനനോ, നാസ്തികനോ, ക്രൂരനോ ഇല്ലാത്ത രാജ്യമാണ് രാമായണത്തിലെ അയോദ്ധ്യ. 

ഇങ്ങിനെ ഒരു പാട് നല്ല വിശേഷണങ്ങളുള്ള സമാധാന പൂർണ്ണമായ ഒരു രാജ്യമായിട്ടാണ് രാമായണത്തിലെ അയോദ്ധ്യ നിലകൊള്ളുന്നത്.

എന്നാൽ രാമ രാജ്യമാണ് തങ്ങളുടെ ലക്ഷ്യമെന്ന് പറയുമ്പോൾ, രാമായണത്തിലെ അയോദ്ധ്യാ രാജ്യം ഒരു വഴിക്കും, രാമ രാജ്യം ലക്ഷ്യമാക്കിയവർ അതിന്റെ നേരെ എതിർ ദിശയിലേക്കും പോകുന്ന കാഴ്ചക്കാണ് ഇന്ത്യാ മഹാരാജ്യം സാക്ഷിയായിട്ടുള്ളത്. 

അയോദ്ധ്യയുടെ അധിപനായി വാഴുന്നതിന്റെ തലേ ദിവസം, തന്റെ ഉള്ളം കയ്യിൽ വന്ന അധികാരമെല്ലാം ത്യജിച്ചുകൊണ്ട്, നീണ്ട പതിനാല് വർഷത്തെ കാനന വാസത്തിന്ന് പോകുന്ന ശ്രീ രാമനെ രാമായണം വരച്ചു കാണിക്കുമ്പോൾ, അധികാരത്തിന്ന് വേണ്ടി ജനങ്ങളെ വർഗീയമായി ചേരിതിരിച്ച്, തമ്മിൽ തല്ലിച്ച്, രക്തം ചിന്തിക്കുന്ന വെറുപ്പിന്റെ പ്രത്യയ ശാസ്ത്രമാണ് രാമാരാജ്യമാണ് ഞങ്ങളുടെ ലക്ഷ്യം എന്ന് പറയുന്നവർ നടപ്പാക്കുന്നത്.

രാമായണ കാവ്യത്തെ ആറ്റിക്കുറുക്കി, അതിന്റെ ആകെത്തുക "ഹിംസ അരുത്" എന്നതാണ് എന്ന് പ്രഖ്യാപിക്കുകയും, അത് തന്റെ ജീവിതം കൊണ്ട് കാണിക്കുകയും ചെയ്ത രാഷ്ട്ര പിതാവായ മഹാത്മാ ഗാന്ധിജിയുടെ നെഞ്ചിൽ വെടിയുതിർത്ത് ജീവനെടുത്താതാണ് രാമരാജ്യത്തിന്റെ അവകാശം ഏറ്റെടുത്ത ആളുകൾ ഇന്ത്യക്ക് സമ്മാനിച്ചത്. 

കുറ്റമില്ലാത്ത പുരുഷനെ, ശത്രുവായിരുന്നാൽ പോലും ഹിംസിക്കുകയില്ല എന്ന രാമായണ വാക്യത്തെ നെഞ്ചിലേറ്റിയ ആളുകൾ എവിടെ?

അഹിംസക്ക് വേണ്ടി നിലകൊണ്ട മഹാത്മാ ഗാന്ധിയുടെ നാടായ ഗുജറാത്തിന്റെ മണ്ണിൽ, ജീവന്ന് വേണ്ടി യാചിക്കുന്ന, നിറഞ്ഞ കണ്ണുകളോടെ കൈകൂപ്പി നിൽക്കുന്ന കുത്തുബുദ്ധീൻ അൻസാരിമാരെയും, ഊരിപ്പിടിച്ച വാളുമായി ആർത്തട്ടഹസിക്കുന്ന അശോക് മോച്ചിമാരെയുമൊക്കെയാണ് രാമരാജ്യത്തിന്റെ അവകാശം ഏറ്റെടുത്ത ആളുകൾ ഇന്ത്യക്ക് സമ്മാനിച്ചത്. 

അസൂയ ഉള്ളവരോ, ശക്തിയറ്റവനോ, ദീനതയാർന്നവനോ, വ്യാകുല ചിത്തനായവനോ, വ്യാധിപീഡിതനോ ഇല്ലാത്ത രാജ്യമെന്ന് വാൽമീകി മഹർഷി വിശേഷിപ്പിച്ച  രാമായണത്തിലെ അയോദ്ധ്യ എവിടെ? 

