ആടും പുലിയും യാഥാർത്യമായി

ആടും പുലിയും യാഥാർത്യമായി

കേരളത്തിലെ നിലവിലെ സാഹച്യര്യം കാണുമ്പോൾ എനിക്ക് ഓർമ്മ വന്നത്  എന്റെ ഉപ്പ പണ്ട്  പറഞ്ഞുതന്ന ഒരു കഥയിലെ രണ്ടു കഥാപാത്രങ്ങളെയാണ്.

ഒരു നാട്ടിൽ രണ്ടാളുകൾ തമ്മിൽ ഭയങ്കരമായ ഒരു വാഗ്വാദം നടക്കുന്നു...

ഒന്നാമത്തെയാൾ  രണ്ടാമത്തവനെ ചൂണ്ടിക്കാണിച്ചുകൊണ്ട് പറയുന്നു - "നിന്റെ ആടിനെ ഞാൻ എന്റെ പുലിയെ വിട്ട് കടിപ്പിക്കും" എന്ന്.

മറുപടിയായി രണ്ടാമത്തെയാൾ പറയുന്നു "അങ്ങിനെയാണെങ്കിൽ നിന്നെയും നിന്റെ പുലിയെയും ഞാൻ വകവരുത്തും എന്ന്"

വാഗ്വാദം കണ്ടുനിന്ന പൊതുജനം രണ്ടു കഷ്ണമായി ഭിന്നിക്കുകയും, അതിൽ ഒരു വിഭാഗം ഒന്നാമത്തെവന്റെ പിന്നിലും, മറുവിഭാഗം രണ്ടാമത്തെവന്റെ പിന്നിലും അണിനിരന്നു. അങ്ങിനെ വലിയ ഒരു തമ്മിലടിക്ക് കോപ്പ് കൂട്ടുന്ന ഒരു ഭീകരമായ അന്തരീക്ഷം ആ നാട്ടിൽ  സംജാതമായി!

പ്രശ്‌നം പരിഹരിക്കുവാൻ ഒരാൾ കടന്നുവരുന്നു. 

അദ്ദേഹം ഒന്നാമത്തെ ആളോട് ചോദിച്ചു - "നീയല്ലേ മറ്റവന്റെ ആടിനെ നിന്റെ പുലിയെ വിട്ട് കടിപ്പിക്കും എന്ന് പറഞ്ഞത്, എവിടെ നിന്റെ പുലി?"

ഒന്നാമത്തവൻ മറുപടിയായി പറഞ്ഞു - "അല്ലാ, അവൻ ഒരു ആടിനെ വാങ്ങിയാൽ, ഞാൻ ഒരു പുലിയെ വാങ്ങും"!!

അദ്ദേഹം രണ്ടാമത്തവനോട് ചോദിച്ചു - "നിന്റെ ആടിനെയല്ലേ അവൻ പുലിയെക്കൊണ്ട് കടിപ്പിക്കും എന്ന് പറഞ്ഞത്, എവിടെ നിന്റെ ആട്?"

രണ്ടാമത്തവൻ മറുപടിയായി പറഞ്ഞു - "അല്ലാ, അവൻ ഒരു പുലിയെ വാങ്ങിയാൽ, ഞാൻ ഒരു ആടിനെ വാങ്ങും"!!

വിശ്വാസത്തിലോ  ആചാരത്തിലോ ഒരു താൽപര്യവും ഇല്ലാത്ത ഒരു വിഭാഗം ആളുകക്ക് ഒരു പുലിയെ കിട്ടിയപ്പോൾ അതിനെ കൂട്ടിൽ അടക്കുന്നതിന്ന് പകരം നാട്ടിൽ  ഇറക്കി. 

പുലി ഇറങ്ങുന്ന ഒരു അവസരം കാത്തുനിന്ന രണ്ടാമത്തെ വിഭാഗം, അത്തരമൊരു അവസരം തങ്ങളുടെ  സ്വാർത്ഥമായ താൽപര്യം നടപ്പാക്കുവാൻ വേണ്ടി പുലിയുടെ മുന്നിലേക്ക്  ചില ആടുകളെ ചമയം നടത്തി ഉന്തിവിട്ടു. അങ്ങിനെ നാട്ടിൽ അടിയായി, ഉന്തും തള്ളുമായി, ഇന്നിതാ ഹർത്താലുമായി...

സമാധാനത്തിൽ കഴിഞ്ഞു കൊണ്ടിരിക്കുന്ന ഒരു ജനസഞ്ചയത്തിലേക്ക്, പുലി ഇറങ്ങുവാനുള്ള സാഹചര്യം ഒരുക്കിയത് ആടിനെ ഇറക്കിയവരാണ് എന്നാണ് എന്റെ ഒരു വിലയിരുത്തൽ.  

ലക്ഷ്യം ചേരിതിരിക്കലാണ്, ഭിന്നിപ്പിക്കലാണ്. ഇത് ജനം തിരിച്ചറിയണം പക്ഷെ ഒരു സുഹൃത്ത് പറഞ്ഞപോലെ, ആടെന്തറിഞ്ഞു അങ്ങാടി വാണിഭം? പുലിയെന്തറിഞ്ഞു അങ്ങാടി വാണിഭം?

അബൂ അബ്ദുൽ മന്നാൻ മുഹമ്മദ് നിസാമുദ്ധീൻ.