പൊന്നുരുക്കുന്നിടത്ത് പൂച്ചക്കെന്ത് കാര്യം?
വിശാസങ്ങളും ആചാരങ്ങളും പലതാണ്. ഇന്ന് ലഭ്യമായ ഭൗതികതയുടെ അളവുകോൽ വെച്ച് പല വിശ്വാസ-ആചാരങ്ങളെയും അളക്കുക എന്നത് വളരെ പ്രയാസമായിരിക്കും.
നൂറ്റാണ്ടുകളായി പിന്തുടരുന്ന ഒരു ആചാരത്തിലേക്ക് അതിൽ ഇതുവരെ ഇല്ലാത്ത ഒന്നിനെ തിരുകിക്കയറ്റുന്നത് ശരിയല്ല എന്നാണ് അഭിപ്രായം. എന്തിന്റെയെങ്കിലും പേരിൽ അങ്ങിനെ ചെയ്‌താൽ അത് ചെയ്ത സംവിധാനങ്ങളോടുള്ള ബഹുമാനം കുറഞ്ഞുപോകുവാൻ കാരണമായേക്കാം.
ഒരാൾ മനസ്സിലാക്കിയ പോലെ മറ്റുള്ളവരും വിശ്വസിക്കണമെന്നും ആചരിക്കണമെന്നുമൊക്കെ മറ്റൊരാൾക്ക് ആഗ്രഹിക്കാം പക്ഷെ അത് അടിച്ചേൽപ്പിക്കുന്നത് ഒട്ടും ശരിയല്ല. വിശിഷ്യാ ഇത്തരം അടിച്ചേൽപ്പിക്കലുകൾ വരുന്നത് ജനാധിപത്യ സംവിധാനത്തിന്റെ നെടുംതൂണികളിൽപെട്ട ഒന്നിൽ നിന്നാകുമ്പോൾ.
ലിംഗ സമത്വത്തിന്റെ പേരിലാണ് തീരുമാനം എടുത്തത് എങ്കിൽ അത് ഇതുകൊണ്ടു മാത്രം തീരും എന്ന് കരുതുന്നില്ല. മറിച്ച്, വലിയ വലിയ അനർത്ഥങ്ങളിലേക്ക് വഴി തുറക്കലാകും അത് എന്നാണ് തോന്നുന്നത്.
പുരുഷന്റെയും സ്ത്രീയുടെയും ശാരീരിക ഘടന എത്രത്തോളം വൈവിധ്യമാണോ അത്രത്തോളം തന്നെ എല്ലാ വിഭാഗം വിശ്വാസങ്ങളിലും ആചാരങ്ങളിലും അതിന്റെ പ്രതിഫലനങ്ങൾ നിഴലിച്ചു കാണാം.
വിശ്വാസ-ആചാരങ്ങളെ വേണമെങ്കിൽ മാറ്റിനിറുത്താം. നിലവിലുള്ള പല ബൗദ്ധിക സംവിധാനങ്ങളും ലിംഗ സമത്വത്തേക്കാൾ ഉപരി, ലിംഗ വൈവിധ്യങ്ങൾക്കാണ് പ്രാധ്യാനം നൽകുന്നത് എന്ന് കാണാം.
ലേഡീസ് ഒൺലി ടോയ്‌ലെറ്റ് മുതൽ, സീറ്റുകളും, കോച്ചുകളും, ഹെൽപ് ലൈൻ നമ്പറുകളും, കൗണ്ടറുകളും, കമ്മീഷനുകളുമൊക്കെ തുടങ്ങി, അവർക്ക് വേണ്ടി മാത്രമുള്ള പോലീസ് സ്റ്റേഷനുകൾ വരെ നമ്മുടെ നാട്ടിലുണ്ട്. ലിംഗ സമത്വമാണ് ഉദ്ദേശം എങ്കിൽ ഇത്തരം സംവിധാനങ്ങളൊക്കെ പിരിച്ചുവിടേണ്ടിവരും.
നീതിക്കും ന്യായത്തിന്നും മുൻപിൽ സ്ത്രീയും പുരുഷനും തുല്യരാണ്, പക്ഷെ ഒന്നല്ല, രണ്ടാണ് - വൈവിധ്യങ്ങളാൽ നിറഞ്ഞു തുളുമ്പുന്ന രണ്ട് വ്യക്തിത്വങ്ങൾ. ഈ വൈവിധ്യം അംഗീകരിച്ച് മുന്നോട്ട് പോകുന്നതാകും നല്ലത് എന്നാണ് അഭിപ്രായം.
എന്റെ സുഹൃത്ത് വിജേഷ് വിജയ് എഴുതിയ കുറിപ്പ് ഇതിന്റെ താഴെ കൊടുക്കുന്നു.
അബൂ അബ്ദുൽ മന്നാൻ മുഹമ്മദ് നിസാമുദ്ധീൻ.
ആചാരവും ദുരാചാരവും.
–––––––––––––––––––––––––––
ശബരിമലയിലെ പ്രതിഷ്ഠ നൈഷ്ഠിക ബ്രഹ്മചാരി ആണ്.
ആ പ്രതിഷ്ഠയുടെ പ്രത്യേകത ആണ് അങ്ങിനെ ഒരു ആചാരം വരാൻ ഉള്ള കാരണം.
അവിടത്തെ പ്രതിഷ്ഠയുടെ രീതി അനുസരിച്ചു വിശ്വാസികളായ സ്ത്രീകൾ എടുക്കുന്ന ഒരു അകലം. അതാണ് ഈ ആചാരത്തിന്റെ കാതലും.