രാമായണത്തിലെ അയോദ്ധ്യ സമാധാന പൂർണ്ണമായി നിലകൊള്ളുമ്പോൾ, ആ ഭൂമിയെ സംഘർഷ ഭൂയായി മാറ്റുകയും, അത് തങ്ങളുടെ അധികാരത്തിലേക്കുള്ള കുറിക്കുവഴിയായി ഇന്നും കൊണ്ട് നടക്കുകയും ചെയ്യുന്ന ആളുകൾ രാമ രാജ്യമാണ് ഞങ്ങളുടെ ലക്ഷ്യമെന്ന് പറയുമ്പോൾ, അല്ല ശാന്തികുടികൊണ്ട രാമരാജ്യത്തെ തച്ചുതകർക്കാൻ ഒരുമ്പെട്ട രാവണ രാജ്യമാണ് നിങ്ങളുടെ ലക്ഷ്യം എന്നാണ് ഇതിനെല്ലാം സാക്ഷിയായവർക്ക് പറയാനുള്ളത്.

അബൂ അബ്ദുൽ മന്നാൻ

Tuesday, July 3, 2018

നഷ്ടപ്പെട്ടത് നിഷ്കളങ്കതയുടെ രണ്ടു മുഖങ്ങൾ

നഷ്ടപ്പെട്ടത് നിഷ്കളങ്കതയുടെ രണ്ടു മുഖങ്ങൾ

സഹോദരൻ അരിയിൽ ശുക്കൂറിന്ന് ശേഷം മനസ്സിനെ പിടിച്ചുലച്ച ഒന്നാണ് സഹോദരൻ അഭിമന്യുവിന്റെ കൊലപാതകം.

കാപാലിക രാഷ്ട്രീയക്കാരുടെ കരാളഹസ്തങ്ങളാൽ നിഷ്കരുണം ചവിട്ടിമെതിക്കപ്പെട്ട യുവത്വത്തിൻറെ മിഥുനങ്ങൾ നാമ്പിട്ടു തുടങ്ങിയിട്ടേ ഉണ്ടായിരുന്ന രണ്ടു മുഖങ്ങൾ.

രണ്ടു പേരുടെയും രാഷ്ട്രീയമായ നിലപാടുകൾ എന്തുമായിക്കോട്ടെ, തങ്ങൾ നിലകൊണ്ടിരുന്ന കർമ്മ വീഥികളിൽ നിസ്വാർത്ഥമായി കുതിച്ചു മുന്നേറുവാൻ വെമ്പൽ കൊള്ളുന്നത് ആ മുഖങ്ങളിൽ നിന്നും ആർക്കും വായിച്ചെടുക്കാം.

കൊന്നവരുടെയും, കൊല്ലപ്പെട്ടവരുടെയും പേരിലെ മതം ചികഞ്ഞുകൊണ്ട്, ഇവിടെ സൂചിപ്പിക്കപ്പെട്ട കൊലപാതകങ്ങളിൽ ഒന്ന് തീവ്രവാദമാണെന്നാണ് ഉത്തരവാദിത്വപ്പെട്ട രാഷ്ട്രീയ കേന്ദ്രങ്ങൾ ഇപ്പോൾ കണ്ടെത്തിയിരിക്കുന്നത്.

അരിയിൽ ഷുക്കൂറിന്റെ നെഞ്ചിൽ കടാര കുത്തി ഇറക്കിയവനും അഭിമന്യുവിന്റെ നെഞ്ചിൽ കടാര കുത്തി ഇറക്കിയവനും ഭീകര വാദികൾ തന്നെയാണ്; അരിയാഹാരം കഴിക്കുന്നവർക്ക് മറ്റൊരു ഡെക്കറേഷൻ ആവശ്യമില്ല.

നിഷ്പക്ഷമായും നീതിയുക്തമായും ശിക്ഷ നടപ്പാക്കുവാനുള്ള ചങ്കുറപ്പാണ് ഭരണാധികാരികളിൽ നിന്നും നീതിപീഠങ്ങളിൽ നിന്നും പൊതുജനം പ്രതീക്ഷിക്കുന്നത്. അതല്ലാതെ, സ്വന്തം പാർട്ടിയിൽ പെട്ടവനാണെങ്കിൽ ഒരു നീതിയും, അല്ലാത്തവനാണെങ്കിൽ വേറെ നീതിയും അല്ല വേണ്ടത്.

ഒരു കുട്ടിയുടെ കൊലപാതകവുമായി ബന്ധപ്പെട്ടുകൊണ്ട് മഹാനായ ഖലീഫ ഉമർ ആറാം നൂറ്റാണ്ടിൽ നടത്തിയ പ്രസ്താവന ഇന്നത്തെയും എന്നത്തേയും ഭരണാധികാരികൾക്ക് പ്രചോദനമാകേണ്ടതുണ്ട് എന്നാണ് അഭിപ്രായം.

"സൻആയിലെ (ഇന്നത്തെ യമനിന്റെ തലസ്ഥാനത്തിലെ) മുഴുവൻ ആളുകളും ആ കുട്ടിയെ കൊന്നതിൽ പങ്കുണ്ടെങ്കിൽ, അവരെ മുഴുവനും പകരം കൊല്ലുമായിരുന്നു" എന്നാണ് ഖലീഫ ഉമർ പ്രഖ്യാപിച്ചത്.

