കൊണാണ്ടർ

കൊണാണ്ടർ

മുൻപ് ജോലി ചെയ്തിരുന്ന കമ്പനിയിൽ എനിക്ക് ഇഷ്ടപ്പെട്ട ഒരു പ്രൊജക്റ്റ് ലീഡർ ഉണ്ടായിരുന്നു.

പല മീറ്റിംങ്ങുകൾക്കിടയിലും അദ്ദേഹം ഉപയോഗിച്ചിരുന്ന ഒരു പദപ്രയോഗമായിരുന്നു "കൊണാണ്ടർ". എന്റെ ഓർമ്മ ശരിയാണെങ്കിൽ  ക്ലയന്റ് സൈഡിൽ നിന്നും എന്തെങ്കിലും ഒരു ചൊറിയൻ ഇമെയിൽ വരികയോ, അല്ലെങ്കിൽ ടീമിലെ ജൂനിയർ മെംബേർസ് എന്തെങ്കിലും പണി ഒപ്പിക്കുകയോ ചെയ്യുമ്പോഴായിരുന്നു അദ്ദേഹം "ഇതൊരു കോണാണ്ടർ  ആയല്ലോ" എന്ന തരത്തിൽ പറയാറുണ്ടായിരുന്നത്.

"കൊണാണ്ടർ" എന്ന് കേൾക്കുമ്പോഴെല്ലാം ഞാൻ വിചാരിച്ചത്,  കോഴിക്കോട് ഭാഗത്ത് പലപ്പോഴും ഉപയോഗിക്കാറുള്ള ഒരു "മണാങ്കട്ട" പ്രയാഗമാണ്  അത് എന്നാണ്. അതായത്, രണ്ടു കാര്യങ്ങൾ ഒരാളെ ചെയ്യാൻ ഏൽപിച്ചിട്ട്, ഏൽപിച്ച രണ്ടു പണിയുമായും ഒരു ബന്ധവും ഇല്ലാത്ത മറ്റ് രണ്ടു കാര്യങ്ങൾ ചെയ്തുവന്നിട്ട്, "ഇനി എന്താ ചെയ്യേണ്ടത്" എന്ന് ചോദിച്ചാൽ  അത്തരം സന്ദർഭങ്ങളിൽ പറയുന്നതാണ് "മണ്ണാങ്കട്ട" എന്നത് :)

അങ്ങിനെ സ്വൽപ്പം വർഷങ്ങൾക്ക് ശേഷം, ജോലി ആവശ്യാർത്ഥം അമേരിക്കയിൽ പോയപ്പോഴായിരുന്നു സംഗതി ശരിക്കും മനസ്സിലായത്. അഞ്ചാറു ദിവസമായി പരിഹരിക്കുവാൻ ശ്രമിച്ചുകൊണ്ടിരുന്ന ഒരു കാര്യം പരിഹരിച്ച എന്റെ ക്ലയന്റ്, അതെങ്ങിനെ പരിഹരിച്ചു എന്ന് വിശദീകരിക്കുന്നിടയിൽ, ഒരു പീസ് ഹാർഡ്‌വെയർ പൊക്കിപ്പിടിച്ചുകൊണ്ടു പറഞ്ഞു "this conundrum"!

എന്റെ മനസ്സിലേക്ക് ഉടനെ ഓടിയെത്തിയത് മുൻ  പ്രൊജക്റ്റ് ലീഡറുടെ ആ  പ്രയോഗമായിരുന്നു. എന്തായാലും ക്ലയന്റ് "മണ്ണാങ്കട്ട" എന്നല്ല ഉദ്ദേശിച്ചത്  എന്ന് എനിക്കുറപ്പായിരുന്നു. അങ്ങിനെ ഡിക്ഷണറി എടുത്തപ്പോൾ അതാ കിടക്കുന്നു "Conundrum" അഥവാ "പരിഹരിക്കുവാൻ വളരെ പ്രയാസമുള്ളത്" എന്ന അർത്ഥത്തിൽ ഒരു വാക്ക്!

അങ്ങിനെ മറ്റു പല കാര്യങ്ങളും നോക്കിക്കൊണ്ട്  ഇരിക്കുമ്പോഴായിരുന്നു ആ കാര്യം കൂടി മനസ്സിലായത്. അതായത്, പല ഇംഗ്ലീഷ് വാക്കുകളുടെയും സ്‌പെല്ലിംഗും ഉച്ചരണവും തമ്മിൽ ഭയങ്കര അന്തരം ഉണ്ട് എന്ന കാര്യം.

ഒരു ഇഗ്ലീഷ് വാക്കിന്റെ സ്‌പെല്ലിംഗ് മാത്രം നോക്കി അതിന്റെ ഉച്ചരാണം മനസ്സിലാക്കുവാൻ സാധിക്കുകയില്ല. പലപ്പോഴും ഒരു വാക്കിന്റെ ഉച്ചരാണം അതിന്റെ സ്പെല്ലിങ്ങുമായി യാതൊരു ബന്ധവുമില്ല എന്ന് കാണാം.

ഞാനടക്കമുള്ള ആളുകൾ Video എന്ന വാക്ക് ഉച്ചരിക്കാറുള്ളത് "വീഡിയോ" എന്നാണ്. എന്നാൽ യഥാർത്ഥത്തിൽ "വ" എന്ന ആദ്യത്തെ അക്ഷരത്തിന്റെ വള്ളിക്ക് നീട്ടം ഇല്ലാതെ "വിഡിയോ" എന്നാണ് ഉച്ചരിക്കേണ്ടത്.

അങ്ങിനെ ഒരു വാക്കിന്റെ യഥാർത്ഥ ഉച്ചരാണം പഠിക്കണമെങ്കിൽ Phonitics എന്താണെന്ന് പഠിക്കണം. പിന്നെ Syllable എന്താണെന്ന് പഠിക്കണം. അങ്ങിനെ അങ്ങിനെ പോയി, പ്പോയി, ഈ വാക്കുകൾ കൂട്ടിച്ചേർത്ത് സംസാരിക്കുമ്പോൾ പാലിക്കേണ്ട നിയമങ്ങളായ Intonation, Phonemes, Voiced, Unvoiced, Assimilation, Eliding and Deleting, Word Emphasis, Word Stress മുതലായവ പഠിക്കണം.

ഇതെല്ലാം കണ്ടുപകച്ചുപോയ എന്നോട് എന്റെ മനസ്സ് പറഞ്ഞു "വാ പോകാം". അപ്പോൾ ഞാൻ എന്റെ മനസ്സിനോട് തന്നെ പറഞ്ഞു "വാ വേഗം പോകാം"