പണ്ട് ഈ 10/50 റൂൾ ഉണ്ടായിരുന്നില്ല എന്നാണറിവ്. ആ പ്രതിഷ്ഠയുടെ രീതി മാനിച്ചു ആ സന്ദർശനം ഒഴിവാക്കുക ആണ് വിശ്വാസികളായ സ്ത്രീകൾ ചെയ്തു പോന്നിരുന്നത് . ഇടക്കും തടക്കും ആ ഗൈഡ്ലൈൻ അറിഞ്ഞോ അറിയാതെയോ തെറ്റിക്കപ്പെടുന്നു എന്ന് കണ്ടപ്പോൾ വന്ന ഒരു നിയമം. പ്രായം തോന്നിക്കാത്ത ഒരു 12 വയസ്സായ ഒരു കുട്ടി അങ്ങോട്ട് കേറി പോയാൽ ഒന്നും സംഭവിക്കില്ല. ഇപ്പോഴും Birth Certificate ചെക്കിങ്ങോ ആർത്തവം ആയോ എന്നൊരു പരിശോധനയോ അവിടെ ഉള്ളതായി അറിവില്ല.
നിങ്ങൾ പോകേണ്ട പോകുന്നവർ പൊക്കോട്ടെ എന്നത് കൊണ്ടു വിശ്വാസിയുടെ പ്രശ്നം തീരില്ല. കാരണം അവിടെ അവരുടെ വിശ്വാസം ഹനിക്കപ്പെടുന്നു.
ഉദാഹരണത്തിന് ഖുർആനോ ബൈബിളോ ഭാഗവദ്ഗീതയോ അവിശ്വാസികൾക്ക് വെറും ഒരു പുസ്തകം മാത്രം ആണ്. ഒരു പുസ്തകത്തെ നിലത്തിട്ടു ചവുട്ടിയാൽ നിനക്കെന്ത് എന്ന് പറഞ്ഞു അതു ചവുട്ടികൂട്ടിയാൽ വിശ്വാസികൾക്ക് അതു ബുദ്ധിമുട്ടുണ്ടാക്കില്ല എന്നില്ലല്ലോ.
സ്ത്രീ യെ പുച്ഛിക്കൽ അല്ല ബ്രഹ്മചാരി എന്ന ആ പ്രതിഷ്ഠയുടെ സ്വഭാവത്തെ മാനിക്കൽ ആണ് ഇവിടെ ചെയ്യുന്നത്.
"അയ്യേ ദേ അശുദ്ധയായ ഒരു യൗവ്വന യുക്ത സ്ത്രീ" എന്നുള്ള ലൈൻ അല്ല ഈ ഗൈഡ്ലൈന് പിന്നിൽ എന്നാണ് പറഞ്ഞു വരുന്നത്.
സതി, കീഴ് ജാതിക്കാർ അമ്പലത്തിൽ പ്രവേശിക്കരുത് പോലെയുള്ള ദുരാചാരങ്ങളെ ഇതിലേക്ക് കൂട്ടി കെട്ടുന്നവരോട് സഹതാപമേ ഉള്ളൂ.
ആചാരവും ദുരാചാരവും തമ്മിലുള്ള വ്യത്യാസം മനസ്സിലാക്കാത്തവർ അല്ലെങ്കിൽ മനസ്സിലായില്ലെന്ന് നടിക്കുന്നവർ.
അതെന്താ ബാക്കി അയ്യപ്പ സ്വാമി അമ്പലങ്ങളിൽ എവിടെയും ഇല്ലാത്ത ഒരു "ബ്രഹ്മചര്യം" ഇവിടെ മാത്രം എന്നൊക്കെയുള്ള ലോജിക്കൽ ചോദ്യവുമായി വരുന്നവരോട്: ദൈവം ഉണ്ടോ ഇല്ലയോ എന്ന് ഇപ്പോഴും തർക്കം നടന്നു വരുന്നേ ഉള്ളൂ ബ്രോ. ഇതൊക്കെ ഒരു വിശ്വാസത്തിന്റെ ഭാഗം അത്രേ ഉള്ളൂ.
ശബരിമലയിൽ സ്ത്രീകൾ കയറുന്നത് കൊണ്ടു ശബരിമലക്കോ അയ്യപ്പ സ്വാമിക്കോ ബ്രഹ്മചര്യത്തിനോ ഒന്നും സംഭവിക്കാൻ പോകുന്നില്ല എന്നുള്ള അഭിപ്രായക്കാരൻ ആണ് ഞാൻ.
പക്ഷെ വിശ്വാസികളെയും അവരുടെ വിശ്വാസത്തെയും മാനിക്കുന്നു.
ബ്രഹ്മചാരികൾ സ്ത്രീവിരുദ്ധർ ആണ് എന്ന അഭിപ്രായം ഇല്ലാത്തിടത്തോളം ഇത് സ്ത്രീ വിരുദ്ധം ആണെന്ന അഭിപ്രായവും എനിക്കില്ല.
ഇവിടെ ഒരപമാനിക്കലും പീഡനവും വിരുദ്ധതയും ഇല്ല. ഇത് ഒരാചാരമാണ് ദുരാചാരമല്ല.
ദുരാചാരങ്ങളെ എതിർക്കുക. വലിയ ഉപദ്രവങ്ങൾ സൃഷ്ടിക്കാത്തിടത്തോളം ആചാരങ്ങൾ നടന്നു പോകട്ടെ.