കുത്തിയവനെ മാത്രമല്ല, കുത്താൻ കത്തി നൽകിയവനെയും, വാഹനം ഒരുക്കിക്കൊടുത്തവനെയും, റൂട്ട് കാണിച്ചുകൊടുത്തവനെയും, പിറകിൽ നിന്നും കൈ പിടിച്ചുവച്ചവനെയുമൊക്കെ നീതി പീഠത്തിൽ ഹാജരാക്കി, ശിക്ഷയായിക്കൊണ്ട് എല്ലാറ്റിന്റെയും തലവെട്ടിക്കളയും എന്ന്.

കൊല്ലപ്പെട്ടവനോടും അവന്റെ കുടുംബത്തോടുമുള്ള നീതിയും, ജീവിച്ചിരിക്കുന്നവർക്കുള്ള താക്കീതുമാണ് ഇത്തരം ശിക്ഷാ നടപടികൾ.

മനഃസാക്ഷി ഉള്ളവർക്ക് അംഗീകരിക്കാനാവില്ല ഇതെന്നല്ല, ഒരു കൊലപാതകവും. അതിനെ രാഷ്രീയമെന്നും തീവ്രവാദമെന്നുമൊക്കെ തരം തിരിക്കുന്നത്, നീതി നിർവഹണത്തിൽ നിന്നും, ഏറ്റെടുത്ത ഉത്തരവാദിത്വത്തിൽ നിന്നുമൊക്കെയുള്ള ഒളിച്ചോട്ടമാണ് എന്നാണ് സൂചിപ്പിക്കുവാനുള്ളത്.

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ

Thursday, June 14, 2018

ആഘോഷവും ആരാധനയാണ്

ആഘോഷവും ആരാധനയാണ്

ആഘോഷത്തിന്റെ കാമ്പ് ദൈവ ഭക്തിയാണ്. ഈ ആഘോഷം വെറും ഒരു "ആഘോഷമല്ല" മറിച്ച് ആരാധനയാണ്; ദൈവ ഭക്തിയിലേക്കും സകല നന്മകളിലേക്കും, പാപമോചനത്തിലേക്കും ഓടി അടുക്കുന്ന ആരാധനയിൽ അധിഷ്ഠിതമായ ആഘോഷം.

പാവപ്പെട്ടവന്ന് ഭക്ഷണം നൽകുന്ന വേളയാണ് "ഈദുൽ ഫിത്ർ" എന്ന ആഘോഷ ദിവസത്തിന്റെ ഒരു പ്രധാന വശം. അന്നേ ദിവസം ദരിദ്രന്റെ പട്ടിണിമാറ്റാത്തവന്ന് ആഘോഷിക്കാൻ അർഹതയില്ല.

ധാർമിക മൂല്യങ്ങളുടെ പരിധികൾ പാലിക്കുന്നതടക്കമുള്ള ഒരു മാസത്തെ പരിശീലനത്തിന്റെ സമാപ്തിയാണ് ഈ ദിനം. അത് കൊണ്ടുതന്നെ ആ പരിസമാപ്തി ഘട്ടത്തിലും പരിധികൾ പാലിക്കപ്പെടേണ്ടതുണ്ട്.

പൊതുവഴികൾ മുടക്കിക്കൊണ്ടുള്ള വമ്പൻ പ്രകടനങ്ങൾ ഈ ആഘോഷത്തിന്ന് അന്യമാണ്. പൊതു വഴിയിൽ നിന്നും തടസ്സങ്ങൾ നീക്കം ചെയ്യുന്നത് സത്യവിശ്വാസത്തിന്റെ ഭാഗമായി പഠിപ്പിക്കപ്പെട്ട ഒരു പ്രവാചക അനുചരന്ന് എങ്ങിനെയാണ് ഒരു വഴി മുടക്കിയാകുവാൻ സാധിക്കുക?

തന്റെ ദേഹേച്ചകൾക്കും, ഭൗതിക താൽപര്യങ്ങൾക്കും, കക്ഷിത്വ ചിന്തകൾക്കും ഒക്കെ മുകളിൽ ദൈവത്തിന്റെ ആജ്ഞയാണ് എനിക്ക് ഏറ്റവും വലുത് എന്നതാണ് ഈ ദിവസത്തിന്റെ ഒരു പ്രമേയം. അതാണ് "അല്ലാഹു അക്ബർ" അഥവാ "ദൈവമാണ് ഏറ്റവും വലിയവൻ" എന്ന വാക്യം ഉൽഘോഷിക്കുന്നത്. 

കാലഘട്ടത്തിന്റെ വളരെ നിസ്സാരമായ ഏതോ ഒരു കോണിൽ മാതാവിന്റെ ഗർഭപാത്രത്തിൽ നിന്നും വെറും കയ്യോടെ പുറത്തേക്ക് വന്ന, കഴിവ് കെട്ടവനായ, ദുർബലനായ, പര സഹായം കൂടാതെ ജീവിക്കുവാൻ പറ്റാത്തവനായ, വായുവും, വെള്ളവും, ഭക്ഷണവുമൊക്കെ ആവശ്യമുള്ളവനായ, രോഗവും വാർധക്യവും ബാധിക്കുന്നവനായ, മറവി സംഭവിക്കുന്നവനായ, മരിച്ചു പോകുന്നവനായ ഒന്നിന്റെയും മുന്നിൽ അല്ല ഈ ആരാധനകൾ അർപ്പിക്കുന്നത്. 

മറിച്ച്, സർവ്വ ലോകങ്ങളെയും പടച്ചു പരിപാലിക്കുന്ന, അതിനെയെല്ലാം ഉടമപ്പെടുത്തുകയും, നിയന്ത്രിക്കുകയും ചെയ്യുന്ന, മരണമോ, ഉറക്കമോ, മയക്കമോ ബാധിക്കാത്ത, ഭക്ഷണം ആവശ്യമില്ലാത്ത എന്നാൽ സർവ്വതിനേയും ഭക്ഷിപ്പിക്കുന്ന, ദുർബലനായ ഒരു സഹായിയുടെയും ഒരാവശ്യവും ഇല്ലാത്ത, സർവ്വ ഐശ്വര്യങ്ങളുടെയും, സർവ്വ പ്രതാപങ്ങളുടെയും ഉടയവനായ അവന്നാണ് ഈ ആരാധകനകൾ ഒക്കെയും അർപ്പിക്കുന്നത്. ഇത്തരമൊരു സന്ദേശമാണ് ഈ ആഘോഷ വേളയിൽ തെളിഞ്ഞു നിൽക്കുന്നത്.

അബൂ അബ്ദുൽ മന്നാൻ

Tuesday, May 29, 2018

ജാതി ചിന്തകളെ ഇല്ലായ്മ ചെയ്ത ആദർശം

ജാതി ചിന്തകളെ ഇല്ലായ്മ ചെയ്ത ആദർശം

ഇന്ന് കേരളത്തിൽ നടന്ന ജാതിക്കൊലയുടെ വാർത്ത വായിച്ചപ്പോൾ ഓർത്തെടുത്ത ഒരു അനുഭവമാണ് ഇങ്ങിനെ ഒന്നെഴുതുവാൻ പ്രേരണയായത്.

വര്ഷം രണ്ടായിരത്തി പതിനാല്. ഷിക്കാഗോയിലെ ഒഹാരേ ഇന്റർനാഷണൽ എയർപോർട്ടാണ് സ്ഥലം. 

ജോലി ആവശ്യാർത്ഥം അമേരിക്കയിലേക്ക് പോയ ഞാനും എന്റെ പ്രിയപ്പെട്ട സഹപ്രവർത്തകൻ പ്രശാന്ത് വിജയനും ഇന്ത്യയിലേക്കുള്ള റിട്ടേൺ ഫ്‌ളൈറ്റിന് വേണ്ടി എയർപോർട്ടിൽ കാത്തിരിക്കുന്ന രംഗം.

കണ്ടാൽ ആഫ്രിക്കക്കാരൻ എന്ന്  തോന്നിക്കുന്ന ഒരാൾ എന്റെ ഇടതു വശത്തുള്ള സീറ്റിൽ വന്നിരിക്കുകയും "അസ്സലാമു അലൈക്കും" അഥവാ "ദൈവം തമ്പുരാന്റെ രക്ഷ താങ്കൾക്കുണ്ടാകട്ടെ" എന്ന് പറയുകയും ചെയ്തു. 

ഞാൻ തിരിച്ചും സലാം പറഞ്ഞു. ഷിക്കാഗോയിൽ മെക്കാനിക്കൽ എൻജിനീയർ ആയി ജോലിചെയ്യുന്ന ഒരു നോർത്ത് സുഡാൻ പൗരനാണെന്ന് പരസ്പരം പരിചയപ്പെട്ടപ്പോൾ മനസ്സിലായി. 

അങ്ങിനെ നമ്മൾ സംസാരം തുടങ്ങി. രാഷ്ട്രീയപരമായും, സാംസ്കാരികമായും, ജോലിസംബന്ധവുമായ ഒട്ടേറെ കാര്യങ്ങൾ സംസാരിച്ചു.

കുറച്ചു കഴിഞ്ഞപ്പോൾ അതാ വേറെ ഒരാൾ "അസ്സലാമു അലൈക്കും" എന്ന് പറഞ്ഞു കൊണ്ട് പ്രശാന്തിന്റെ വലതു വശത്തും ഇരുന്നു. അമേരിക്കയിൽ നിയമ പഠനത്തിന്ന് വേണ്ടി വന്ന ഒരു സൗദിഅറേബ്യൻ പൗരനാണെന്ന് പരിചയപ്പെട്ടപ്പോൾ മനസ്സിലായി. 

അങ്ങിനെ സംസാരം കുറേ കൂടി ജോറായി നടന്നുകൊണ്ടിരുന്നു.

അതിനിടയ്ക്കാണ് പ്രശാന്ത് എന്നോട് ആ ചോദ്യം സ്വൽപം ആശ്ചര്യത്തോട് കൂടി ചോദിച്ചത്. "നിങ്ങൾ (ഒരേ ആദർശക്കാർ) എവിടെ നിന്നു കണ്ടാലും ഭയങ്കര അടുപ്പമാണല്ലോ?". 

ഒരു അന്യദേശത്ത് വെച്ച്, തീർത്തും ഒരു പരിചയവും ഇല്ലാത്ത, അന്യ ദേശക്കാരായ ആളുകളോട് ഊരും പേരുമൊക്കെ വെളിപ്പെടുത്തിക്കൊണ്ട് വളരെ അനായാസമായി, അതും ഇന്നിന്റെ സാഹചര്യത്തിൽ, പരസ്പരം സഹോദരങ്ങളെ പോലെ ഇടപഴകുവാൻ എങ്ങിനെ സാധിക്കുന്നു എന്നായിരുന്നു പ്രശാന്തിന്റെ ചോദ്യത്തിന്റെ കാതൽ.

"ദൈവം തമ്പുരാൻ ഹൃദയത്തിൽ ഇട്ടുതന്ന അടുപ്പം" എന്നായിരുന്നു ഒറ്റവാക്കിൽ അവനോട് ഞാൻ പറഞ്ഞത്.

രാജ്യത്തിന്റെയോ, ഭാഷയുടെയോ, നിറത്തിന്റെയോ മറ്റോ അതിർത്തികൾക്കെല്ലാം മുകളിൽ ഊട്ടിയുറപ്പിക്കപ്പെട്ട ഈ സാഹോദര്യത്തിന്റെ ഉറവിടം ചെന്നെത്തുന്നത് ആറാം നൂറ്റാണ്ടിലെ അറേബ്യൻ മണലാരിണ്യത്തിൽ എഴുത്തും വായനയും അറിയാത്ത, "അൽ അമീൻ" അഥവാ "സത്യസന്ധൻ" എന്ന് സർവ്വ ജനങ്ങളാലും വിളിക്കപ്പെട്ട ദൈവീക ദൂതൻ മുഹമ്മദ്(സ) എന്ന വ്യക്തിയാൽ പൂർത്തീകരിക്കപ്പെട്ട ആദർശത്തിലാണ്.

ഗോത്ര മഹിമകളും അതിന്റെ പേരിലുള്ള വിവേചനങ്ങളും തമ്മിലടികളും, മനുഷ്യൻ മറ്റൊരു മനുഷ്യനെ നാൽകാലികളെ പോലെ അടിമകളാക്കുന്ന അവസ്ഥകളുമൊക്കെ നിലനിന്നിരുന്ന പതിനാല് നൂറ്റാണ്ട് മുൻപുള്ള അറേബ്യൻ ഉപഭൂഖണ്ഡം.

ഏകനായ പ്രപഞ്ച നാഥനെ മാത്രം വിളിച്ചാരാധിക്കുവാൻ നിർമിക്കപ്പെട്ട കഅബാലയത്തിന്നു ചുറ്റും ഒരു ഗംഭീര ജനസാഗരം നില കൊള്ളുന്ന രംഗം.

പ്രാർത്ഥന സമയത്തെ അറിയിക്കുന്ന ബാങ്ക് വിളി നടത്തുവാൻ ആരാണ് ഏൽപ്പിക്കപ്പെടുന്നത് എന്ന് സാധാരണക്കാരൻ മുതൽ പ്രമാണിമാർ വരെ സാകൂതം കാത്തിരുന്ന ഒരു നിമിഷം. 

ആ ദൗത്യ നിർവഹണം ഏൽപ്പിക്കപ്പെട്ടത് മറ്റാരെയുമായിരുന്നില്ല. അടിച്ചമർത്തപ്പെട്ടവന്റെ പര്യായമായിരുന്ന, കറുത്തവനായ, മക്കയിലെ പ്രമാണിമാരുടെ അടിമയായിരുന്ന ബിലാൽ(റ) ആയിരുന്നു അത്. 

അങ്ങിനെ ആ കഅബാലയത്തിന്റെ മുകളിലേക്ക് ബിലാൽ കയറി. അദ്ദേഹം ആ കയറ്റം കയറിയത് നൂറ്റാണ്ടുകളോളം തങ്ങളെ അടിമകളാക്കി വെച്ചിരുന്ന ഒരു വ്യവസ്ഥിതിയെ ബഹുജന ഹൃദയങ്ങളിൽ നിന്നും തുടച്ചു നീക്കിക്കൊണ്ടായിരുന്നു. 

ഏതെങ്കിലും അധികാരത്തിന്റെയോ, കയ്യൂക്കിന്റെയോ ഭാഷ കൊണ്ടായിരുന്നില്ല ഇത്തരം വിവേചനങ്ങൾ നീക്കം ചെയ്യപ്പെട്ടത് എന്നത് വളരെ ശ്രദ്ധേയമാണ്. 

മറിച്ച്,  ദൈവീക വചനങ്ങളായ, മുൻ വേദഗ്രന്ഥങ്ങളെ മുഴുവൻ സത്യപ്പെടുത്തിക്കൊണ്ട് അവതരിച്ച പരിശുദ്ധ ഖുർആൻ കൊണ്ടും അതിന്റെ ജീവിത മാതൃകയായ മുഹമ്മദ് നബി(സ) ചര്യകൾകൊണ്ടുമായിരുന്നു സകല വംശവെറികളും വിവേചനങ്ങളും അവസാനിച്ചത്.  

"എല്ലാ ഇന്ത്യക്കാരും എന്റെ സഹോദരി സഹോദരന്മാരാണ്" എന്ന് സ്‌കൂളിലെ അസ്സംബ്ലിയിൽ വെച്ച് ഞാൻ പഠിക്കുകയും ഉറക്കെ പ്രഖ്യാപിക്കുകയും ചെയ്തപ്പോൾ, "ഈ ലോകത്തെ സർവ്വ മനുഷ്യരും ഒരേ പിതാവിന്റെയും ഒരേ മാതാവിന്റെയും മക്കളാണ്" എന്ന അതി വിശാലമായ ആദർശ വാക്യമാണ് എന്റെ മദ്രസയിൽ നിന്നും ഞാൻ പഠിച്ചതും, പ്രഖ്യാപിച്ചതും. 

അതിങ്ങനെ വായിക്കാം.

"ഹേ; മനുഷ്യരേ, തീര്‍ച്ചയായും നിങ്ങളെ നാം ഒരു ആണില്‍ നിന്നും ഒരു പെണ്ണില്‍ നിന്നുമായി സൃഷ്ടിച്ചിരിക്കുന്നു. നിങ്ങള്‍ അന്യോന്യം അറിയേണ്ടതിന്‌ നിങ്ങളെ നാം വിവിധ സമുദായങ്ങളും ഗോത്രങ്ങളും ആക്കുകയും ചെയ്തിരിക്കുന്നു. തീര്‍ച്ചയായും അല്ലാഹുവിന്‍റെ അടുത്ത്‌ നിങ്ങളില്‍ ഏറ്റവും ആദരണീയന്‍ നിങ്ങളില്‍ ഏറ്റവും ധര്‍മ്മനിഷ്ഠ പാലിക്കുന്നവനാകുന്നു. തീര്‍ച്ചയായും അല്ലാഹു സര്‍വ്വജ്ഞനും സൂക്ഷ്മജ്ഞാനിയുമാകുന്നു.". ഖുർആൻ 49:13. 

തന്റെ വിടവാങ്ങൽ പ്രസംഗത്തിൽ വെച്ച്, ആബാലവൃദ്ധം ജനങ്ങളെയും സാക്ഷി നിറുത്തികൊണ്ട് മുഹമ്മദ് നബി(സ) പ്രഖ്യാപിച്ചു -

"മനുഷ്യരെ, അറിഞ്ഞേക്കുക: നിങ്ങളുട രക്ഷിതാവ് ഏകനാണ്. അറബിക്ക് അറബിയല്ലാത്തവനേക്കാൾ ശ്രേഷ്ഠതയില്ല; അറബിയല്ലാത്തവന്നു അറബിയേക്കാളും ഇല്ല; കറുത്തവന്ന് ചുവന്നവനെ (വെള്ളക്കാരനെ) ക്കാളും ഇല്ല; ചുവന്നവന്ന് കറുത്തവനെക്കാളും ഇല്ല - ഭയഭക്തികൊണ്ടല്ലാതെ. നിങ്ങളിൽ ഏറ്റവും ആദരണീയൻ നിങ്ങളിൽ ഏറ്റവും ഭയഭക്തിയുള്ളവനാകുന്നു".

ഇത്തരുണത്തിൽ, സകല ജാതി ചിന്തകളെയും  വെടിഞ്ഞുകൊണ്ട് മനുഷ്യനെ മനുഷ്യനായി കണ്ടുകൊണ്ട്, പുണ്യത്തിലും ഭക്തിയിലും പരസ്പരം സഹകരിച്ചുകൊണ്ട് നമുക്ക് മുന്നേറാം. പടച്ചവൻ അനുഗ്രഹിക്കട്ടെ.

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ

ഹൃദയാന്തരങ്ങളിൽ കനൽ തരികൾ വിതറിയ മരണം

ഹൃദയാന്തരങ്ങളിൽ കനൽ തരികൾ വിതറിയ മരണം

പല മരണങ്ങളും ഇന്നേവരെയുള്ള ജീവിതത്തിൽ കണ്ടിട്ടുണ്ട്. ഓരോ മരണവും അതിന്റെതായ അലയൊലികളും ദുഃഖങ്ങളും സൃഷ്ടിച്ചിട്ടുണ്ട്.

എന്നാൽ ഇതിൽ നിന്നെല്ലാം വ്യത്യസ്തമാകുകയാണ് സഹോദരി ലിനി സജീഷിന്റെ മരണം. വരും കാലങ്ങളിലേക്ക് മായ്ക്കാനാകാത്ത അടയാളം കോറിയിട്ട ഒരു മരണം.

തന്റേതല്ലാത്ത കാരണത്താൽ രോഗത്തിന്ന് അടിമപ്പെടുകയും ജീവിതത്തിലേക്ക് ഇനി ഒരു തിരിച്ചു വരവ് ഇല്ലാ എന്ന് ഉറപ്പാക്കുകയും ചെയ്ത ഒരു സന്ദർഭം.

ഒരു പൂർണ്ണ ബോധ്യത്തോടുകൂടി ആ സഹോദരി മരണത്തിലേക്ക് നടന്നു പോയത് ഏതൊരു മാനസികാവസ്ഥയിലൂടെ ആയിരിക്കും എന്ന ചിന്തയും, ആ സ്ഥാനത്ത് സ്വന്തത്തെ കരുതുമ്പോൾ എന്തായിരിക്കും അവസ്ഥ എന്ന ചിന്തയും കനൽ തരികളാണ് ഹൃദയത്തിൽ വിതറുന്നത്.

മരണ മുഖത്തേകുള്ള തന്റെ യാത്രയിൽ പറക്കമുറ്റാത്ത രണ്ടു മക്കളിൽ നിന്നും താനിതാ പിഴുതുമാറ്റപെടുകയാണ് എന്ന് തിരിച്ചറിഞ്ഞ ഒരു അമ്മയുടെ മനോവ്യഥകൾ ജീവനുള്ള ഏതൊരു ഹൃദയത്തെയും അലട്ടിക്കൊണ്ടിരിക്കും.

തങ്ങൾ അനാഥത്വത്തിലാണെന്ന് മനസ്സിലാക്കാൻ പറ്റാത്ത ആ രണ്ടു കുഞ്ഞു മക്കൾ...

ലോകത്ത് പകരം വെക്കാനില്ലാത്ത അമ്മയുടെ ലാളനയും, സ്നേഹവാത്സല്യങ്ങളും ഇനി ഒരിക്കലും ലഭിക്കാൻ സാധിക്കാത്ത ആ കുരുന്നു മക്കൾ...

പക്ഷെ ഒന്നുറപ്പുണ്ട്. തീയ്യിൽ കരുത്തത് വെയിലത്ത് വാടില്ല. അനാഥത്വത്തിന്റെ ബാല്യങ്ങൾ പേറിയവരൊക്കെ കരുത്തരായി വളർന്നതാണ് ചരിത്രം. അത്തരം കരുത്തുറ്റൊരു ഭാവി ആ മക്കൾക്ക് ഉണ്ടാകട്ടെ എന്ന പ്രത്യാശയോടെ.

അബൂ അബ്ദുൽ മന്നാൻ.

Friday, May 18, 2018

മായാ ജലം!

മായാ ജലം!

മായാജാലം എന്ന് കേൾക്കാത്തവർ ഉണ്ടാകില്ല എന്ന് കരുതുന്നു. എൽ.പി. സ്‌കൂളിൽ പഠിക്കുന്ന കാലത്ത് ഒരു രൂപയോ മറ്റോ കൊടുത്ത് മായാജാലം കണ്ടവരാണ് നമ്മിൽ പലരും.

എന്നാൽ ഇവിടെ പറയുന്നത് ഒരു മായാ ജലത്തെ കുറിച്ചാണ്. ആഴിപ്പരപ്പിലെ ഉപ്പു വെള്ളത്തെ വളരെ ലളിതമായി ശുദ്ധീകരിച്ചുണ്ടാക്കുന്ന അത്ഭുത വെള്ളം, കുടിവെള്ളം.

അറബിക്കടലിന്റെ അനന്ത വിസ്‌മൃതിയിലെ ഒരു പച്ച തുരുത്തായ ലക്ഷദ്വീപിൽ ജനങ്ങൾക്ക് കുടിക്കുവാനായി വെള്ളം കണ്ടെത്തുന്നത് തീർത്തും ഉപ്പ് കലർന്ന കടൽ വെള്ളത്തിൽ നിന്നുമാണ്.



കടൽ വെള്ള ശുദ്ധീകണം എന്ന് കേട്ടപ്പോൾ എന്റെ മനസ്സിൽ ഓടിയെത്തിയത് ഒരു പാട് കെമിക്കൽസും മറ്റു സംവിധാനങ്ങളും ഉപയോഗിച്ചുള്ള ഒരു പരിപാടിയെ കുറിച്ചാണ്.

എന്നാൽ കുടിവെള്ള ശുദ്ധീകരണ രംഗത്തെ തീർത്തും വ്യത്യസ്തമായ ഒരു കാഴ്ചയാണ് കവരത്തി ദ്വീപിൽ കാണുവാൻ സാധിച്ചത്.

ലഗൂണിലെ ഉപരിതല ജലം ഒരു ഫ്‌ളാഷ് ചേമ്പറിലേക്ക് പമ്പ് ചെയ്യുമ്പോൾ രൂപപ്പെടുന്ന നീരാവിയെ മറ്റൊരു ചേമ്പറിലേക്ക് കടത്തി വിടുകയും അവിടെ വെച്ച് ആ നീരാവിയെ തണുപ്പിക്കുകയും ചെയ്യുന്നു. ഇങ്ങിനെ തണുപ്പിക്കുമ്പോൾ കിട്ടുന്ന വെള്ളമാണ് കുടിവെള്ളം. വളരെ ലളിതമായ രീതി.

ഏതെങ്കിലും ഒരു അസംസ്‌കൃത വസ്തുവിന്റെ ഒരു ആവശ്യം ഇവിടെ വരുന്നില്ല. ബാക്കിവരുന്ന വെള്ളം കടലിലേക്ക് തന്നെ ഒഴുക്കുകയാണ് ചെയ്യുന്നത്. LTTD (Low Temperature Thermal Desalination) എന്നാണ് ഈ പ്രവർത്തനത്തെ വിളിക്കുന്നത്.



ആദ്യത്തെ ഫ്‌ളാഷ് ചേമ്പറിൽ നൂറു ലിറ്റർ വെള്ളം പമ്പ് ചെയ്യുമ്പോൾ ഒരു ലിറ്റർ വെള്ളത്തിനുള്ള നീരാവി ഉണ്ടാകുന്നു. ആ നീരാവിയെ രണ്ടാമത്തെ ചേമ്പറിൽ വെച്ച് തണുപ്പിക്കുന്നത് കടലിന്റെ ഏകദേശം 350 മീറ്റർ താഴ്ചയിൽ നിന്നും പമ്പ് ചെയ്യുന്ന വെള്ളം ഉപയോഗിച്ചാണ്. 

കടലിന്റെ അടിയിലേക്ക് പോകുംതോറും വെള്ളത്തിന്ന് തണുപ്പ് കൂടും. 350 മീറ്റർ താഴ്ചയിലെ വെള്ളത്തിന്റെ താപം ഏകദേശം 23 ഡിഗ്രിയാണ്.

ഈ കുടിക്കുവാൻ പാകമായ ജലത്തിൽ ഉപ്പിന്റെ അംശം തീരെ ഉണ്ടാകില്ല എന്ന് മാത്രമല്ല ആ വെള്ളത്തിന്ന് നല്ല തണുപ്പും ഉണ്ടായിരിക്കും.

ഇങ്ങിനെ ഉൽപാദിപ്പിക്കുന്ന കുടിവെള്ളത്തിൽ ഉപ്പിന്റെകൂടെ, കാൽസ്യം പോലുള്ള, മനുഷ്യന്ന് ആവശ്യമുള്ള മിനറൽസും പോകും എന്നതാണ് ഈ വെള്ളത്തിന്റെ ഒരു പോരായ്മയായി പറയുന്നത്. എന്നാൽ കാൽസ്യം കൂടുതൽ അടങ്ങിയ ചൂരയും, ക്വിന്റൽ ചൂരയും പോലുള്ള മൽസ്യങ്ങൾ ദ്വീപിൽ സുലഭമായതിനാൽ കാൽസ്യത്തിന്റെ കുറവ് അതു വഴി പരിഹരിക്കപ്പെട്ടേക്കാം.

ശുദ്ധീകരണ തത്വങ്ങൾ ലളിതമാണെങ്കിലും കടലിന്റെ ആഴിയിൽ നിന്നും വെള്ളം പമ്പ് ചെയ്യുവാൻ ഉപയോഗിക്കുന്ന മെഷിനറീസും മറ്റും അൽപ്പം കോംപ്ലക്സ് ആണ് എന്നാണ് മനസ്സിലാക്കുവാൻ സാധിച്ചത്.


മുഹമ്മദ് നിസാമുദ്ധീൻ